ಕೋಲಾರ: Helmet ಧರಿಸದೇ ಬೈಕ್ ಚಲಾಯಿಸುತ್ತಿದ್ದ ಯುವಕನನ್ನು ಪ್ರಶ್ನಿಸಿದ ನ್ಯಾಯಾಧೀಶರ ಕಾರನ್ನು ಅಡ್ಡಗಟ್ಟಿ ಗಲಾಟೆ ನಡೆಸಿದ ಪ್ರಕರಣದಲ್ಲಿ ಮಾಲೂರು ಪೊಲೀಸರು ಮೂವರನ್ನು ಬಂಧಿಸಿದ್ದಾರೆ. ಘಟನೆಗೆ ಸಂಬಂಧಿಸಿದ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆದ ಬಳಿಕ ಪ್ರಕರಣಕ್ಕೆ ಹೊಸ ತಿರುವು ಸಿಕ್ಕಿದ್ದು, ನ್ಯಾಯಾಧೀಶರ ದೂರಿನ ಮೇರೆಗೆ ಪೊಲೀಸರು ಕಾನೂನು ಕ್ರಮ ಕೈಗೊಂಡಿದ್ದಾರೆ.

ಬಂಧಿತರನ್ನು ಮಾಲೂರು ಪಟ್ಟಣದ ಕೆ.ಎಂ. ವಿನಯ್ (24), ಅವರ ತಾಯಿ ಕವಿತಾ (47) ಹಾಗೂ ತಾತ ವೆಂಕಟೇಶ್ (69) ಎಂದು ಗುರುತಿಸಲಾಗಿದೆ. ಜುಲೈ 19ರಂದು ಮಾಲೂರು ಜೆಎಂಎಫ್‌ಸಿ ನ್ಯಾಯಾಲಯದ ನ್ಯಾಯಾಧೀಶೆ ಗಾಯತ್ರಿ ಅವರು ಕಾರಿನಲ್ಲಿ ತೆರಳುತ್ತಿದ್ದ ವೇಳೆ ಈ ಘಟನೆ ನಡೆದಿದೆ.

ಪೊಲೀಸರ ಮಾಹಿತಿ ಪ್ರಕಾರ, ವಿನಯ್ ಹೆಲ್ಮೆಟ್ ಧರಿಸದೆ ಅಜಾಗರೂಕತೆಯಿಂದ ಬೈಕ್ ಚಲಾಯಿಸುತ್ತಿದ್ದ ವೇಳೆ ನ್ಯಾಯಾಧೀಶರ ಕಾರಿನ ಮುಂದೆ ಬಂದಿದ್ದಾನೆ. ಈ ವೇಳೆ ನ್ಯಾಯಾಧೀಶೆ ಗಾಯತ್ರಿ ಅವರು ಹೆಲ್ಮೆಟ್ ಧರಿಸದಿರುವ ಬಗ್ಗೆ ಪ್ರಶ್ನಿಸಿದಾಗ, ಯುವಕ ಆಕ್ರೋಶಗೊಂಡು ಕಾರಿನ ಮುಂದೆ ವಾಹನ ನಿಲ್ಲಿಸಿ ಗಲಾಟೆ ನಡೆಸಿದ್ದಾನೆ ಎನ್ನಲಾಗಿದೆ.

ಘಟನೆಯ ವೇಳೆ ತಾಯಿ ಹಾಗೂ ತಾತ ಕೂಡ ಸ್ಥಳಕ್ಕೆ ಆಗಮಿಸಿದ್ದು, ಮಾತಿನ ಚಕಮಕಿ ನಡೆದಿರುವ ದೃಶ್ಯಗಳು ವಿಡಿಯೋದಲ್ಲಿ ದಾಖಲಾಗಿವೆ. ಈ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗುತ್ತಿದ್ದಂತೆ ಸಾರ್ವಜನಿಕರಿಂದ ತೀವ್ರ ಆಕ್ರೋಶ ವ್ಯಕ್ತವಾಗಿತ್ತು.

ನಂತರ ನ್ಯಾಯಾಧೀಶೆ ಗಾಯತ್ರಿ ಅವರು ಮಾಲೂರು ಪೊಲೀಸ್ ಠಾಣೆಯಲ್ಲಿ ಅಧಿಕೃತ ದೂರು ದಾಖಲಿಸಿದ್ದರು. ದೂರಿನ ಆಧಾರದ ಮೇಲೆ ಸರ್ಕಾರಿ ಕರ್ತವ್ಯಕ್ಕೆ ಅಡ್ಡಿಪಡಿಸಿದ ಆರೋಪ, ನ್ಯಾಯಾಧೀಶರ ಕೆಲಸಕ್ಕೆ ಅಡ್ಡಿ, ಸಂಚಾರ ನಿಯಮ ಉಲ್ಲಂಘನೆ, ವಾಹನಕ್ಕೆ ಹಾನಿ ಉಂಟುಮಾಡಲು ಯತ್ನ ಹಾಗೂ ಅಸಭ್ಯ ವರ್ತನೆ ಸೇರಿದಂತೆ ವಿವಿಧ ಆರೋಪಗಳಡಿ ಪ್ರಕರಣ ದಾಖಲಿಸಲಾಗಿದೆ.

ತನಿಖೆ ನಡೆಸಿದ ಮಾಲೂರು ಪೊಲೀಸರು ವಿನಯ್, ಕವಿತಾ ಹಾಗೂ ವೆಂಕಟೇಶ್ ಅವರನ್ನು ಬಂಧಿಸಿ ನ್ಯಾಯಾಲಯದ ಮುಂದೆ ಹಾಜರುಪಡಿಸಿದ್ದಾರೆ. ಜೊತೆಗೆ ಹೆಲ್ಮೆಟ್ ಧರಿಸದೆ ವಾಹನ ಚಲಾಯಿಸಿದ ಹಿನ್ನೆಲೆಯಲ್ಲಿ ಬೈಕ್ ಸವಾರ ವಿನಯ್‌ಗೆ ₹6,000 ದಂಡ ವಿಧಿಸಲಾಗಿದೆ.

ಈ ಘಟನೆ ಮತ್ತೆ ರಸ್ತೆ ಸುರಕ್ಷತೆ ಮತ್ತು ಸಂಚಾರ ನಿಯಮ ಪಾಲನೆಯ ಮಹತ್ವವನ್ನು ನೆನಪಿಸಿದ್ದು, ಸಾರ್ವಜನಿಕ ಸೇವೆಯಲ್ಲಿರುವ ಅಧಿಕಾರಿಗಳ ಕರ್ತವ್ಯಕ್ಕೆ ಅಡ್ಡಿಪಡಿಸಿದರೆ ಕಠಿಣ ಕಾನೂನು ಕ್ರಮ ಎದುರಿಸಬೇಕಾಗುತ್ತದೆ ಎಂಬ ಸಂದೇಶವನ್ನೂ ನೀಡಿದೆ.

ಧಾರವಾಡ: ಹುಬ್ಬಳ್ಳಿ-ಧಾರವಾಡ (Hubballi-Dharwad) ಅವಳಿ ನಗರಗಳಲ್ಲಿ ದಿನದಿಂದ ದಿನಕ್ಕೆ ಹೆಚ್ಚುತ್ತಿರುವ ಬೀದಿ ನಾಯಿಗಳ (Stray Dog) ಹಾವಳಿಗೆ ಕಡಿವಾಣ ಹಾಕಲು ಯೋಜಿಸಲಾಗಿದ್ದ ಬೃಹತ್ ಪ್ರಾಣಿ ಜನನ ನಿಯಂತ್ರಣ (Animal Birth Control – ABC) ಅಭಿಯಾನ ಮತ್ತೊಮ್ಮೆ ವಿಳಂಬವಾಗಿದೆ. ಅಭಿಯಾನಕ್ಕೆ ಅಗತ್ಯವಿರುವ ಪರಿಣಿತ ಶ್ವಾನ ಸೆರೆಹಿಡಿಯುವ ಸಿಬ್ಬಂದಿ ಅಸ್ಸಾಂನಿಂದ ಇನ್ನೂ ಆಗಮಿಸದಿರುವುದರಿಂದ, ಹುಬ್ಬಳ್ಳಿ-ಧಾರವಾಡ ಮಹಾನಗರ ಪಾಲಿಕೆ ಕಾರ್ಯಾಚರಣೆ ಆರಂಭಿಸಲು ಕಾಯುತ್ತಿದೆ.

25 ಸಾವಿರಕ್ಕೂ ಹೆಚ್ಚು ಬೀದಿ ನಾಯಿಗಳು

ಪಾಲಿಕೆಯ ಅಂದಾಜಿನ ಪ್ರಕಾರ, ಅವಳಿ ನಗರಗಳಲ್ಲಿ 25,000ಕ್ಕೂ ಹೆಚ್ಚು ಬೀದಿ ನಾಯಿಗಳು ಇವೆ. ಇವುಗಳ ಸಂಖ್ಯೆಯನ್ನು ನಿಯಂತ್ರಿಸುವ ಉದ್ದೇಶದಿಂದ ಮೊದಲ ಹಂತದಲ್ಲಿ ಸುಮಾರು 12,000 ನಾಯಿಗಳಿಗೆ ಸಂತಾನಶಕ್ತಿ ಹರಣ (Sterilisation) ಚಿಕಿತ್ಸೆ ನೀಡಲು ಯೋಜನೆ ರೂಪಿಸಲಾಗಿದೆ.

ಈ ಮಹತ್ವಾಕಾಂಕ್ಷಿ ಯೋಜನೆಗಾಗಿ ₹1.98 ಕೋಟಿ ವೆಚ್ಚದ ಟೆಂಡರ್ ನೀಡಲಾಗಿದ್ದು, ಕಾರ್ಯಾಚರಣೆಗೆ ಅಗತ್ಯವಿರುವ ಮೂಲಸೌಕರ್ಯವನ್ನೂ ಸಿದ್ಧಪಡಿಸಲಾಗಿದೆ.

ಹೊಸ ಕೇಂದ್ರ ಸಿದ್ಧ… ಸಿಬ್ಬಂದಿಗಾಗಿ ಕಾಯುವಿಕೆ

ಶಿವಳ್ಳಿ ಸಮೀಪ ₹98 ಲಕ್ಷ ವೆಚ್ಚದಲ್ಲಿ ಅತ್ಯಾಧುನಿಕ ಸಂತಾನಶಕ್ತಿ ಹರಣ ಕೇಂದ್ರ ನಿರ್ಮಿಸಲಾಗಿದೆ. ಆರಂಭದಲ್ಲಿ ನೀರಿನ ಸಂಪರ್ಕ ಹಾಗೂ ನಾಯಿ ಸಾಗಣೆಗೆ ಅಗತ್ಯವಿದ್ದ ವಿಶೇಷ ವಾಹನಗಳ ಕೊರತೆಯಿಂದ ಯೋಜನೆ ವಿಳಂಬವಾಗಿತ್ತು.

ಈ ತಾಂತ್ರಿಕ ಸಮಸ್ಯೆಗಳು ಈಗ ನಿವಾರಣೆಯಾಗಿದ್ದರೂ, ಅಸ್ಸಾಂನಲ್ಲಿ ಹಬ್ಬದ ಹಿನ್ನೆಲೆ ಅಲ್ಲಿಂದ ಬರಬೇಕಿದ್ದ 25 ಮಂದಿ ಪರಿಣಿತ ಶ್ವಾನ ಸೆರೆಹಿಡಿಯುವ ಸಿಬ್ಬಂದಿ ಇನ್ನೂ ಆಗಮಿಸಿಲ್ಲ. ಇದರಿಂದ ಅಭಿಯಾನ ಆರಂಭಕ್ಕೆ ಮತ್ತೆ ವಿಳಂಬವಾಗಿದೆ.

ಒಂದು ವಾರದಲ್ಲಿ ಆರಂಭವಾಗುವ ನಿರೀಕ್ಷೆ

ಈ ಕುರಿತು ಪ್ರತಿಕ್ರಿಯಿಸಿದ ಹುಬ್ಬಳ್ಳಿ-ಧಾರವಾಡ ಮಹಾನಗರ ಪಾಲಿಕೆಯ ಅಭಿವೃದ್ಧಿ ಆಯುಕ್ತ ವಿಜಯಕುಮಾರ್ ಆರ್, ಅಸ್ಸಾಂ ಮೂಲದ ಸಿಬ್ಬಂದಿ ಇನ್ನೊಂದು ವಾರದಲ್ಲಿ ಆಗಮಿಸುವ ನಿರೀಕ್ಷೆಯಿದ್ದು, ಅವರು ಬಂದ ಕೂಡಲೇ ಬೃಹತ್ ಕಾರ್ಯಾಚರಣೆಗೆ ಚಾಲನೆ ನೀಡಲಾಗುವುದು ಎಂದು ತಿಳಿಸಿದ್ದಾರೆ.

ಹೊಸ ಕೇಂದ್ರದಲ್ಲಿ ದಿನಕ್ಕೆ 160 ನಾಯಿಗಳಿಗೆ ಚಿಕಿತ್ಸೆ

ಪ್ರಸ್ತುತ ಸಾಲಕಿನಕೊಪ್ಪದಲ್ಲಿರುವ ಹಳೆಯ ಕೇಂದ್ರದಲ್ಲಿ ದಿನಕ್ಕೆ ಕೇವಲ 15 ರಿಂದ 20 ನಾಯಿಗಳಿಗೆ ಮಾತ್ರ ಚಿಕಿತ್ಸೆ ನೀಡಲಾಗುತ್ತಿದೆ.

ಆದರೆ ಹೊಸ ಶಿವಳ್ಳಿ ಕೇಂದ್ರ ಕಾರ್ಯಾರಂಭ ಮಾಡಿದ ಬಳಿಕ ಒಂದೇ ದಿನದಲ್ಲಿ ಸುಮಾರು 160 ನಾಯಿಗಳಿಗೆ ಸಂತಾನಶಕ್ತಿ ಹರಣ ಚಿಕಿತ್ಸೆ ನೀಡುವ ಸಾಮರ್ಥ್ಯ ಲಭ್ಯವಾಗಲಿದೆ. ಇದರಿಂದ ಅಭಿಯಾನವನ್ನು ವೇಗವಾಗಿ ಪೂರ್ಣಗೊಳಿಸಲು ಸಾಧ್ಯವಾಗಲಿದೆ.

ನಾಯಿಗಳ ಆಶ್ರಯ ತಾಣಕ್ಕೂ ಯೋಜನೆ

ಇದರ ಜೊತೆಗೆ, ಸುಪ್ರೀಂ ಕೋರ್ಟ್ ನಿರ್ದೇಶನದಂತೆ ಶಾಲೆಗಳು, ಆಸ್ಪತ್ರೆಗಳು ಹಾಗೂ ಸಾರ್ವಜನಿಕ ಸಂಸ್ಥೆಗಳ ಆವರಣದಲ್ಲಿರುವ ಬೀದಿ ನಾಯಿಗಳನ್ನು ಸ್ಥಳಾಂತರಿಸಲು ಶಿವಳ್ಳಿಯಲ್ಲಿ ₹2.57 ಕೋಟಿ ವೆಚ್ಚದಲ್ಲಿ ಪ್ರತ್ಯೇಕ ನಾಯಿಗಳ ಆಶ್ರಯ ತಾಣ ನಿರ್ಮಿಸಲು ಪಾಲಿಕೆ ಟೆಂಡರ್ ಪ್ರಕ್ರಿಯೆ ಆರಂಭಿಸಿದೆ.

ಈ ಯೋಜನೆ ಪೂರ್ಣಗೊಂಡ ಬಳಿಕ ಬೀದಿ ನಾಯಿಗಳ ಸಂಖ್ಯೆಯನ್ನು ವೈಜ್ಞಾನಿಕವಾಗಿ ನಿಯಂತ್ರಿಸುವುದರ ಜೊತೆಗೆ ಸಾರ್ವಜನಿಕರ ಸುರಕ್ಷತೆ ಹಾಗೂ ಪ್ರಾಣಿಗಳ ಕಲ್ಯಾಣ ಎರಡನ್ನೂ ಸಮತೋಲನದಲ್ಲಿಡುವ ಉದ್ದೇಶವನ್ನು ಪಾಲಿಕೆ ಹೊಂದಿದೆ.

ಬೆಂಗಳೂರು: ದೇಶದ ಐಟಿ ರಾಜಧಾನಿ, Silicon City ಎಂದು ಹೆಸರಾದ ಬೆಂಗಳೂರಿನ ಸಾರ್ವಜನಿಕ ಶೌಚಾಲಯಗಳ (Public Toilets) ಸ್ಥಿತಿ ಆತಂಕಕಾರಿ ಎಂಬ ಅಂಶ ಬೆಂಗಳೂರು ಪಬ್ಲಿಕ್ ಟಾಯ್ಲೆಟ್ ಆಡಿಟ್ ವರದಿ–2026 (Bengaluru Public Toilet Audit Report 2026) ಮೂಲಕ ಬಹಿರಂಗವಾಗಿದೆ. ನಗರದ ಸಾರ್ವಜನಿಕ ಸ್ವಚ್ಛತಾ ವ್ಯವಸ್ಥೆಯ ಕುರಿತು ಬೆಂಗಳೂರು ಪಾಲಿಟಿಕಲ್ ಆಕ್ಷನ್ ಕಮಿಟಿ (B.PAC) ನಡೆಸಿದ ನಾಗರಿಕರ ಸಮೀಕ್ಷೆಯಲ್ಲಿ, ಪರಿಶೀಲಿಸಲಾದ ಶೌಚಾಲಯಗಳಲ್ಲಿ ಪ್ರತಿ ನಾಲ್ಕರಲ್ಲಿ ಒಂದಕ್ಕಿಂತ ಹೆಚ್ಚು ಸಂಪೂರ್ಣ ಕಾರ್ಯನಿರ್ವಹಿಸದ ಸ್ಥಿತಿಯಲ್ಲಿವೆ ಎಂಬುದು ಬೆಳಕಿಗೆ ಬಂದಿದೆ.

142 ಶೌಚಾಲಯಗಳ ಪರಿಶೀಲನೆ

ಈ ವರ್ಷದ ಏಪ್ರಿಲ್ ಮತ್ತು ಮೇ ತಿಂಗಳಲ್ಲಿ, ಗ್ರೇಟರ್ ಬೆಂಗಳೂರು ಪ್ರಾಧಿಕಾರ (GBA) ವ್ಯಾಪ್ತಿಯ 142 ಸಾರ್ವಜನಿಕ ಶೌಚಾಲಯಗಳನ್ನು ಪರಿಶೀಲಿಸಲಾಯಿತು. ಶೌಚಾಲಯಗಳ ಕಾರ್ಯಕ್ಷಮತೆ, ಸ್ವಚ್ಛತೆ, ಸುರಕ್ಷತೆ, ಪ್ರವೇಶ ವ್ಯವಸ್ಥೆ ಹಾಗೂ ಬಳಕೆದಾರರ ಅನುಭವದ ಆಧಾರದ ಮೇಲೆ ಸಮೀಕ್ಷೆ ನಡೆಸಲಾಗಿದೆ.

26% ಶೌಚಾಲಯಗಳು ಸಂಪೂರ್ಣ ಬಂದ್

ವರದಿಯ ಪ್ರಕಾರ, ಪರಿಶೀಲಿಸಿದ 142 ಶೌಚಾಲಯಗಳಲ್ಲಿ 37 (26%) ಶೌಚಾಲಯಗಳು ಸಂಪೂರ್ಣ ಕಾರ್ಯನಿರ್ವಹಿಸದ ಸ್ಥಿತಿಯಲ್ಲಿದ್ದವು.

ಇನ್ನೂ ಆತಂಕಕಾರಿ ಅಂಶವೆಂದರೆ, ಕೇವಲ 6 ಶೌಚಾಲಯಗಳು (4.2%) ಮಾತ್ರ ಅತ್ಯಂತ ಸ್ವಚ್ಛವಾಗಿವೆ ಎಂದು ವರದಿ ಹೇಳಿದೆ. ಉಳಿದ ಬಹುತೇಕ ಶೌಚಾಲಯಗಳಲ್ಲಿ ಅಸ್ವಚ್ಛತೆ, ದುರ್ವಾಸನೆ ಹಾಗೂ ನಿರ್ವಹಣೆಯ ಕೊರತೆ ಕಂಡುಬಂದಿದೆ.

58% ಶೌಚಾಲಯಗಳಲ್ಲಿ ನಿರಂತರ ದುರ್ವಾಸನೆ ಕಂಡುಬಂದಿರುವುದಾಗಿ ಸಮೀಕ್ಷೆ ತಿಳಿಸಿದೆ.

ಮಹಿಳೆಯರ ಸುರಕ್ಷತೆಗೆ ಪ್ರಶ್ನೆ

ಸಾರ್ವಜನಿಕ ಶೌಚಾಲಯಗಳ ಸುರಕ್ಷತೆಯೂ ಗಂಭೀರ ಸಮಸ್ಯೆಯಾಗಿದೆ. ಕೇವಲ 56% ಶೌಚಾಲಯಗಳಲ್ಲಿ ಮಾತ್ರ ಸಮರ್ಪಕ ಬೆಳಕಿನ ವ್ಯವಸ್ಥೆ ಇದ್ದು, ಉಳಿದ ಕಡೆಗಳಲ್ಲಿ ಸಂಜೆ ಮತ್ತು ರಾತ್ರಿ ವೇಳೆಯಲ್ಲಿ ಮಹಿಳೆಯರು ಸುರಕ್ಷಿತವಾಗಿ ಬಳಸಲು ಸಾಧ್ಯವಾಗದ ಪರಿಸ್ಥಿತಿ ಇದೆ ಎಂದು ವರದಿ ಉಲ್ಲೇಖಿಸಿದೆ.

ದಿವ್ಯಾಂಗರಿಗೆ ಬಹುತೇಕ ಪ್ರವೇಶವೇ ಇಲ್ಲ

ದಿವ್ಯಾಂಗರ ಅನುಕೂಲದ ದೃಷ್ಟಿಯಿಂದಲೂ ಪರಿಸ್ಥಿತಿ ನಿರಾಶಾದಾಯಕವಾಗಿದೆ.

ಪರಿಶೀಲಿಸಿದ ಶೌಚಾಲಯಗಳಲ್ಲಿ ಕೇವಲ 9 ಶೌಚಾಲಯಗಳಲ್ಲಿ ಮಾತ್ರ ರ್ಯಾಂಪ್ ವ್ಯವಸ್ಥೆ ಇತ್ತು. ಅಂದರೆ ಸುಮಾರು 94% ಶೌಚಾಲಯಗಳು ದಿವ್ಯಾಂಗರಿಗೆ ಪ್ರವೇಶಯೋಗ್ಯವಾಗಿಲ್ಲ.

ಇದಲ್ಲದೆ, ಕಾರ್ಯನಿರ್ವಹಿಸುತ್ತಿರುವ ಶೌಚಾಲಯಗಳಲ್ಲಿಯೂ ಸುಮಾರು 40% ಕಡೆ ಮಾತ್ರ ನೀರಿನ ಸೌಲಭ್ಯ ಇತ್ತು. ಸಾಬೂನು ಡಿಸ್ಪೆನ್ಸರ್ ಹಾಗೂ ಕಸದ ಬುಟ್ಟಿಗಳು ಒಂದೇ ಶೌಚಾಲಯದಲ್ಲೂ ಇರಲಿಲ್ಲ ಎಂಬುದು ವರದಿಯ ಪ್ರಮುಖ ಅಂಶವಾಗಿದೆ.

ಸಿಬ್ಬಂದಿ ಮತ್ತು ಪಾರದರ್ಶಕತೆ ಕೊರತೆ

ಸಮೀಕ್ಷೆಯ ಪ್ರಕಾರ, ಕೇವಲ 15% ನಿರ್ವಾಹಕರು ಮಾತ್ರ ಮಹಿಳೆಯರು. ಜೊತೆಗೆ, ಶೌಚಾಲಯ ನಿರ್ವಹಣೆಯ ಗುತ್ತಿಗೆದಾರರ ಮಾಹಿತಿ ಹಾಗೂ ಬಳಕೆ ಶುಲ್ಕದ ವಿವರಗಳು ಬಹುತೇಕ ಕಡೆಗಳಲ್ಲಿ ಪ್ರದರ್ಶಿಸದ ಕಾರಣ ಪಾರದರ್ಶಕತೆಯ ಕೊರತೆ ಕಂಡುಬಂದಿದೆ.

ಬೆಂಗಳೂರುಗೆ ಇನ್ನೂ 1,000ಕ್ಕೂ ಹೆಚ್ಚು ಶೌಚಾಲಯಗಳ ಅಗತ್ಯ

ಬೆಂಗಳೂರು ನಗರದ ಜನಸಂಖ್ಯೆ 1.4 ಕೋಟಿಗೂ ಅಧಿಕ ಇದ್ದರೂ, ನಗರದಲ್ಲಿ ಸುಮಾರು 800 ರಿಂದ 900 ಸಾರ್ವಜನಿಕ ಶೌಚಾಲಯಗಳು ಮಾತ್ರ ಲಭ್ಯವಿವೆ. GBA ದಾಖಲೆಯ ಪ್ರಕಾರ 479 ಶೌಚಾಲಯಗಳು ಅಧಿಕೃತ ಪಟ್ಟಿಯಲ್ಲಿದ್ದು, ಸರಾಸರಿ 25,000 ರಿಂದ 30,000 ಜನರಿಗೆ ಒಂದು ಸಾರ್ವಜನಿಕ ಶೌಚಾಲಯ ಮಾತ್ರ ಲಭ್ಯವಾಗುತ್ತಿದೆ.

B.PAC ನೀಡಿದ ಪ್ರಮುಖ ಶಿಫಾರಸುಗಳು

ವರದಿಯಲ್ಲಿ B.PAC ಕೆಲವು ಮಹತ್ವದ ಸಲಹೆಗಳನ್ನು ನೀಡಿದೆ.

• 30 ದಿನಗಳ ತುರ್ತು ದುರಸ್ತಿ ಅಭಿಯಾನ ನಡೆಸಿ ಕಾರ್ಯನಿರ್ವಹಿಸದ ಎಲ್ಲಾ ಶೌಚಾಲಯಗಳನ್ನು ಪುನಃ ಆರಂಭಿಸಬೇಕು.
• GBA ಅಡಿಯಲ್ಲಿ ಪ್ರತ್ಯೇಕ Public Toilet Management Cell ಸ್ಥಾಪಿಸಬೇಕು.
• ಕೇವಲ ನಿರ್ಮಾಣ ಗುತ್ತಿಗೆಯ ಬದಲು 5 ವರ್ಷಗಳ Operate & Maintain (O&M) ಒಪ್ಪಂದ ಜಾರಿಗೆ ತರಬೇಕು.
• ನಗರಕ್ಕೆ 1,000ಕ್ಕೂ ಹೆಚ್ಚು ಹೊಸ ಆಧುನಿಕ ಸಾರ್ವಜನಿಕ ಶೌಚಾಲಯಗಳನ್ನು ಸರ್ಕಾರ ಹಾಗೂ Public-Private Partnership (PPP) ಮಾದರಿಯಲ್ಲಿ ನಿರ್ಮಿಸಬೇಕು.

B.PAC CEO ಹೇಳಿದ್ದೇನು?

B.PAC ಮುಖ್ಯ ಕಾರ್ಯನಿರ್ವಾಹಕ ಅಧಿಕಾರಿ ರೇವತಿ ಅಶೋಕ್ ಮಾತನಾಡಿ, “ಸಾರ್ವಜನಿಕ ಶೌಚಾಲಯಗಳು ಕೇವಲ ಸೌಲಭ್ಯವಲ್ಲ; ಅವು ಸಾರ್ವಜನಿಕ ಆರೋಗ್ಯ, ಮಹಿಳೆಯರ ಸುರಕ್ಷತೆ ಮತ್ತು ಮಾನವ ಘನತೆಗೆ ನೇರವಾಗಿ ಸಂಬಂಧಿಸಿದ ಮೂಲಭೂತ ನಾಗರಿಕ ಸೌಲಭ್ಯಗಳಾಗಿವೆ. ಜಾಗತಿಕ ನಗರವಾಗಿರುವ ಬೆಂಗಳೂರು ಇಂತಹ ಮೂಲಸೌಕರ್ಯವನ್ನು ನಿರ್ಲಕ್ಷಿಸಲು ಸಾಧ್ಯವಿಲ್ಲ” ಎಂದು ಹೇಳಿದ್ದಾರೆ.