ಬೆಂಗಳೂರು: ರಾಕಿಂಗ್ ಸ್ಟಾರ್ Yash ಅಭಿನಯದ ಬಹುನಿರೀಕ್ಷಿತ ‘Toxic’ ಚಿತ್ರದ ಟ್ರೈಲರ್ ಲಾಂಚ್ ಕಾರ್ಯಕ್ರಮ ಭರ್ಜರಿ ಸದ್ದು ಮಾಡಿದೆ. ಬೆಂಗಳೂರಿನಲ್ಲಿ ನಡೆದ ಕಾರ್ಯಕ್ರಮದಲ್ಲಿ ಲೇಡಿ ಸೂಪರ್‌ಸ್ಟಾರ್ ನಯನತಾರಾ, ಕಿಯಾರಾ ಅಡ್ವಾಣಿ, ಹುಮಾ ಖುರೇಷಿ, ತಾರಾ ಸುತಾರಿಯಾ ಸೇರಿದಂತೆ ಹಲವು ತಾರೆಯರು ಭಾಗವಹಿಸಿ ಯಶ್ ಹಾಗೂ ಚಿತ್ರತಂಡದ ಪರಿಶ್ರಮವನ್ನು ಕೊಂಡಾಡಿದರು.

ಟಾಕ್ಸಿಕ್ ಸಿನಿಮಾದ ಪ್ರಮೋಷನ್ ಕಾರ್ಯಕ್ರಮಗಳಿಗೆ ಸಾಮಾನ್ಯವಾಗಿ ಹಾಜರಾಗದ ನಯನತಾರಾ, ಈ ಬಾರಿ ವಿಶೇಷವಾಗಿ ಚೆನ್ನೈನಿಂದ ಬೆಂಗಳೂರಿಗೆ ಆಗಮಿಸಿರುವುದು ಕಾರ್ಯಕ್ರಮದ ಪ್ರಮುಖ ಹೈಲೈಟ್ ಆಗಿತ್ತು. ಯಶ್‌ಗಾಗಿ ಹಾಗೂ ಟಾಕ್ಸಿಕ್ ಸಿನಿಮಾಗಾಗಿ ಬಂದಿರುವುದಾಗಿ ಹೇಳಿದ ನಯನತಾರಾ, ರಾಕಿಂಗ್ ಸ್ಟಾರ್‌ರನ್ನು ವೇದಿಕೆಯಲ್ಲೇ ಮನಸಾರೆ ಹೊಗಳಿದರು.

‘ರಾಕಿಭಾಯ್’ ಎಂದು ಯಶ್‌ರನ್ನು ಕೊಂಡಾಡಿದ ನಯನತಾರಾ

ಮೊದಲ ಬಾರಿಗೆ ಯಶ್ ಅವರನ್ನು ಭೇಟಿಯಾದಾಗಲೇ ಅವರಲ್ಲಿರುವ ವಿಭಿನ್ನ ವ್ಯಕ್ತಿತ್ವ ಗಮನಕ್ಕೆ ಬಂದಿತ್ತು ಎಂದು ನಯನತಾರಾ ಹೇಳಿದ್ದಾರೆ.

ಯಶ್‌ರಂತಹ ಕಠಿಣ ಪರಿಶ್ರಮದ ನಟರನ್ನು ತಮ್ಮ ವೃತ್ತಿಜೀವನದಲ್ಲಿ ನೋಡಿಲ್ಲ ಎಂದು ಹೇಳಿದ ಅವರು, ಟಾಕ್ಸಿಕ್ ಸಿನಿಮಾಗಾಗಿ ಯಶ್ ಸುಮಾರು ನಾಲ್ಕೂವರೆ ವರ್ಷ ತ್ಯಾಗ ಮಾಡಿದ್ದಾರೆ ಎಂಬುದು ತಮ್ಮನ್ನು ಅಚ್ಚರಿಗೊಳಿಸಿದೆ ಎಂದರು.

ಕುಟುಂಬ ಹಾಗೂ ಮಕ್ಕಳಿಗೆ ಸಮಯ ನೀಡುವುದರ ಜೊತೆಗೆ ಸಿನಿಮಾಗಾಗಿ ಯಶ್ ನೀಡಿರುವ ಸಮರ್ಪಣೆಯನ್ನು ನಯನತಾರಾ ಶ್ಲಾಘಿಸಿದರು.

“ಯಶ್ ಒಬ್ಬ ಪಕ್ಕಾ ಫ್ಯಾಮಿಲಿ ಮ್ಯಾನ್. ಅವರ ಬಗ್ಗೆ ನನಗೆ ಅಪಾರ ಗೌರವ ಮತ್ತು ಪ್ರೀತಿ ಇದೆ” ಎಂದು ಅವರು ಹೇಳಿದರು.

‘ಯಶ್‌ರ ದೊಡ್ಡ ಶಕ್ತಿ ರಾಧಿಕಾ ಪಂಡಿತ್’

ಯಶ್ ಅವರ ಯಶಸ್ಸಿನ ಹಿಂದೆ ಪತ್ನಿ ರಾಧಿಕಾ ಪಂಡಿತ್ ಅವರ ಪಾತ್ರವನ್ನೂ ನಯನತಾರಾ ವಿಶೇಷವಾಗಿ ಉಲ್ಲೇಖಿಸಿದರು.

ಹೆಣ್ಣುಮಕ್ಕಳು ಮತ್ತು ಮಹಿಳೆಯರು ಮಾಡುವ ತ್ಯಾಗದ ಬಗ್ಗೆ ಸಾಕಷ್ಟು ಬಾರಿ ಯಾರೂ ಮಾತನಾಡುವುದಿಲ್ಲ ಎಂದು ಹೇಳಿದ ನಯನತಾರಾ, ರಾಧಿಕಾ ಪಂಡಿತ್ ಅವರೇ ಯಶ್ ಅವರ ದೊಡ್ಡ ಶಕ್ತಿ ಎಂದು ಮೆಚ್ಚುಗೆ ವ್ಯಕ್ತಪಡಿಸಿದರು.

‘ಯಶ್-ಗೀತು ಮ್ಯಾನಿಫೆಸ್ಟ್ ಮಾಡಿದ ಸಿನಿಮಾ’ ಎಂದ ಕಿಯಾರಾ

ಟಾಕ್ಸಿಕ್ ಸಿನಿಮಾದ ಮತ್ತೊಂದು ಪ್ರಮುಖ ತಾರೆ ಕಿಯಾರಾ ಅಡ್ವಾಣಿ, ಯಶ್ ಹಾಗೂ ನಿರ್ದೇಶಕಿ ಗೀತು ಮೋಹನ್‌ದಾಸ್ ಅವರ ಕನಸು ಮತ್ತು ದೃಷ್ಟಿಕೋನದಿಂದ ರೂಪುಗೊಂಡ ಚಿತ್ರವೇ ಟಾಕ್ಸಿಕ್ ಎಂದು ಹೇಳಿದ್ದಾರೆ.

ಟಾಕ್ಸಿಕ್ ಒಂದು ಮ್ಯಾಜಿಕ್ ಇದ್ದಂತೆ. ಅದನ್ನು ಪದಗಳಲ್ಲಿ ವಿವರಿಸಲು ಸಾಧ್ಯವಿಲ್ಲ ಎಂದು ಹೇಳಿದ ಕಿಯಾರಾ, ಚಿತ್ರದ ತಾಂತ್ರಿಕ ತಂಡದ ಪರಿಶ್ರಮವನ್ನೂ ಶ್ಲಾಘಿಸಿದರು.

ಕನ್ನಡದಲ್ಲಿ ಮಾತನಾಡಿ ಭಾವುಕರಾದ ಗೀತು ಮೋಹನ್‌ದಾಸ್

ಟಾಕ್ಸಿಕ್ ನಿರ್ದೇಶಕಿ ಗೀತು ಮೋಹನ್‌ದಾಸ್ ಕಾರ್ಯಕ್ರಮದಲ್ಲಿ ಕನ್ನಡದಲ್ಲೇ ಮಾತನಾಡಿ ಗಮನ ಸೆಳೆದರು. ತಾಯಿಗೆ ಧನ್ಯವಾದ ಹೇಳುವ ಮೂಲಕ ಮಾತು ಆರಂಭಿಸಿದ ಗೀತು, ಯಶ್ ಕೇವಲ ನಿರ್ಮಾಪಕ, ನಟ ಅಥವಾ ಬರಹಗಾರ ಮಾತ್ರವಲ್ಲ, ಒಂದು ಭಾವನೆ ಎಂದು ಬಣ್ಣಿಸಿದರು.

ತಮ್ಮ ಮೇಲೆ ಹಲವರು ಅನುಮಾನ ವ್ಯಕ್ತಪಡಿಸಿದ್ದಾಗ ಯಶ್ ಅವಕಾಶ ನೀಡಿ, ತಮ್ಮ ಕನಸನ್ನು ಬೆಂಬಲಿಸಿದರು ಎಂದು ಗೀತು ಹೇಳಿದರು.

“ಯಶ್ ನನ್ನ ಕನಸನ್ನು ತನ್ನ ಹೆಗಲ ಮೇಲೆ ಹೊತ್ತಿದ್ದಾರೆ. ನನ್ನ ಮೇಲೆ ಇಟ್ಟಿರುವ ನಂಬಿಕೆಯನ್ನು ಉಳಿಸಿಕೊಳ್ಳುತ್ತೇನೆ” ಎಂದು ಹೇಳುವಾಗ ಗೀತು ಭಾವುಕರಾದರು.

ರಾಧಿಕಾ ಪಂಡಿತ್‌ಗೆ ‘ಐ ಲವ್ ಯೂ’ ಎಂದ ರುಕ್ಮಿಣಿ

ನಟಿ ರುಕ್ಮಿಣಿ ವಸಂತ್ ಕೂಡ ಕಾರ್ಯಕ್ರಮದಲ್ಲಿ ತಮ್ಮ ಅಭಿಮಾನವನ್ನು ಬಹಿರಂಗಪಡಿಸಿದರು. ಟಾಕ್ಸಿಕ್ ಪ್ರಮೋಷನ್‌ನ ಮೊದಲ ಹೆಜ್ಜೆ ಇಟ್ಟಿರುವುದಕ್ಕೆ ಸಂತೋಷ ಹಾಗೂ ಹೆಮ್ಮೆ ಇದೆ ಎಂದು ಹೇಳಿದ ಅವರು, ಯಶ್ ಬಗ್ಗೆ ಹೇಳಲು ಸಾಕಷ್ಟು ವಿಷಯಗಳಿವೆ ಎಂದರು.

ಆದರೆ, “ರಾಧಿಕಾ, ನಿಮ್ಮ ದೊಡ್ಡ ಅಭಿಮಾನಿ ನಾನು. ಐ ಲವ್ ಯೂ” ಎಂದು ವೇದಿಕೆಯಲ್ಲೇ ಹೇಳಿ ಗಮನ ಸೆಳೆದರು.

ಹುಮಾ ಖುರೇಷಿ, ತಾರಾ ಸುತಾರಿಯಾ ಮಾತಿನಲ್ಲೂ ಯಶ್ ಗುಣಗಾನ

ಬಾಲಿವುಡ್ ನಟಿ ಹುಮಾ ಖುರೇಷಿ ಬೆಂಗಳೂರಿಗೆ ಕನ್ನಡದಲ್ಲೇ ನಮಸ್ಕಾರ ಹೇಳಿ ಮಾತು ಆರಂಭಿಸಿದರು. ಟಾಕ್ಸಿಕ್ ಸಿನಿಮಾದಲ್ಲಿನ ತಮ್ಮ ಪಾತ್ರ ಎಲಿಜಬೆತ್‌ಗೆ ಬೆಂಗಳೂರು ತುಂಬಾ ಇಷ್ಟ ಎಂದು ಹೇಳಿದ ಅವರು, ಯಶ್ ಅವರ ವ್ಯಕ್ತಿತ್ವವನ್ನು ಕೊಂಡಾಡಿದರು.

ತಾರಾ ಸುತಾರಿಯಾ ಟಾಕ್ಸಿಕ್ ಒಂದು ಸಾಮೂಹಿಕ ದೃಷ್ಟಿಕೋನದಿಂದ ರೂಪುಗೊಂಡ ಸಿನಿಮಾ ಎಂದು ಹೇಳಿ ಇಡೀ ಚಿತ್ರತಂಡದ ಪರಿಶ್ರಮವನ್ನು ಮೆಚ್ಚಿಕೊಂಡರು.

ಬಾಲಿವುಡ್ ನಟ ಅಕ್ಷಯ್ ಒಬೆರಾಯ್ ಕೂಡ ಟ್ರೈಲರ್ ನೋಡಿ “ಬಾಸ್, ಏನ್ ಟ್ರೈಲರ್ ಇದು?” ಎಂದು ಯಶ್‌ರನ್ನು ಕೊಂಡಾಡಿದರು. ಮಲಯಾಳಂ ನಟ ಸುದೇವ್ ನಾಯರ್ ಟಾಕ್ಸಿಕ್ ತಮ್ಮ ಪಾಲಿಗೆ ಎರಡು ವರ್ಷಗಳ ಕಲಿಕೆಯ ಅನುಭವವಾಗಿತ್ತು ಎಂದು ಹೇಳಿದರು.

ಯಶ್‌ರ ಪರಿಶ್ರಮ ಕೊಂಡಾಡಿದ ನಿರ್ಮಾಪಕ ಕೆವಿಎನ್

ನಿರ್ಮಾಪಕ ಕೆ. ವೆಂಕಟ್ ನಾರಾಯಣ್ (KVN) ಕೂಡ ಯಶ್ ಅವರ ಪರಿಶ್ರಮ ಹಾಗೂ ಸಿನಿಮಾದ ಮೇಲಿನ ಬದ್ಧತೆಯನ್ನು ಮುಕ್ತಕಂಠದಿಂದ ಶ್ಲಾಘಿಸಿದರು.

ಸಿನಿಮಾಸಕ್ತರ ಕನಸುಗಳನ್ನು ನನಸು ಮಾಡುವಷ್ಟು ದೊಡ್ಡದಾಗಿದೆ ತಮ್ಮ ಜೇಬು ಎಂದು ಹಾಸ್ಯಮಯವಾಗಿ ಹೇಳಿದ ಕೆವಿಎನ್, ಟಾಕ್ಸಿಕ್‌ಗಾಗಿ ಯಶ್ ನೀಡಿರುವ ಶ್ರಮ ಮತ್ತು ಕಮಿಟ್‌ಮೆಂಟ್ ಬಗ್ಗೆ ಮಾತನಾಡಿದರು.

ಟಾಕ್ಸಿಕ್ ನಂತರ KVN Productions ಅನ್ನು ಮೂರು ಪ್ರಮುಖ ತಂಡಗಳಾಗಿ ವಿಂಗಡಿಸುವ ಯೋಜನೆ ಇರುವ ಬಗ್ಗೆಯೂ ಅವರು ಸುಳಿವು ನೀಡಿದರು.

ಟ್ರೈಲರ್ ಲಾಂಚ್ ಕಾರ್ಯಕ್ರಮದಲ್ಲಿ ಯಶ್‌ರ ಮೇಲಿನ ಸಹನಟರು ಮತ್ತು ಚಿತ್ರತಂಡದ ಮೆಚ್ಚುಗೆ ಗಮನ ಸೆಳೆದಿದ್ದು, ‘Toxic’ ಚಿತ್ರದ ಮೇಲಿನ ನಿರೀಕ್ಷೆಯನ್ನು ಮತ್ತಷ್ಟು ಹೆಚ್ಚಿಸಿದೆ.

ಆಗಸ್ಟ್ 26ರಂದು ‘Toxic’ ವಿಶ್ವದಾದ್ಯಂತ ತೆರೆಗೆ ಬರಲು ಸಜ್ಜಾಗಿದ್ದು, ಯಶ್ ಅಭಿಮಾನಿಗಳಲ್ಲಿ ಈಗಾಗಲೇ ಕೌಂಟ್‌ಡೌನ್ ಶುರುವಾಗಿದೆ.

ಬೆಂಗಳೂರು: ರಾಕಿಂಗ್ ಸ್ಟಾರ್ Yash ಅಭಿನಯದ ಬಹುನಿರೀಕ್ಷಿತ ‘Toxic: ಎ ಫೇರಿ ಟೇಲ್ ಫಾರ್ ಗ್ರೋನ್-ಅಪ್ಸ್’ (Toxic Trailer) ಚಿತ್ರದ ಟ್ರೇಲರ್ ಇಂದು ಅದ್ಧೂರಿಯಾಗಿ ಬಿಡುಗಡೆಯಾಗಿದೆ. ನಿರ್ದೇಶಕಿ ಗೀತು ಮೋಹನ್‌ದಾಸ್ ನಿರ್ದೇಶನದ ಈ ಡಾರ್ಕ್ ಹಾಗೂ ಸ್ಟೈಲಿಶ್ ಸಿನಿಮಾದ ಮೊದಲ ಝಲಕ್ ಅಭಿಮಾನಿಗಳಲ್ಲಿ ಚಿತ್ರದ ಮೇಲಿನ ನಿರೀಕ್ಷೆಯನ್ನು ಮತ್ತಷ್ಟು ಹೆಚ್ಚಿಸಿದೆ.

ಬೆಂಗಳೂರಿನಲ್ಲಿ ನಡೆದ ವಿಶೇಷ ಕಾರ್ಯಕ್ರಮದಲ್ಲಿ Toxic Trailer ಅನಾವರಣಗೊಂಡಿದ್ದು, ಯಶ್ ರಾಯ್, ರೂಮಿ ಹಾಗೂ ಟಿಕೆಟ್ ಸೇರಿದಂತೆ ಪ್ರಮುಖ ಪಾತ್ರಗಳ ವಿಭಿನ್ನ ಶೇಡ್‌ಗಳಲ್ಲಿ ಕಾಣಿಸಿಕೊಂಡಿದ್ದಾರೆ.

‘ದಾರಿ ಯಾವುದಾದರೂ ಇರಬಹುದು, ಗುರಿ ಮುಟ್ಟಬೇಕು’

ಟ್ರೇಲರ್ ಬಿಡುಗಡೆ ಕಾರ್ಯಕ್ರಮದಲ್ಲಿ ಮಾತನಾಡಿದ ಯಶ್, ಜೀವನದಲ್ಲಿ ಗುರಿ ಸಾಧಿಸುವುದೇ ಮುಖ್ಯವಾಗಿದ್ದು, ಆ ಹಾದಿಯಲ್ಲಿ ಹೋರಾಟ ಸಹಜ ಎಂದು ಹೇಳಿದ್ದಾರೆ.

“ದಾರಿ ಯಾವುದಾದರೂ ಆಗಬಹುದು, ಗುರಿ ಮುಟ್ಟಬೇಕು. ಆ ದಾರಿಗಳಲ್ಲಿ ಹೋರಾಟ ಇರುತ್ತದೆ. ಹೋರಾಡಿಕೊಂಡೇ ಗುರಿ ಮುಟ್ಟಬೇಕು” ಎಂದು ಯಶ್ ಹೇಳಿದ್ದಾರೆ.

ಈ ಸಂದರ್ಭದಲ್ಲಿ ವರನಟ ಡಾ. ರಾಜ್‌ಕುಮಾರ್ ಅವರ ಸಿನಿಮಾದ ಜನಪ್ರಿಯ ಗೀತೆ ಸಾಲುಗಳನ್ನು ನೆನಪಿಸಿಕೊಂಡ ಯಶ್, ‘ಕಾಲಕ್ಕೆ ತಕ್ಕಂತೆ ನಡೀಬೇಕು, ತಾಳಕ್ಕೆ ತಕ್ಕಂತೆ ಕುಣೀಬೇಕು’ ಎಂದರು.

‘ಕನ್ನಡಿಗರು ತಲೆ ತಗ್ಗಿಸೋಕೆ ನಾವ್ ಬಿಡಲ್ಲ’

ಟಾಕ್ಸಿಕ್ ಚಿತ್ರವು ಇಂದಿನ ಯುವಪೀಳಿಗೆಯ ಮನಸ್ಥಿತಿ ಹಾಗೂ ಅವರಲ್ಲಿರುವ ಗೊಂದಲಗಳನ್ನು ಪ್ರತಿನಿಧಿಸುವ ಸಿನಿಮಾ ಆಗಲಿದೆ ಎಂದು ಯಶ್ ಹೇಳಿದ್ದಾರೆ.

ಚಿತ್ರ ತುಂಬಾ ಆಳವಾದ ವಿಷಯಗಳನ್ನು ಒಳಗೊಂಡಿದ್ದು, ಮನುಷ್ಯರಿಗೆ ಬೇಕಾದಂತಹ ಒಂದು ಅದ್ಭುತ ಸಿನಿಮಾವಾಗಲಿದೆ ಎಂದು ಅವರು ವಿಶ್ವಾಸ ವ್ಯಕ್ತಪಡಿಸಿದರು.

“ಕನ್ನಡಿಗರು ಹೆಮ್ಮೆಯಿಂದ ಹೇಳಬಹುದು. ಕನ್ನಡಿಗರು ತಲೆ ತಗ್ಗಿಸೋಕೆ ನಾವ್ ಬಿಡಲ್ಲ. ತಲೆ ಎತ್ತಿಕೊಂಡೇ ಓಡಾಡುವ ಹಾಗಿರುತ್ತೆ. ಹೆಮ್ಮೆಯಿಂದ ಸಿನಿಮಾ ನೋಡಬಹುದು” ಎಂದು ಯಶ್ ಅಭಿಮಾನಿಗಳಿಗೆ ಭರವಸೆ ನೀಡಿದ್ದಾರೆ.

‘ಟಾಕ್ಸಿಕ್‌ಗಾಗಿ ಸೇರಿರುವುದಕ್ಕೆ ಕಾರಣ ಕರ್ನಾಟಕದ ಜನತೆ’

ಕಾರ್ಯಕ್ರಮದ ಆರಂಭದಲ್ಲೇ ‘ಮೊದಲು ನಾನು ಕನ್ನಡದಲ್ಲೇ ಮಾತನಾಡುತ್ತೀನಿ’ ಎಂದು ಹೇಳಿದ ಯಶ್, ಟಾಕ್ಸಿಕ್ ಸಿನಿಮಾದಲ್ಲಿ ತೊಡಗಿಸಿಕೊಳ್ಳಲು ಕರ್ನಾಟಕದ ಜನತೆ ನೀಡಿದ ಪ್ರೀತಿ ಮತ್ತು ಬೆಂಬಲವೇ ಪ್ರಮುಖ ಕಾರಣ ಎಂದು ಹೇಳಿದರು.

ತಮ್ಮ ಪ್ರತಿಯೊಂದು ಗೆಲುವಿನ ಹಿಂದೆಯೂ ಅಭಿಮಾನಿಗಳು ನೀಡಿದ ಶಕ್ತಿ ಮತ್ತು ಜವಾಬ್ದಾರಿ ಇದೆ. ಪ್ರತಿ ಸಿನಿಮಾದ ಗೆಲುವನ್ನು ವೈಯಕ್ತಿಕ ಗೆಲುವಾಗಿ ನೋಡುವುದಿಲ್ಲ. ಬದಲಿಗೆ ಮತ್ತಷ್ಟು ಉತ್ತಮವಾಗಿ ಕೆಲಸ ಮಾಡಬೇಕು ಎಂಬ ಜವಾಬ್ದಾರಿಯಾಗಿ ಪರಿಗಣಿಸುತ್ತೇನೆ ಎಂದು ಯಶ್ ಹೇಳಿದರು.

‘ನಿಮ್ಮ ಆಶೀರ್ವಾದ ಇರಲಿ, ಯಶ್ ಮೇಲೆ ನಂಬಿಕೆ ಇರಲಿ’

‘ಟಾಕ್ಸಿಕ್’ ಸಿನಿಮಾ ಅಭಿಮಾನಿಗಳು ನೀಡಿದ ಹಿಂದಿನ ಗೆಲುವಿನ ಪ್ರತೀಕವಾಗಿದ್ದು, ಇದೀಗ ಮತ್ತೊಂದು ಹೆಜ್ಜೆ ಮುಂದೆ ಹೋಗುವ ಪ್ರಯತ್ನ ಮಾಡಲಾಗುತ್ತಿದೆ ಎಂದು ಯಶ್ ಹೇಳಿದರು.

ಕರ್ನಾಟಕದ ಜನತೆ ತಮ್ಮ ಮೇಲೆ ಇಟ್ಟಿರುವ ನಂಬಿಕೆ ಮುಂದುವರಿಯಬೇಕು. ಸಿನಿಮಾಗೆ ಎಲ್ಲರ ಆಶೀರ್ವಾದ ಇರಲಿ ಎಂದು ರಾಕಿಂಗ್ ಸ್ಟಾರ್ ಮನವಿ ಮಾಡಿದರು.

ಇದೇ ವೇಳೆ ನಟಿಯರಾದ ರುಕ್ಮಿಣಿ ವಸಂತ್, ಕಿಯಾರಾ ಅಡ್ವಾಣಿ, ನಯನತಾರಾ, ತಾರಾ ಸುತಾರಿಯಾ ಹಾಗೂ ಹುಮಾ ಖುರೇಷಿ ಸೇರಿದಂತೆ ಚಿತ್ರದ ಸಹ ಕಲಾವಿದರನ್ನೂ ಯಶ್ ಮುಕ್ತಕಂಠದಿಂದ ಶ್ಲಾಘಿಸಿದರು.

ಬೆಂಗಳೂರು: ರಾಕಿಂಗ್ ಸ್ಟಾರ್ YASH ಅಭಿನಯದ ಬಹುನಿರೀಕ್ಷಿತ ‘Toxic: A Fairy Tale for Grown-Ups’ ಚಿತ್ರದ ಟ್ರೇಲರ್ ಇದೀಗ ಬಿಡುಗಡೆಯಾಗಿದೆ. ಯಶ್ ಅಭಿಮಾನಿಗಳು ಕಾತರದಿಂದ ಎದುರು ನೋಡುತ್ತಿದ್ದ ಟ್ರೇಲರ್ ಆಗಸ್ಟ್ 8ರಂದು ಸಂಜೆ 7.01ಕ್ಕೆ ಕನ್ನಡ, ಹಿಂದಿ, ತೆಲುಗು, ತಮಿಳು ಹಾಗೂ ಮಲಯಾಳಂ ಭಾಷೆಗಳಲ್ಲಿ ಅನಾವರಣಗೊಂಡಿದೆ.

ಟ್ರೇಲರ್ ಬಿಡುಗಡೆಯಾಗುತ್ತಿದ್ದಂತೆ ಸಾಮಾಜಿಕ ಜಾಲತಾಣಗಳಲ್ಲಿ ಭಾರೀ ಚರ್ಚೆ ಆರಂಭವಾಗಿದ್ದು, ಯಶ್ ಅವರ ವಿಭಿನ್ನ ಆ್ಯಕ್ಷನ್ ಲುಕ್ ಮತ್ತು ಚಿತ್ರದ ಭರ್ಜರಿ ಮೇಕಿಂಗ್ ಅಭಿಮಾನಿಗಳ ಗಮನ ಸೆಳೆದಿದೆ. ಚಿತ್ರದ ಗ್ಲಿಂಪ್ಸ್ ಮತ್ತು ಟೀಸರ್ ಬಳಿಕ ಇದೀಗ ಟ್ರೇಲರ್ ಕೂಡ ಸಿನಿಪ್ರೇಮಿಗಳಲ್ಲಿ Toxic Movie ಮೇಲಿನ ನಿರೀಕ್ಷೆಯನ್ನು ಮತ್ತಷ್ಟು ಹೆಚ್ಚಿಸಿದೆ.

ಯಶ್ ಅವರ ಹೊಸ ಅವತಾರಕ್ಕೆ ಮೆಚ್ಚುಗೆ

ಟ್ರೇಲರ್‌ನಲ್ಲಿ ಯಶ್ ಅವರ ಸ್ಟೈಲಿಶ್ ಲುಕ್, ಆ್ಯಕ್ಷನ್ ದೃಶ್ಯಗಳು ಹಾಗೂ ವಿಭಿನ್ನ ಬಾಡಿ ಲ್ಯಾಂಗ್ವೇಜ್ ಗಮನ ಸೆಳೆಯುತ್ತಿವೆ. ಕೆಜಿಎಫ್ ಸರಣಿಯ ಬಳಿಕ ಮತ್ತೊಂದು ವಿಭಿನ್ನ ಲೋಕದ ಕಥೆಯೊಂದಿಗೆ ಯಶ್ ಕಾಣಿಸಿಕೊಳ್ಳುತ್ತಿರುವುದು ಅಭಿಮಾನಿಗಳ ಕುತೂಹಲಕ್ಕೆ ಪ್ರಮುಖ ಕಾರಣವಾಗಿದೆ.

ಚಿತ್ರದ ಟೈಟಲ್‌ಗೆ ತಕ್ಕಂತೆ ಡಾರ್ಕ್ ಹಾಗೂ ಸ್ಟೈಲಿಶ್ ಟೋನ್ ಹೊಂದಿರುವ ಟ್ರೇಲರ್, ಸಿನಿಮಾ ಯಾವ ರೀತಿಯ ಕಥೆಯನ್ನು ಹೇಳಲಿದೆ ಎಂಬ ಬಗ್ಗೆ ಮತ್ತಷ್ಟು ಕುತೂಹಲ ಮೂಡಿಸಿದೆ.

ಬಹುದೊಡ್ಡ ತಾರಾಗಣ

ಗೀತು ಮೋಹನ್‌ದಾಸ್ ನಿರ್ದೇಶನದ Toxic ಚಿತ್ರವನ್ನು ಕೆವಿಎನ್ ಪ್ರೊಡಕ್ಷನ್ಸ್ ಮತ್ತು ಮಾನ್ಸ್ಟರ್ ಮೈಂಡ್ ಕ್ರಿಯೇಷನ್ಸ್ ಅಡಿಯಲ್ಲಿ ವೆಂಕಟ್ ಕೆ. ನಾರಾಯಣ್ ಹಾಗೂ ಯಶ್ ಜಂಟಿಯಾಗಿ ನಿರ್ಮಿಸಿದ್ದಾರೆ.

ಚಿತ್ರದಲ್ಲಿ ಯಶ್ ಜೊತೆಗೆ ನಯನತಾರಾ, ಕಿಯಾರಾ ಅಡ್ವಾಣಿ, ಹುಮಾ ಖುರೇಷಿ, ತಾರಾ ಸುತಾರಿಯಾ ಹಾಗೂ ರುಕ್ಮಿಣಿ ವಸಂತ್ ಪ್ರಮುಖ ಪಾತ್ರಗಳಲ್ಲಿ ನಟಿಸಿದ್ದಾರೆ.

ಚಿತ್ರವನ್ನು ಕನ್ನಡ ಮತ್ತು ಇಂಗ್ಲಿಷ್ ಭಾಷೆಗಳಲ್ಲಿ ಚಿತ್ರೀಕರಿಸಲಾಗಿದ್ದು, ಹಿಂದಿ, ತೆಲುಗು, ತಮಿಳು ಹಾಗೂ ಮಲಯಾಳಂ ಭಾಷೆಗಳಲ್ಲಿ ಡಬ್ ಮಾಡಿದ ಆವೃತ್ತಿಗಳಲ್ಲೂ ಬಿಡುಗಡೆ ಮಾಡಲು ಸಿದ್ಧತೆ ಮಾಡಲಾಗಿದೆ.

ಆಗಸ್ಟ್ 26ಕ್ಕೆ ‘Toxic’ ಗ್ರ್ಯಾಂಡ್ ರಿಲೀಸ್

ಬ್ಲಾಕ್‌ಬಸ್ಟರ್ KGF Chapter 2 ಬಳಿಕ ಸುಮಾರು ನಾಲ್ಕು ವರ್ಷಗಳ ನಂತರ ಯಶ್ ಮತ್ತೆ ದೊಡ್ಡ ಪರದೆಗೆ ಮರಳುತ್ತಿದ್ದಾರೆ. ಹೀಗಾಗಿ Toxic Movie Release ಬಗ್ಗೆ ದೇಶಾದ್ಯಂತ ಭಾರೀ ನಿರೀಕ್ಷೆ ಮೂಡಿದೆ.

ಹಲವು ವಿಳಂಬಗಳ ಬಳಿಕ ಚಿತ್ರವು ಆಗಸ್ಟ್ 26ರಂದು ಚಿತ್ರಮಂದಿರಗಳಲ್ಲಿ ಬಿಡುಗಡೆಯಾಗಲು ಸಜ್ಜಾಗಿದೆ. ಕರ್ನಾಟಕದಲ್ಲಿ ಚಿತ್ರದ ಬಿಡುಗಡೆ ದೊಡ್ಡ ಮಟ್ಟದಲ್ಲಿ ನಡೆಯಲಿದ್ದು, ವಿಶೇಷವಾಗಿ ಬೆಂಗಳೂರಿನಲ್ಲಿ ಹೆಚ್ಚಿನ ಸ್ಕ್ರೀನ್‌ಗಳು ಮತ್ತು ಪ್ರದರ್ಶನಗಳನ್ನು ಹೊಂದುವ ನಿರೀಕ್ಷೆಯಿದೆ.

ಟ್ರೇಲರ್‌ಗೆ ಭರ್ಜರಿ ಪ್ರತಿಕ್ರಿಯೆ

ಟ್ರೇಲರ್ ಬಿಡುಗಡೆಯಾದ ಬಳಿಕ ಯಶ್ ಅಭಿಮಾನಿಗಳು ಸಾಮಾಜಿಕ ಜಾಲತಾಣಗಳಲ್ಲಿ ತಮ್ಮ ಪ್ರತಿಕ್ರಿಯೆಗಳನ್ನು ಹಂಚಿಕೊಳ್ಳುತ್ತಿದ್ದಾರೆ. ಯಶ್ ಅವರ ಆ್ಯಕ್ಷನ್ ಲುಕ್, ಚಿತ್ರದ ದೃಶ್ಯ ವೈಭವ ಹಾಗೂ ಗೀತು ಮೋಹನ್‌ದಾಸ್ ಅವರ ವಿಭಿನ್ನ ನಿರೂಪಣಾ ಶೈಲಿ ಬಗ್ಗೆ ಚರ್ಚೆ ನಡೆಯುತ್ತಿದೆ.

ಇದೀಗ ಟ್ರೇಲರ್ ಮೂಲಕ ಕುತೂಹಲ ಹೆಚ್ಚಿಸಿರುವ Toxic, ಆಗಸ್ಟ್ 26ರಂದು ಚಿತ್ರಮಂದಿರಕ್ಕೆ ಬಂದ ಬಳಿಕ ಬಾಕ್ಸ್ ಆಫೀಸ್‌ನಲ್ಲಿ ಯಾವ ರೀತಿಯ ದಾಖಲೆ ಬರೆಯಲಿದೆ ಎಂಬುದನ್ನು ಕಾದು ನೋಡಬೇಕಿದೆ.