ದೇಶ

‘ನನಗೆ ನಾಚಿಕೆಯಾಗುತ್ತದೆ, ಉದ್ಘಾಟನೆಗೆ ಬರಲ್ಲ’! NH-66 ಬಗ್ಗೆ Nitin Gadkari ಕೊಟ್ಟ ಖಡಕ್ ಎಚ್ಚರಿಕೆ

Published

2 ಗಂಟೆಗಳು ago

ಸೆಪ್ಟೆಂಬರ್ 10, 2026

ನವದೆಹಲಿ, ಸೆಪ್ಟೆಂಬರ್ 10: ಮುಂಬೈ-ಗೋವಾ ರಾಷ್ಟ್ರೀಯ ಹೆದ್ದಾರಿ NH-66ರ ಚತುಷ್ಪಥ ಕಾಮಗಾರಿ ದಶಕಗಳಿಂದ ವಿಳಂಬವಾಗುತ್ತಿರುವುದಕ್ಕೆ ಕೇಂದ್ರ ರಸ್ತೆ ಸಾರಿಗೆ ಮತ್ತು ಹೆದ್ದಾರಿ ಸಚಿವ Nitin Gadkari ತೀವ್ರ ಅಸಮಾಧಾನ ವ್ಯಕ್ತಪಡಿಸಿದ್ದಾರೆ.

ಯೋಜನೆಯ ವಿಳಂಬದ ಬಗ್ಗೆ ಬಹಿರಂಗವಾಗಿಯೇ ಬೇಸರ ವ್ಯಕ್ತಪಡಿಸಿದ ಗಡ್ಕರಿ, ಕಾಮಗಾರಿ ಪೂರ್ಣಗೊಂಡ ಬಳಿಕ ನಡೆಯುವ ಉದ್ಘಾಟನಾ ಕಾರ್ಯಕ್ರಮಕ್ಕೆ ತಾವು ಹಾಜರಾಗುವುದಿಲ್ಲ ಎಂದು ಹೇಳಿದ್ದಾರೆ. ತಮ್ಮದೇ ಇಲಾಖೆಯ ಮಹತ್ವದ ಯೋಜನೆಯ ವಿಳಂಬದ ಬಗ್ಗೆ ಸಚಿವರು ಇಂತಹ ಕಠಿಣ ನಿಲುವು ವ್ಯಕ್ತಪಡಿಸಿರುವುದು ಗಮನ ಸೆಳೆದಿದೆ.

‘ಉದ್ಘಾಟನಾ ಕಾರ್ಯಕ್ರಮಕ್ಕೆ ನಾನು ಬರಲ್ಲ’

ಪಣಜಿ ಸಮೀಪದ ಪೋರ್ವೊರಿಮ್‌ನಲ್ಲಿ ಆರು ಪಥಗಳ ಎಲಿವೇಟೆಡ್ ಕಾರಿಡಾರ್ ಉದ್ಘಾಟಿಸಿ ಮಾತನಾಡಿದ ಗಡ್ಕರಿ, ಮುಂಬೈ-ಗೋವಾ ಹೆದ್ದಾರಿ ಯೋಜನೆಯ ವಿಳಂಬದ ಬಗ್ಗೆ ಅಸಮಾಧಾನ ಹೊರಹಾಕಿದರು.

ಯೋಜನೆ ಇಷ್ಟೊಂದು ವರ್ಷಗಳ ಕಾಲ ವಿಳಂಬವಾಗಿರುವುದನ್ನು ನೋಡಿದರೆ ತನಗೆ ನಾಚಿಕೆಯಾಗುತ್ತದೆ ಎಂದು ಹೇಳಿದ ಅವರು, ಈ ಕಾರಣಕ್ಕಾಗಿ ಉದ್ಘಾಟನಾ ಕಾರ್ಯಕ್ರಮಕ್ಕೆ ತಾವು ಬರುವುದಿಲ್ಲ ಎಂದು ಸ್ಪಷ್ಟಪಡಿಸಿದ್ದಾರೆ.

ಅಕ್ಟೋಬರ್‌ನಲ್ಲಿ ರಸ್ತೆ ಮೂಲಕವೇ ತಪಾಸಣೆ

ಹೆದ್ದಾರಿ ಕಾಮಗಾರಿಯ ಗುಣಮಟ್ಟದ ಬಗ್ಗೆ ಗಂಭೀರವಾಗಿ ಗಮನಹರಿಸಿರುವ ಗಡ್ಕರಿ, ಅಕ್ಟೋಬರ್‌ನಲ್ಲಿ ಮುಂಬೈ ವಿಮಾನ ನಿಲ್ದಾಣದಿಂದ ಗೋವಾಕ್ಕೆ ರಸ್ತೆ ಮಾರ್ಗದಲ್ಲೇ ಪ್ರಯಾಣಿಸುವುದಾಗಿ ತಿಳಿಸಿದ್ದಾರೆ.

ಈ ವೇಳೆ ಹೆದ್ದಾರಿಯ ಪ್ರತಿಯೊಂದು ಹಂತದ ಕಾಮಗಾರಿ, ಗುಣಮಟ್ಟ ಹಾಗೂ ಪ್ರಯಾಣಿಕರಿಗೆ ಆಗುತ್ತಿರುವ ಅನುಕೂಲವನ್ನು ಖುದ್ದಾಗಿ ಪರಿಶೀಲಿಸುವುದಾಗಿ ಹೇಳಿದ್ದಾರೆ.

ಕಾಮಗಾರಿ ವಿಳಂಬ ಮಾಡುವ ಗುತ್ತಿಗೆದಾರರನ್ನು ಕಪ್ಪುಪಟ್ಟಿಗೆ ಸೇರಿಸುವುದು ಮತ್ತು ನಿರ್ಲಕ್ಷ್ಯ ತೋರುವ ಅಧಿಕಾರಿಗಳ ವಿರುದ್ಧ ಅಮಾನತು ಸೇರಿದಂತೆ ಕಠಿಣ ಕ್ರಮ ಕೈಗೊಳ್ಳುವುದಾಗಿ ಗಡ್ಕರಿ ಎಚ್ಚರಿಕೆ ನೀಡಿದ್ದಾರೆ.

ದಶಕಗಳಿಂದ ಕುಂಟುತ್ತಿರುವ ಕಾಮಗಾರಿ

ಮುಂಬೈ-ಗೋವಾ ಹೆದ್ದಾರಿ ಯೋಜನೆ 2011ರಲ್ಲಿ ಆರಂಭವಾಗಿದ್ದು, 2015ರಲ್ಲೇ ಪೂರ್ಣಗೊಳ್ಳಬೇಕಿತ್ತು. ಆದರೆ ಹಲವು ಕಾರಣಗಳಿಂದ ಕಾಮಗಾರಿ ನಿಗದಿತ ಅವಧಿಯಲ್ಲಿ ಪೂರ್ಣಗೊಂಡಿಲ್ಲ.

ಕೊಂಕಣ ಭಾಗದ ಕಡಿದಾದ ಬೆಟ್ಟ ಪ್ರದೇಶ, ಭೂಸ್ವಾಧೀನಕ್ಕೆ ಸಂಬಂಧಿಸಿದ ಕಾನೂನು ಜಟಾಪಟಿ, ಗುತ್ತಿಗೆದಾರರ ದಿವಾಳಿತನ, ಮಳೆಗಾಲದ ಭೂಕುಸಿತ ಹಾಗೂ ಅರಣ್ಯ ಇಲಾಖೆಯ ಅನುಮತಿ ವಿಳಂಬ ಸೇರಿದಂತೆ ಹಲವು ಕಾರಣಗಳು ಯೋಜನೆ ವಿಳಂಬಕ್ಕೆ ಕಾರಣವಾಗಿವೆ.

ಕರ್ನಾಟಕಕ್ಕೂ ಮಹತ್ವದ NH-66

ಮುಂಬೈ-ಗೋವಾ ಹೆದ್ದಾರಿ ಕೇವಲ ಮಹಾರಾಷ್ಟ್ರ ಮತ್ತು ಗೋವಾ ನಡುವಿನ ಸಂಪರ್ಕಕ್ಕೆ ಸೀಮಿತವಾಗಿಲ್ಲ. ಇದು ಕರ್ನಾಟಕದ ಕರಾವಳಿಗೂ ಪ್ರಮುಖ ಸಂಪರ್ಕ ಕಲ್ಪಿಸುವ ರಾಷ್ಟ್ರೀಯ ಹೆದ್ದಾರಿಯಾಗಿದೆ.

ಗೋವಾದಿಂದ ಮುಂದೆ ಕಾರವಾರ, ಕುಮಟಾ, ಭಟ್ಕಳ, ಉಡುಪಿ ಮಾರ್ಗವಾಗಿ ಮಂಗಳೂರು ಹಾಗೂ ಕೇರಳದವರೆಗೆ ಈ ಹೆದ್ದಾರಿ ಸಂಪರ್ಕ ಕಲ್ಪಿಸುತ್ತದೆ. ಹೀಗಾಗಿ ಮುಂಬೈ-ಗೋವಾ ಭಾಗದ ಕಾಮಗಾರಿ ಪೂರ್ಣಗೊಂಡರೆ ಕರ್ನಾಟಕ ಕರಾವಳಿಯ ಪ್ರಯಾಣಿಕರು ಹಾಗೂ ಸರಕು ಸಾಗಣೆಗೆ ಹೆಚ್ಚಿನ ಅನುಕೂಲವಾಗುವ ನಿರೀಕ್ಷೆಯಿದೆ.

11 ಗಂಟೆಯಿಂದ 6 ಗಂಟೆಗೆ ಇಳಿಯಲಿದೆಯೇ ಪ್ರಯಾಣ?

ಸದ್ಯ ರಸ್ತೆ ಮಾರ್ಗದಲ್ಲಿ ಮುಂಬೈನಿಂದ ಗೋವಾ ತಲುಪಲು ಸುಮಾರು 11ರಿಂದ 13 ಗಂಟೆಗಳವರೆಗೆ ಸಮಯ ಬೇಕಾಗುತ್ತಿದೆ. NH-66ರ ಅಗಲೀಕರಣ ಕಾಮಗಾರಿ ಸಂಪೂರ್ಣಗೊಂಡ ಬಳಿಕ ಈ ಪ್ರಯಾಣದ ಅವಧಿ ಸುಮಾರು 6ರಿಂದ 7 ಗಂಟೆಗಳಿಗೆ ಇಳಿಕೆಯಾಗುವ ನಿರೀಕ್ಷೆಯಿದೆ.

ಹೀಗಾಗಿ ಹೆದ್ದಾರಿ ಕಾಮಗಾರಿ ಪೂರ್ಣಗೊಳ್ಳುವುದು ಪ್ರಯಾಣಿಕರ ಸಮಯ ಉಳಿತಾಯದ ಜತೆಗೆ ಕರಾವಳಿ ಭಾಗದ ಆರ್ಥಿಕ ಚಟುವಟಿಕೆ ಮತ್ತು ಸರಕು ಸಾಗಣೆಗೂ ಮಹತ್ವದ ಬದಲಾವಣೆ ತರಬಹುದು.

ಗುತ್ತಿಗೆದಾರರು, ಅಧಿಕಾರಿಗಳಿಗೆ ಖಡಕ್ ಎಚ್ಚರಿಕೆ

ಯೋಜನೆಗಳ ವಿಳಂಬದ ಬಗ್ಗೆ ಹಲವು ಬಾರಿ ಅಸಮಾಧಾನ ವ್ಯಕ್ತಪಡಿಸಿರುವ ಗಡ್ಕರಿ, ಈ ವರ್ಷ ಕಾಮಗಾರಿ ವಿಳಂಬ ಮಾಡುವ ಗುತ್ತಿಗೆದಾರರು ಮತ್ತು ನಿರ್ಲಕ್ಷ್ಯ ತೋರುವ ಅಧಿಕಾರಿಗಳ ವಿರುದ್ಧ ಕಠಿಣ ಕ್ರಮ ಕೈಗೊಳ್ಳುವುದಾಗಿ ಎಚ್ಚರಿಕೆ ನೀಡಿದ್ದಾರೆ.

NH-66 ಯೋಜನೆಯ ವಿಳಂಬದ ಬಗ್ಗೆ ಸಚಿವರು ಬಹಿರಂಗವಾಗಿ ಅಸಮಾಧಾನ ವ್ಯಕ್ತಪಡಿಸಿರುವುದು ಇದೀಗ ರಾಜಕೀಯ ಹಾಗೂ ಆಡಳಿತಾತ್ಮಕ ವಲಯದಲ್ಲಿ ಚರ್ಚೆಗೆ ಕಾರಣವಾಗಿದೆ.

Related Topics:Featured nithin gadkeri trending

Up Next

Red Fort ಸ್ಫೋಟ ಪ್ರಕರಣಕ್ಕೆ ಹೊಸ ತಿರುವು; ಉಗ್ರನ ಮೂಲ ಗುರಿ ಎಲ್ಲಿತ್ತು ಎಂಬುದು ಬಹಿರಂಗ!

Don't Miss

Mangaluru ನಲ್ಲಿ CM ಡಿಕೆಶಿ ಸರ್ಕಾರದ ಐತಿಹಾಸಿಕ ಸಂಪುಟ ಸಭೆ; ಕರಾವಳಿ ಕೋಟೆ ಭೇದಿಸಲು ಬಿಗ್ ಮಾಸ್ಟರ್ ಪ್ಲ್ಯಾನ್!

J S Vasudev

J S Vasudev is a journalist and writer with 15 years of experience in writing and journalism. He founded Hosasuddi.in in 2023 with a vision to deliver credible and timely Kannada news. With a strong passion for journalism, he focuses on presenting news in a clear, simple and reader-friendly manner. His work covers current affairs, Karnataka news, national developments, business, technology and social issues. He believes in independent journalism and responsible reporting that puts readers first. His guiding motto is “Write on Your Own,” reflecting his commitment to original and independent content. Through Hosasuddi.in, he continues to contribute to Kannada digital journalism with dedication and integrity.

Click to comment

ರಾಜ್ಯ

ಪೆಸ್ಟ್ ಕಂಟ್ರೋಲ್ ಇಲ್ಲ, ಔಷಧಿಯೂ ಇಲ್ಲ; ಒಂದು ಬೆಕ್ಕು ಚಿಕ್ಕಬಳ್ಳಾಪುರ Police Station ಯನ್ನು ಹೇಗೆ ಕಾಪಾಡಿತು?

Published

8 ನಿಮಿಷಗಳು ago

ಸೆಪ್ಟೆಂಬರ್ 10, 2026

J S Vasudev

ಚಿಕ್ಕಬಳ್ಳಾಪುರ: Police Station ಎಂದರೆ ಕಾನೂನು ಮತ್ತು ಸುವ್ಯವಸ್ಥೆ ಕಾಪಾಡುವ ಸ್ಥಳ. ಆದರೆ ಚಿಕ್ಕಬಳ್ಳಾಪುರ ಗ್ರಾಮಾಂತರ ಪೊಲೀಸ್ ಠಾಣೆಯಲ್ಲಿ ಕೆಲಕಾಲ ಪೊಲೀಸರಿಗೆ ಕಾನೂನು ಸುವ್ಯವಸ್ಥೆಗಿಂತ ಮತ್ತೊಂದು ಸಮಸ್ಯೆಯೇ ದೊಡ್ಡ ತಲೆನೋವಾಗಿ ಪರಿಣಮಿಸಿತ್ತು. ಸುಮಾರು 25 ವರ್ಷಗಳಷ್ಟು ಹಳೆಯದಾದ ಠಾಣೆಯ ಕಟ್ಟಡದಲ್ಲಿ ಇಲಿಗಳ ಹಾವಳಿ ವಿಪರೀತವಾಗಿತ್ತು. ಇದೀಗ ಈ ಸಮಸ್ಯೆಗೆ ಒಂದು ಪುಟ್ಟ ಬಿಳಿ ಬೆಕ್ಕು ಶಾಶ್ವತ ಪರಿಹಾರ ನೀಡಿದೆ.

ಹಳೆಯ ಕಟ್ಟಡದಿಂದ ಹೆಚ್ಚಾದ ಇಲಿ ಕಾಟ

ಚಿಕ್ಕಬಳ್ಳಾಪುರ ಗ್ರಾಮಾಂತರ ಪೊಲೀಸ್ ಠಾಣೆಯ ಕಟ್ಟಡಕ್ಕೆ ಸುಮಾರು 25 ವರ್ಷಗಳಾಗಿವೆ. ಠಾಣೆಯ ಪಕ್ಕದಲ್ಲಿದ್ದ ಹಾಳಾದ ಕಟ್ಟಡ ಹಾಗೂ ಹಿಂಭಾಗದಲ್ಲಿ ಬೆಳೆದಿದ್ದ ಪೊದೆಗಳಿಂದಾಗಿ ಇಲಿಗಳ ಸಂಖ್ಯೆ ಹೆಚ್ಚಾಗಿತ್ತು.

ಕಂಪ್ಯೂಟರ್‌ಗಳ ಬಳಿ, ಮೇಜುಗಳ ಸುತ್ತಮುತ್ತ ಹಾಗೂ ಅಲಮಾರಿಗಳಲ್ಲಿ ಇಲಿಗಳು ನಿರಂತರವಾಗಿ ಓಡಾಡುತ್ತಿದ್ದವು. ಪರಿಸ್ಥಿತಿ ಎಷ್ಟರಮಟ್ಟಿಗೆ ಹೋಗಿತ್ತೆಂದರೆ, ಠಾಣೆಯಲ್ಲಿ ಸಂಗ್ರಹಿಸಿಟ್ಟಿದ್ದ ಪ್ರಮುಖ ದೂರುಗಳು ಮತ್ತು ಎಫ್‌ಐಆರ್ ದಾಖಲೆಗಳನ್ನೇ ಇಲಿಗಳು ಕಚ್ಚಿ ಹಾಳು ಮಾಡಲು ಆರಂಭಿಸಿದ್ದವು.

ಇದರಿಂದ ಪೊಲೀಸ್ ಸಿಬ್ಬಂದಿಗೆ ಇಲಿಗಳ ಕಾಟವನ್ನು ನಿಯಂತ್ರಿಸುವುದು ದೊಡ್ಡ ಸವಾಲಾಗಿತ್ತು.

ಬೋನು ಇಟ್ಟರೂ ಕಡಿಮೆಯಾಗದ ಹಾವಳಿ

ಇಲಿಗಳನ್ನು ಹಿಡಿಯಲು ಪೊಲೀಸ್ ಸಿಬ್ಬಂದಿ ಮೊದಲಿಗೆ ಬೋನುಗಳನ್ನು ಇಟ್ಟಿದ್ದರು. ಆದರೆ ಅದರಿಂದ ನಿರೀಕ್ಷಿತ ಫಲಿತಾಂಶ ಸಿಗಲಿಲ್ಲ. ಇಲಿಗಳ ಹಾವಳಿ ಮಾತ್ರ ದಿನದಿಂದ ದಿನಕ್ಕೆ ಹೆಚ್ಚುತ್ತಲೇ ಇತ್ತು.

ಕೊನೆಗೆ ಸಿಬ್ಬಂದಿ ಯಾವುದೇ ಹೊಸ ತಂತ್ರಜ್ಞಾನ ಅಥವಾ ರಾಸಾಯನಿಕ ಪೆಸ್ಟ್ ಕಂಟ್ರೋಲ್‌ಗಿಂತ ಹಳೆಯ ಕಾಲದಿಂದಲೂ ಪರಿಣಾಮಕಾರಿ ಎಂದು ಪರಿಗಣಿಸಲಾಗಿರುವ ಸರಳ ಉಪಾಯದ ಮೊರೆ ಹೋದರು.

ಅದೇ ಬೆಕ್ಕು!

ಠಾಣೆಗೆ ಬಂದ ಬಿಳಿ ಬೆಕ್ಕು

ಸುಮಾರು ಆರು-ಏಳು ತಿಂಗಳ ಹಿಂದೆ ಒಂದೂವರೆ ವರ್ಷದ ಬಿಳಿ ಬಣ್ಣದ ಗಂಡು ಬೆಕ್ಕೊಂದನ್ನು ಪೊಲೀಸ್ ಠಾಣೆಗೆ ಕರೆತರಲಾಯಿತು. ಬೆಕ್ಕು ಠಾಣೆಯಲ್ಲೇ ಇರಲು ಆರಂಭಿಸಿದ ಬಳಿಕ ಪರಿಸ್ಥಿತಿಯಲ್ಲಿ ಗಮನಾರ್ಹ ಬದಲಾವಣೆ ಕಂಡುಬಂದಿದೆ.

ಥಾಣೆಯ ಮೂಲೆಮೂಲೆಗಳಲ್ಲಿ ಸ್ವತಂತ್ರವಾಗಿ ಓಡಾಡುವ ಬೆಕ್ಕು ಇಲಿಗಳ ಮೇಲೆ ಕಣ್ಣಿಟ್ಟಿದೆ. ಪರಿಣಾಮವಾಗಿ ಠಾಣೆಯೊಳಗೆ ಕಾಣಿಸಿಕೊಳ್ಳುತ್ತಿದ್ದ ಇಲಿಗಳ ಹಾವಳಿ ಇದೀಗ ಸಂಪೂರ್ಣವಾಗಿ ಮಾಯವಾಗಿದೆ.

ಸಮವಸ್ತ್ರವಿಲ್ಲದ ‘ಅನೌಪಚಾರಿಕ ಗಾರ್ಡ್’

ಪೊಲೀಸ್ ಠಾಣೆಯಲ್ಲಿ ಯಾವುದೇ ಸಮವಸ್ತ್ರವಿಲ್ಲದೆ ತನ್ನದೇ ಶೈಲಿಯಲ್ಲಿ ಓಡಾಡುವ ಈ ಬಿಳಿ ಬೆಕ್ಕು ಇದೀಗ ಸಿಬ್ಬಂದಿಯ ಪಾಲಿಗೆ ಅನೌಪಚಾರಿಕ ಗಾರ್ಡ್ ಆಗಿದೆ.

ಇಲಿಗಳ ಕಾಟದಿಂದ ಪ್ರಮುಖ ದಾಖಲೆಗಳು ಹಾಳಾಗುವ ಆತಂಕ ಎದುರಾಗಿದ್ದ ಸಂದರ್ಭದಲ್ಲಿ, ಈ ಬೆಕ್ಕಿನ ಉಪಸ್ಥಿತಿ ಠಾಣೆಯ ಪರಿಸ್ಥಿತಿಯನ್ನೇ ಬದಲಿಸಿದೆ.

ಪೊಲೀಸರ ಮುದ್ದಿನ ಅತಿಥಿಗೆ ರಾಜಮರ್ಯಾದೆ

ಇಲಿಗಳನ್ನು ಬೇಟೆಯಾಡುವ ಕೆಲಸ ಮಾಡುತ್ತಿರುವ ಬೆಕ್ಕನ್ನು ಪೊಲೀಸ್ ಸಿಬ್ಬಂದಿ ಕೇವಲ ‘ಕೆಲಸದ ಪ್ರಾಣಿ’ಯಂತೆ ನೋಡುತ್ತಿಲ್ಲ. ಠಾಣೆಯ ಸಿಬ್ಬಂದಿ ಪ್ರತಿದಿನ ಅದಕ್ಕೆ ಪ್ರೀತಿಯಿಂದ ಹಾಲು, ಬಿಸ್ಕತ್ ಹಾಗೂ ಬ್ರೆಡ್‌ಗಳನ್ನು ನೀಡುತ್ತಿದ್ದಾರೆ.

ಹೀಗಾಗಿ ಇಲಿಗಳ ಕಾಟದಿಂದ ಠಾಣೆಯ ದಾಖಲೆಗಳನ್ನು ರಕ್ಷಿಸುವುದರ ಜೊತೆಗೆ, ಈ ಬೆಕ್ಕು ಪೊಲೀಸರ ಮುದ್ದಿನ ಸಾಕುಪ್ರಾಣಿಯಾಗಿಯೂ ಬದಲಾಗಿದೆ.

ಗೌರಿಬಿದನೂರು ಠಾಣೆಯಲ್ಲೂ ಇದೇ ಪ್ರಯೋಗ ಯಶಸ್ವಿ

ಚಿಕ್ಕಬಳ್ಳಾಪುರ ಜಿಲ್ಲೆಯಲ್ಲಿ ಪೊಲೀಸ್ ಠಾಣೆಯ ಇಲಿಗಳ ಸಮಸ್ಯೆಗೆ ಬೆಕ್ಕನ್ನು ಬಳಸಿಕೊಂಡು ಯಶಸ್ಸು ಕಂಡಿರುವುದು ಇದೇ ಮೊದಲೇನಲ್ಲ. ಈ ಹಿಂದೆ ಗೌರಿಬಿದನೂರು ಗ್ರಾಮಾಂತರ ಪೊಲೀಸ್ ಠಾಣೆಯಲ್ಲೂ ಇದೇ ರೀತಿಯ ಪ್ರಯೋಗ ಯಶಸ್ವಿಯಾಗಿತ್ತು.

ಒಟ್ಟಿನಲ್ಲಿ ದೊಡ್ಡ ಪ್ರಮಾಣದ ಪೆಸ್ಟ್ ಕಂಟ್ರೋಲ್ ವ್ಯವಸ್ಥೆಯಿಲ್ಲದೆ, ಒಂದು ಪುಟ್ಟ ಬಿಳಿ ಬೆಕ್ಕು ಪೊಲೀಸ್ ಠಾಣೆಯ ಪ್ರಮುಖ ದಾಖಲೆಗಳನ್ನು ರಕ್ಷಿಸುವಲ್ಲಿ ಪ್ರಮುಖ ಪಾತ್ರ ವಹಿಸಿದೆ. ಇದೀಗ ಈ ‘ಅನೌಪಚಾರಿಕ ಗಾರ್ಡ್’ ಪೊಲೀಸರ ಅಚ್ಚುಮೆಚ್ಚಿನ ಸದಸ್ಯನಾಗಿರುವುದು ವಿಶೇಷ.

ಕ್ರೀಡೆ

ಇಶಾನ್ ಕಿಶನ್ ಅಬ್ಬರಕ್ಕೆ 13 ವರ್ಷಗಳ ಬರ ಅಂತ್ಯ;Duleep Trophy ಪೂರ್ವ ವಲಯದ ಪಾಲು

Published

26 ನಿಮಿಷಗಳು ago

ಸೆಪ್ಟೆಂಬರ್ 10, 2026

J S Vasudev

ಚೆನ್ನೈ, ಸೆ.10: ಪ್ರತಿಷ್ಠಿತ Duleep Trophy ಯಲ್ಲಿ ಪೂರ್ವ ವಲಯ ತಂಡ 13 ವರ್ಷಗಳ ಬಳಿಕ ಚಾಂಪಿಯನ್ ಪಟ್ಟಕ್ಕೇರಿದೆ. ಎಂ.ಎ. ಚಿದಂಬರಂ ಕ್ರೀಡಾಂಗಣದಲ್ಲಿ ನಡೆದ ಫೈನಲ್ ಪಂದ್ಯದಲ್ಲಿ ಮೊದಲ ಇನ್ನಿಂಗ್ಸ್ ಮುನ್ನಡೆಯ ಆಧಾರದ ಮೇಲೆ ದಕ್ಷಿಣ ವಲಯವನ್ನು ಮಣಿಸಿ ಪೂರ್ವ ವಲಯ ಟ್ರೋಫಿ ಗೆದ್ದುಕೊಂಡಿತು.

ದಕ್ಷಿಣ ವಲಯಕ್ಕೆ ಇದು ಸತತ ಎರಡನೇ ಫೈನಲ್ ಸೋಲಾಗಿದೆ. ಕಳೆದ ಋತುವಿನಲ್ಲಿ ಕೇಂದ್ರ ವಲಯದ ವಿರುದ್ಧ ಸೋಲು ಅನುಭವಿಸಿದ್ದ ದಕ್ಷಿಣ ವಲಯ, ಈ ಬಾರಿಯೂ ಪ್ರಶಸ್ತಿ ಗೆಲ್ಲುವಲ್ಲಿ ವಿಫಲವಾಯಿತು.

ಫೈನಲ್‌ನ ತಾರೆಯಾದ ಇಶಾನ್ ಕಿಶನ್

ಪೂರ್ವ ವಲಯದ ನಾಯಕ ಇಶಾನ್ ಕಿಶನ್ ಫೈನಲ್ ಪಂದ್ಯದಲ್ಲಿ ಅದ್ಭುತ ಬ್ಯಾಟಿಂಗ್ ಪ್ರದರ್ಶನ ನೀಡಿದರು. ಮೊದಲ ಇನ್ನಿಂಗ್ಸ್‌ನಲ್ಲಿ ಬರೋಬ್ಬರಿ 270 ರನ್ ಗಳಿಸಿದ ಅವರು, ಎರಡನೇ ಇನ್ನಿಂಗ್ಸ್‌ನಲ್ಲಿ 80 ರನ್ ಸಿಡಿಸಿದರು.

ಎರಡೂ ಇನ್ನಿಂಗ್ಸ್‌ಗಳಲ್ಲಿ ಒಟ್ಟು 350 ರನ್ ಗಳಿಸುವ ಮೂಲಕ ಇಶಾನ್ ಕಿಶನ್ ಫೈನಲ್‌ನ ಪ್ರಮುಖ ತಾರೆಯಾಗಿ ಹೊರಹೊಮ್ಮಿದರು. ಅವರ ಭರ್ಜರಿ ಪ್ರದರ್ಶನಕ್ಕೆ ಪಂದ್ಯ ಶ್ರೇಷ್ಠ ಪ್ರಶಸ್ತಿಯೂ ಒಲಿಯಿತು.

ಇನ್ನು ಕುಮಾರ್ ಕುಶಾಗ್ರ ಮೊದಲ ಇನ್ನಿಂಗ್ಸ್‌ನಲ್ಲಿ ಶತಕ ಸಿಡಿಸಿ ಪೂರ್ವ ವಲಯದ ಬೃಹತ್ ಮೊತ್ತಕ್ಕೆ ಪ್ರಮುಖ ಕೊಡುಗೆ ನೀಡಿದರು.

708 ರನ್‌ಗಳ ಬೃಹತ್ ಮೊತ್ತ

ಟಾಸ್ ಬಳಿಕ ಮೊದಲು ಬ್ಯಾಟಿಂಗ್ ಮಾಡಿದ ಪೂರ್ವ ವಲಯ ಮೊದಲ ಇನ್ನಿಂಗ್ಸ್‌ನಲ್ಲಿ 163 ಓವರ್‌ಗಳಲ್ಲಿ 708 ರನ್‌ಗಳಿಗೆ ಆಲೌಟ್ ಆಯಿತು.

ಬೃಹತ್ ಮೊತ್ತವನ್ನು ಬೆನ್ನಟ್ಟಿದ ದಕ್ಷಿಣ ವಲಯಕ್ಕೆ ಮೊಹಮ್ಮದ್ ಶಮಿ ಮತ್ತು ಮುಖೇಶ್ ಕುಮಾರ್ ಅವರ ಬೌಲಿಂಗ್ ದಾಳಿ ಭಾರೀ ಹೊಡೆತ ನೀಡಿತು. ದಕ್ಷಿಣ ವಲಯದ ಬ್ಯಾಟರ್‌ಗಳು ಹೆಚ್ಚು ಹೊತ್ತು ಕ್ರೀಸ್‌ನಲ್ಲಿ ನಿಲ್ಲಲು ಸಾಧ್ಯವಾಗದೆ 107.3 ಓವರ್‌ಗಳಲ್ಲಿ 336 ರನ್‌ಗಳಿಗೆ ಆಲೌಟ್ ಆದರು.

ಇದರೊಂದಿಗೆ ಪೂರ್ವ ವಲಯಕ್ಕೆ ಬರೋಬ್ಬರಿ 372 ರನ್‌ಗಳ ಮೊದಲ ಇನ್ನಿಂಗ್ಸ್ ಮುನ್ನಡೆ ದೊರೆಯಿತು.

ಫಾಲೋ-ಆನ್ ಹೇರದೆ ಮತ್ತೊಮ್ಮೆ ಬ್ಯಾಟಿಂಗ್

372 ರನ್‌ಗಳ ಭರ್ಜರಿ ಮುನ್ನಡೆ ಪಡೆದಿದ್ದರೂ ಪೂರ್ವ ವಲಯ ಫಾಲೋ-ಆನ್ ಹೇರಲಿಲ್ಲ. ಬದಲಾಗಿ ಎರಡನೇ ಇನ್ನಿಂಗ್ಸ್‌ನಲ್ಲಿ ಮತ್ತೆ ಬ್ಯಾಟಿಂಗ್ ಆರಂಭಿಸಿತು.

ಪೂರ್ವ ವಲಯವು ಎರಡನೇ ಇನ್ನಿಂಗ್ಸ್‌ನಲ್ಲಿ 7 ವಿಕೆಟ್‌ಗೆ 388 ರನ್ ಗಳಿಸಿತು. ಅಂತಿಮ ದಿನದಾಟ ಆರಂಭವಾಗುವ ಮುನ್ನವೇ ಉಭಯ ತಂಡಗಳ ನಾಯಕರು ಪಂದ್ಯವನ್ನು ಡ್ರಾ ಮಾಡಿಕೊಳ್ಳಲು ಒಪ್ಪಿಕೊಂಡರು.

ಮೊದಲ ಇನ್ನಿಂಗ್ಸ್‌ನಲ್ಲಿ ಪಡೆದ ಬೃಹತ್ ಮುನ್ನಡೆಯೇ ಪೂರ್ವ ವಲಯಕ್ಕೆ ಚಾಂಪಿಯನ್ ಪಟ್ಟ ತಂದುಕೊಟ್ಟಿತು.

ಕೌನೇನ್ ಖುರೇಷಿ ಅಮೋಘ ಶತಕ

ಎರಡನೇ ಇನ್ನಿಂಗ್ಸ್‌ನಲ್ಲಿ 7ನೇ ಕ್ರಮಾಂಕದಲ್ಲಿ ಬ್ಯಾಟಿಂಗ್‌ಗೆ ಇಳಿದ ಮೊಹಮ್ಮದ್ ಕೌನೇನ್ ಖುರೇಷಿ ಅಮೋಘ ಶತಕ ಸಿಡಿಸಿ ಗಮನ ಸೆಳೆದರು.

ಯಾರೂ ನಿರೀಕ್ಷಿಸದ ರೀತಿಯಲ್ಲಿ ಅಜೇಯ ಶತಕ ಬಾರಿಸಿದ ಅವರು 190 ಎಸೆತಗಳಲ್ಲಿ 4 ಸಿಕ್ಸರ್ ಹಾಗೂ 13 ಬೌಂಡರಿಗಳ ನೆರವಿನಿಂದ ಅಜೇಯ 116 ರನ್ ಗಳಿಸಿದರು.

ಮತ್ತೊಂದು ತುದಿಯಲ್ಲಿ ಅವರಿಗೆ ಉತ್ತಮ ಸಾಥ್ ನೀಡಿದ ಅನುಕೂಲ್ ರಾಯ್ ಅರ್ಧಶತಕ ದಾಖಲಿಸಿದರು. ಅವರು 64 ರನ್ ಗಳಿಸಿದರು.

ವೈಭವ್ ಸೂರ್ಯವಂಶಿಗೆ ಮೊದಲ ಟ್ರೋಫಿ

ಕೇವಲ 15 ವರ್ಷ ವಯಸ್ಸಿನ ವೈಭವ್ ಸೂರ್ಯವಂಶಿ ಅವರಿಗೂ ಈ ಗೆಲುವು ವಿಶೇಷವಾಗಿದೆ. ಚೊಚ್ಚಲ ದುಲೀಪ್ ಟ್ರೋಫಿಯಲ್ಲೇ ತಂಡ ಚಾಂಪಿಯನ್ ಆಗಿರುವುದು ಯುವ ಆಟಗಾರನಿಗೆ ಸ್ಮರಣೀಯ ಕ್ಷಣವಾಗಿದೆ.

ಪೂರ್ವ ವಲಯ ತಂಡದ ಈ ಗೆಲುವಿನೊಂದಿಗೆ 13 ವರ್ಷಗಳ ಪ್ರಶಸ್ತಿ ಬರವೂ ಅಂತ್ಯಗೊಂಡಿದೆ.

ಪಂದ್ಯದ ಸಂಪೂರ್ಣ ಸ್ಕೋರ್

ಮೊದಲ ಇನ್ನಿಂಗ್ಸ್:
ಪೂರ್ವ ವಲಯ – 163 ಓವರ್‌ಗಳಲ್ಲಿ 708
ದಕ್ಷಿಣ ವಲಯ – 107.3 ಓವರ್‌ಗಳಲ್ಲಿ 336

ಎರಡನೇ ಇನ್ನಿಂಗ್ಸ್:
ಪೂರ್ವ ವಲಯ – 7 ವಿಕೆಟ್‌ಗೆ 388 ಡ್ರಾ

ಪ್ರಮುಖ ಪ್ರದರ್ಶನ: ಶಿಖರ್ ಮೋಹನ್ 52, ಇಶಾನ್ ಕಿಶನ್ 80, ಕುಮಾರ್ ಕುಶಾಗ್ರ 46, ಮೊಹಮ್ಮದ್ ಕೌನೇನ್ ಖುರೇಷಿ ಅಜೇಯ 116, ಅನುಕೂಲ್ ರಾಯ್ 64.

ಬೌಲಿಂಗ್: ಮೊಹಮ್ಮದ್ ಸಿರಾಜ್ 47ಕ್ಕೆ 1, ಎಂ.ಡಿ. ನಿಧೀಶ್ 28ಕ್ಕೆ 2.

ಪಂದ್ಯ ಶ್ರೇಷ್ಠ: ಇಶಾನ್ ಕಿಶನ್
ಸರಣಿ ಶ್ರೇಷ್ಠ: ತಿಲಕ್ ವರ್ಮಾ

ಬೆಂಗಳೂರು

‘ಇದು ನನ್ನ ಸರ್ಕಾರವಲ್ಲ, 7 ಕೋಟಿ ಜನರ ಸರ್ಕಾರ’! ಶತದಿನೋತ್ಸವದಲ್ಲಿ CM D K Shiv Kumar ಕೊಟ್ಟ ದೊಡ್ಡ ಸಂದೇಶ

Published

37 ನಿಮಿಷಗಳು ago

ಸೆಪ್ಟೆಂಬರ್ 10, 2026

J S Vasudev

ಬೆಂಗಳೂರು: ಕರ್ನಾಟಕ ಸರ್ಕಾರದ ಗ್ಯಾರಂಟಿ ಯೋಜನೆಗಳನ್ನು ಪ್ರಧಾನಿ ಹಾಗೂ ವಿಪಕ್ಷಗಳು ಟೀಕಿಸಿದ್ದವು. ಆದರೆ ಇದೀಗ ಇದೇ ಕರ್ನಾಟಕದ ಗ್ಯಾರಂಟಿ ಮಾದರಿ ದೇಶದ ವಿವಿಧೆಡೆ ಕಾಣಿಸಿಕೊಳ್ಳುತ್ತಿದ್ದು, ವಿಶ್ವದ ಹಲವು ದೇಶಗಳು ಇದನ್ನು ಒಪ್ಪಿಕೊಂಡಿವೆ ಎಂದು CM D K Shiv Kumar ಹೇಳಿದ್ದಾರೆ.

ವಿಧಾನಸೌಧದ ಬ್ಯಾಂಕ್ವೆಟ್ ಹಾಲ್‌ನಲ್ಲಿ ನಡೆದ ತಮ್ಮ ನೇತೃತ್ವದ ಸರ್ಕಾರದ 100 ದಿನಗಳ ಆಡಳಿತ ಶತದಿನೋತ್ಸವ ಕಾರ್ಯಕ್ರಮದಲ್ಲಿ ಮಾತನಾಡಿದ ಅವರು, ಸರ್ಕಾರದ ಸಾಧನೆಗಳು ಹಾಗೂ ಗ್ಯಾರಂಟಿ ಯೋಜನೆಗಳ ಜಾರಿ ಕುರಿತು ವಿವರಿಸಿದರು.

‘ಇದು ಡಿ.ಕೆ. ಶಿವಕುಮಾರ್ ಸರ್ಕಾರವಲ್ಲ’

ಶತದಿನೋತ್ಸವ ಕಾರ್ಯಕ್ರಮದಲ್ಲಿ ಮಾತನಾಡಿದ ಡಿ.ಕೆ. ಶಿವಕುಮಾರ್, ಇದು ಕೇವಲ 100 ದಿನಗಳ ಆಚರಣೆಯಲ್ಲ ಎಂದು ಹೇಳಿದರು.

“ಇದು ಡಿ.ಕೆ. ಶಿವಕುಮಾರ್ ಸರ್ಕಾರ ಅಲ್ಲ. ಇದು ನಿಮ್ಮ ಸರ್ಕಾರ. 7 ಕೋಟಿ ಜನತೆಯ ಸರ್ಕಾರ” ಎಂದು ಹೇಳಿದ ಅವರು, ತಾನೊಬ್ಬನೇ ಸರ್ಕಾರದ ರಥ ಎಳೆಯುತ್ತಿಲ್ಲ. ಸರ್ಕಾರ ಹಲವು ಆಲೋಚನೆಗಳೊಂದಿಗೆ ರಾಜ್ಯದ ಪ್ರಗತಿಗೆ ಕೆಲಸ ಮಾಡುತ್ತಿದೆ ಎಂದರು.

ಎಲ್ಲಾ ಸಚಿವರು, 224 ಶಾಸಕರು, 75 ವಿಧಾನ ಪರಿಷತ್ ಸದಸ್ಯರು, 12 ರಾಜ್ಯಸಭಾ ಸದಸ್ಯರು ಹಾಗೂ 28 ಲೋಕಸಭಾ ಸದಸ್ಯರು ಒಟ್ಟಾಗಿ ನಾಡಿನ ಮತ್ತು ದೇಶದ ಹಿತಕ್ಕಾಗಿ ಸಂವಿಧಾನಬದ್ಧವಾಗಿ ಕೆಲಸ ಮಾಡುತ್ತಿದ್ದಾರೆ ಎಂದು ತಿಳಿಸಿದರು.

ರಾಗ, ದ್ವೇಷವಿಲ್ಲದೆ ಎಲ್ಲರನ್ನೂ ಸಮಾನವಾಗಿ ಕಾಣುವ ಸರ್ಕಾರ ತಮ್ಮದು ಎಂದು ಹೇಳಿದರು.

ಗ್ಯಾರಂಟಿ ಯೋಜನೆಗಳಿಗೆ ₹1,45,416 ಕೋಟಿ

ಜನರ ಜೀವನಕ್ಕೆ ನೆರವಾಗುವ ಗ್ಯಾರಂಟಿ ಯೋಜನೆಗಳಿಗಾಗಿ ₹1,45,416 ಕೋಟಿ ಹಣ ನೀಡಲಾಗಿದೆ ಎಂದು ಡಿ.ಕೆ. ಶಿವಕುಮಾರ್ ತಿಳಿಸಿದರು.

ಗ್ಯಾರಂಟಿ ಯೋಜನೆಗಳನ್ನು ಜಾರಿ ಮಾಡಲು ಸಾಧ್ಯವಿಲ್ಲ ಎಂದು ಟೀಕೆಗಳು ಕೇಳಿಬಂದಿದ್ದವು. ಆದರೆ ಸರ್ಕಾರ ಯೋಜನೆಗಳನ್ನು ಯಶಸ್ವಿಯಾಗಿ ಜಾರಿಗೊಳಿಸಿದೆ ಎಂದು ಅವರು ಸಮರ್ಥಿಸಿಕೊಂಡರು.

ಗೃಹಲಕ್ಷ್ಮಿ

ಗೃಹಲಕ್ಷ್ಮಿ ಯೋಜನೆಯಡಿ 1.24 ಕೋಟಿ ಮಹಿಳೆಯರಿಗೆ ಹಣ ತಲುಪಿದೆ. ಪ್ರತಿ ಮಹಿಳೆಗೆ ಒಟ್ಟು ₹66 ಸಾವಿರ ಹಣ ಸಿಕ್ಕಿದೆ ಎಂದು ಮುಖ್ಯಮಂತ್ರಿ ತಿಳಿಸಿದರು.

ಗೃಹಜ್ಯೋತಿ

ಗೃಹಜ್ಯೋತಿ ಯೋಜನೆಯ ಸೌಲಭ್ಯವನ್ನು 1.67 ಕೋಟಿ ಜನರಿಗೆ ನೀಡಲಾಗಿದ್ದು, ಇದಕ್ಕಾಗಿ ₹30,522 ಕೋಟಿ ಖರ್ಚು ಮಾಡಲಾಗಿದೆ ಎಂದು ಹೇಳಿದರು.

ಅನ್ನಭಾಗ್ಯ

ಅನ್ನಭಾಗ್ಯ ಯೋಜನೆಯಡಿ 4.44 ಕೋಟಿ ಜನರಿಗೆ ಸೌಲಭ್ಯ ನೀಡಲಾಗಿದೆ. ಇದಕ್ಕಾಗಿ ₹21,054 ಕೋಟಿ ವೆಚ್ಚ ಮಾಡಲಾಗಿದೆ ಎಂದು ವಿವರಿಸಿದರು.

ಶಕ್ತಿ ಯೋಜನೆ

ಶಕ್ತಿ ಯೋಜನೆಯಡಿ 821 ಕೋಟಿ ಉಚಿತ ಬಸ್ ಪ್ರಯಾಣಗಳು ನಡೆದಿದ್ದು, ಇದಕ್ಕಾಗಿ ₹15,735 ಕೋಟಿ ಖರ್ಚು ಮಾಡಲಾಗಿದೆ ಎಂದು ಡಿಕೆಶಿ ತಿಳಿಸಿದರು. ಶಕ್ತಿ ಯೋಜನೆಗೆ ಸ್ಮಾರ್ಟ್ ಕಾರ್ಡ್ ನೀಡುವ ನಿರ್ಧಾರವನ್ನು ಸಚಿವ ಸಂಪುಟ ಕೈಗೊಂಡಿದೆ ಎಂದರು.

ಯುವನಿಧಿ

ಯುವನಿಧಿ ಯೋಜನೆಯಡಿ 3.72 ಲಕ್ಷ ಯುವಕರಿಗೆ ಸೌಲಭ್ಯ ನೀಡಲಾಗಿದ್ದು, ಇದಕ್ಕಾಗಿ ₹1,154 ಕೋಟಿ ಖರ್ಚು ಮಾಡಲಾಗಿದೆ ಎಂದು ಮಾಹಿತಿ ನೀಡಿದರು.

‘ಯಾವುದೇ ಗ್ಯಾರಂಟಿ ಯೋಜನೆ ನಿಲ್ಲಿಸಲು ಸಾಧ್ಯವಿಲ್ಲ’

ಗ್ಯಾರಂಟಿ ಯೋಜನೆಗಳನ್ನು ಯಾವುದೇ ಕಾರಣಕ್ಕೂ ನಿಲ್ಲಿಸಲು ಸಾಧ್ಯವಿಲ್ಲ ಎಂದು ಡಿ.ಕೆ. ಶಿವಕುಮಾರ್ ಹೇಳಿದರು.

ಪ್ರಧಾನಿ ಹಾಗೂ ವಿಪಕ್ಷಗಳು ಗ್ಯಾರಂಟಿ ಯೋಜನೆಗಳ ಜಾರಿ ಬಗ್ಗೆ ಪ್ರಶ್ನಿಸಿದ್ದರು. ಆದರೆ ಇದೀಗ ಕರ್ನಾಟಕದ ಗ್ಯಾರಂಟಿ ಮಾದರಿ ಎಲ್ಲೆಡೆ ಇದೆ. ವಿಶ್ವದ ಅನೇಕ ದೇಶಗಳು ಈ ಮಾದರಿಯನ್ನು ಒಪ್ಪಿಕೊಂಡಿವೆ ಎಂದು ಅವರು ಪ್ರತಿಪಾದಿಸಿದರು.

ರೈತರಿಗೆ ₹25,652 ಕೋಟಿ ಶೂನ್ಯಬಡ್ಡಿ ಸಾಲ

ರೈತರಿಗೆ ₹25,652 ಕೋಟಿ ಶೂನ್ಯಬಡ್ಡಿ ಸಾಲ ನೀಡಲಾಗಿದೆ ಎಂದು ಡಿಕೆಶಿ ತಿಳಿಸಿದರು.

ನೀರಾವರಿ ಯೋಜನೆಗಳಿಗೆ ₹17 ಸಾವಿರ ಕೋಟಿ ನೀಡಲಾಗಿದ್ದು, 121 ಯೋಜನೆಗಳನ್ನು ಕೈಗೊಳ್ಳಲಾಗಿದೆ. ಕಲ್ಯಾಣ ಕರ್ನಾಟಕ ಪ್ರದೇಶಾಭಿವೃದ್ಧಿ ಮಂಡಳಿಗೆ (KKRDB) ₹5 ಸಾವಿರ ಕೋಟಿ ನೀಡಲಾಗಿದೆ ಎಂದು ವಿವರಿಸಿದರು.

ಆರೋಗ್ಯ ಮತ್ತು ಶಿಕ್ಷಣ ಕ್ಷೇತ್ರದಲ್ಲೂ ಸಾಧನೆ

ಗೃಹ ಆರೋಗ್ಯ ಯೋಜನೆಯಡಿ ಮನೆ ಮನೆಗೆ ತೆರಳಿ 88 ಲಕ್ಷ ಜನರ ತಪಾಸಣೆ ನಡೆಸಲಾಗಿದೆ ಎಂದು ಮುಖ್ಯಮಂತ್ರಿ ತಿಳಿಸಿದರು. ಹೃದಯ ಜ್ಯೋತಿ ಯೋಜನೆಯಡಿ 21,658 ಪ್ರಕರಣಗಳನ್ನು ನೋಡಿಕೊಳ್ಳಲಾಗಿದೆ ಎಂದರು.

ಮಕ್ಕಳಿಗೆ ವಾರದಲ್ಲಿ 6 ದಿನ ಮೊಟ್ಟೆ ನೀಡಲಾಗುತ್ತಿದೆ. ವಿದ್ಯಾರ್ಥಿಗಳಿಗೆ ಉಚಿತ ಬಸ್ ಪಾಸ್ ನೀಡಲಾಗಿದೆ ಎಂದು ಹೇಳಿದರು.

₹2.53 ಲಕ್ಷ ಕೋಟಿ ಬಂಡವಾಳ ಹೂಡಿಕೆ

2023ರಿಂದ ರಾಜ್ಯಕ್ಕೆ ₹2.53 ಲಕ್ಷ ಕೋಟಿ ಬಂಡವಾಳ ಹೂಡಿಕೆ ಬಂದಿದೆ ಎಂದು ಡಿ.ಕೆ. ಶಿವಕುಮಾರ್ ತಿಳಿಸಿದರು.

ವಿದೇಶಿ ನೇರ ಹೂಡಿಕೆಯಲ್ಲಿ ಕರ್ನಾಟಕ ಎರಡನೇ ಸ್ಥಾನದಲ್ಲಿದ್ದು, ಸುಮಾರು 6 ಲಕ್ಷ ಉದ್ಯೋಗಗಳು ಸೃಷ್ಟಿಯಾಗಲಿವೆ ಎಂದು ಅವರು ಹೇಳಿದರು.

ಬೆಂಗಳೂರಿಗೆ ₹2 ಸಾವಿರ ಕೋಟಿ

ಬೆಂಗಳೂರು ರಸ್ತೆ ಅಭಿವೃದ್ಧಿಗೆ ₹2 ಸಾವಿರ ಕೋಟಿ ನೀಡಲಾಗಿದೆ ಎಂದು ಡಿಕೆಶಿ ತಿಳಿಸಿದರು. ಬಿ ಖಾತಾ ಆಸ್ತಿಗಳಿಗೆ ಎ ಖಾತಾ ನೀಡುವ ಪ್ರಕ್ರಿಯೆ ನಡೆಯುತ್ತಿದೆ ಎಂದರು.

ಇದರ ಜತೆಗೆ 2,400 ಚದರ ಅಡಿ ಹಾಗೂ ಅದಕ್ಕಿಂತ ಹೆಚ್ಚಿನ ವಿಸ್ತೀರ್ಣದ ಮನೆಗಳಿಗೆ ಒಸಿ-ಸಿಸಿ ನೀಡಲಾಗುತ್ತಿದೆ. ವಿಶೇಷ ರೌಡಿ ನಿಗ್ರಹ ದಳ ಸ್ಥಾಪಿಸಲಾಗಿದೆ ಎಂದು ಮಾಹಿತಿ ನೀಡಿದರು.

‘ಭಯಮುಕ್ತ ಕರ್ನಾಟಕ ನಿರ್ಮಿಸಿದ್ದೇವೆ’

ಭಯಮುಕ್ತ ಕರ್ನಾಟಕ ನಿರ್ಮಿಸುವ ನಿಟ್ಟಿನಲ್ಲಿ ಸರ್ಕಾರ ಕೆಲಸ ಮಾಡಿದೆ ಎಂದು ಡಿ.ಕೆ. ಶಿವಕುಮಾರ್ ಹೇಳಿದರು.

ದಕ್ಷಿಣ ಭಾರತಕ್ಕೆ ಕರ್ನಾಟಕ ಧ್ವನಿಯಾಗಿ ಕೆಲಸ ಮಾಡುತ್ತಿದೆ ಎಂದ ಅವರು, ತುಂಗಭದ್ರಾ ಜಲಾಶಯದ ಗೇಟ್ ಸಮಸ್ಯೆ ಪರಿಹರಿಸಿದ್ದೇವೆ. ಮೂರು ರಾಜ್ಯಗಳ ಮುಖ್ಯಮಂತ್ರಿಗಳು ಬಂದಿದ್ದರು ಹಾಗೂ ಕೇಂದ್ರ ಸಚಿವರೊಂದಿಗೆ ಮಾತುಕತೆ ನಡೆಸಿದ್ದೇವೆ ಎಂದು ತಿಳಿಸಿದರು.

ಮೇಕೆದಾಟು ಯೋಜನೆಗೆ ಸಂಬಂಧಿಸಿದಂತೆ ಸುಪ್ರೀಂ ಕೋರ್ಟ್ ತೀರ್ಪು ಬಂದಿರುವುದನ್ನೂ ಸರ್ಕಾರದ ಸಾಧನೆಗಳಲ್ಲಿ ಒಂದಾಗಿ ಅವರು ಉಲ್ಲೇಖಿಸಿದರು.

ಒಟ್ಟಾರೆ, 100 ದಿನಗಳ ಶತದಿನೋತ್ಸವ ಕಾರ್ಯಕ್ರಮದಲ್ಲಿ ಡಿ.ಕೆ. ಶಿವಕುಮಾರ್ ಅವರು ಗ್ಯಾರಂಟಿ ಯೋಜನೆಗಳಿಂದ ಹಿಡಿದು ಹೂಡಿಕೆ, ಉದ್ಯೋಗ, ನೀರಾವರಿ, ಆರೋಗ್ಯ ಮತ್ತು ಬೆಂಗಳೂರು ಅಭಿವೃದ್ಧಿವರೆಗೆ ಸರ್ಕಾರದ ಹಲವು ಸಾಧನೆಗಳನ್ನು ವಿವರಿಸಿದರು.