AI ಅಭಿವೃದ್ಧಿ ನಿಧಾನಗೊಳಿಸಲು ಒಪ್ಪಂದ? Anthropic, OpenAI, Google ವಿರುದ್ಧ ಕೇಸ್

ವಾಷಿಂಗ್ಟನ್: ಕೃತಕ ಬುದ್ಧಿಮತ್ತೆ (AI) ಅಭಿವೃದ್ಧಿಯ ವೇಗವನ್ನು ಕಡಿಮೆ ಮಾಡಲು ಪರಸ್ಪರ ಒಪ್ಪಂದ ಮಾಡಿಕೊಂಡಿದ್ದಾರೆ ಎಂಬ ಆರೋಪದ ಮೇಲೆ Anthropic, OpenAI, SpaceXAI ಮತ್ತು Google ವಿರುದ್ಧ ಅಮೆರಿಕದಲ್ಲಿ ಹೊಸ ಆಂಟಿಟ್ರಸ್ಟ್ ಮೊಕದ್ದಮೆ ದಾಖಲಾಗಿದೆ. ಸೆಪ್ಟೆಂಬರ್ 18ರಂದು ಕ್ಯಾಲಿಫೋರ್ನಿಯಾದ ಉತ್ತರ ಜಿಲ್ಲೆ ಫೆಡರಲ್ ನ್ಯಾಯಾಲಯದಲ್ಲಿ ಪ್ರಕರಣ ದಾಖಲಿಸಲಾಗಿದೆ.

ಮೊಕದ್ದಮೆ ದಾಖಲಿಸಿರುವ ಗ್ರಾಹಕರು, ಈ ಕಂಪನಿಗಳ ನಡುವಿನ ಸಂಯೋಜಿತ ಕ್ರಮವು AI ಉತ್ಪನ್ನಗಳ ಅಭಿವೃದ್ಧಿ ಮತ್ತು ಸ್ಪರ್ಧೆಯ ವೇಗವನ್ನು ಕಡಿಮೆ ಮಾಡಬಹುದು. ಇದರಿಂದ ChatGPT, Claude, Grok ಮತ್ತು Gemini ಮುಂತಾದ ಪಾವತಿದಾರರಿಗೆ ದೊರೆಯುವ ಸೇವೆಯ ಮೌಲ್ಯ ಕುಗ್ಗಬಹುದು ಎಂದು ವಾದಿಸಿದ್ದಾರೆ.

ಸೆಪ್ಟೆಂಬರ್ 12ರ ಹೇಳಿಕೆಗಳೇ ಪ್ರಕರಣದ ಕೇಂದ್ರಬಿಂದು

ಮೊಕದ್ದಮೆಯ ಪ್ರಕಾರ, ಸೆಪ್ಟೆಂಬರ್ 12ರಂದು Anthropic CEO ಡಾರಿಯೋ ಅಮೋಡೆi ಅವರು AI ಅಭಿವೃದ್ಧಿಯ ವೇಗವನ್ನು ಸುರಕ್ಷತಾ ಕ್ರಮಗಳಿಗೆ ಅನುಗುಣವಾಗಿ ನಿಯಂತ್ರಿಸುವಂತೆ ಉದ್ಯಮದಾದ್ಯಂತ ಸಹಕಾರಕ್ಕೆ ಕರೆ ನೀಡಿದ್ದರು.

ಅದಾದ ಬಳಿಕ OpenAI CEO ಸ್ಯಾಮ್ ಆಲ್ಟ್‌ಮನ್, SpaceXAIನ ಎಲಾನ್ ಮಸ್ಕ್ ಹಾಗೂ Google DeepMindನ ಡೆಮಿಸ್ ಹ್ಯಾಸಾಬಿಸ್ ಅವರು ಸಾರ್ವಜನಿಕವಾಗಿ ಈ ಪ್ರಸ್ತಾವನೆಗೆ ಬೆಂಬಲ ವ್ಯಕ್ತಪಡಿಸಿದ್ದರು ಎಂದು ದೂರುದಾರರು ಹೇಳಿದ್ದಾರೆ. ಈ ಹೇಳಿಕೆಗಳನ್ನೇ ಕಂಪನಿಗಳ ನಡುವಿನ ಸಮನ್ವಯದ ಸಾಕ್ಷ್ಯವಾಗಿ ಮೊಕದ್ದಮೆಯಲ್ಲಿ ಉಲ್ಲೇಖಿಸಲಾಗಿದೆ.

‘ಸ್ಪರ್ಧೆಯನ್ನು ಕಡಿಮೆ ಮಾಡುವ ಒಪ್ಪಂದ’ ಎಂದು ಆರೋಪ

ಸ್ಪರ್ಧಾತ್ಮಕ ಕಂಪನಿಗಳು ಒಟ್ಟಾಗಿ ತಮ್ಮ ಉತ್ಪನ್ನಗಳ ಅಭಿವೃದ್ಧಿಯ ವೇಗವನ್ನು ಕಡಿಮೆ ಮಾಡಲು ಒಪ್ಪಿಕೊಳ್ಳುವುದು ಅಮೆರಿಕದ ಆಂಟಿಟ್ರಸ್ಟ್ ಕಾನೂನುಗಳಿಗೆ ವಿರುದ್ಧವಾಗಬಹುದು ಎಂದು ದೂರುದಾರರು ವಾದಿಸಿದ್ದಾರೆ.

ನಾಲ್ವರು ಗ್ರಾಹಕರು ತಮ್ಮ ಪರವಾಗಿ ಹಾಗೂ ದೇಶಾದ್ಯಂತ ಇರುವ ಇತರ ಪಾವತಿದಾರರ ಪರವಾಗಿ ಕ್ಲಾಸ್-ಆಕ್ಷನ್ ಪ್ರಕರಣ ದಾಖಲಿಸಿದ್ದಾರೆ. ChatGPT, Claude, Grok ಅಥವಾ Gemini ಸೇವೆಗಳಿಗೆ ಹಣ ಪಾವತಿಸುವ ಗ್ರಾಹಕರು ಈ ಪ್ರಸ್ತಾವಿತ ವರ್ಗದಲ್ಲಿ ಸೇರಿದ್ದಾರೆ.

AI ಸುರಕ್ಷತೆ ಕುರಿತು ಅಮೋಡೆi ಪ್ರಸ್ತಾವನೆ

Anthropic CEO ಡಾರಿಯೋ ಅಮೋಡೆi ಅವರು AI ವ್ಯವಸ್ಥೆಗಳ ಸಾಮರ್ಥ್ಯ ವೇಗವಾಗಿ ಹೆಚ್ಚುತ್ತಿರುವ ಹಿನ್ನೆಲೆಯಲ್ಲಿ ಹೆಚ್ಚಿನ ಸುರಕ್ಷತಾ ಕ್ರಮಗಳ ಅಗತ್ಯವಿದೆ ಎಂದು ವಾದಿಸಿದ್ದರು. ಉದ್ಯಮದ ಪ್ರಮುಖ AI ಲ್ಯಾಬ್‌ಗಳ ನಡುವೆ ಸುರಕ್ಷತಾ ವಿಚಾರಗಳಲ್ಲಿ ಸಹಕಾರದ ಅಗತ್ಯವಿದೆ ಎಂದು ಅವರು ಪ್ರಸ್ತಾಪಿಸಿದ್ದರು.

ಇಂತಹ ಚರ್ಚೆಗಳಿಗೆ ಅಮೆರಿಕ ಸರ್ಕಾರ ಮಧ್ಯಸ್ಥಿಕೆ ವಹಿಸುವುದು ಅಥವಾ ನಿರ್ದಿಷ್ಟ ಸುರಕ್ಷತಾ ಚರ್ಚೆಗಳಿಗೆ ಸೀಮಿತ ಆಂಟಿಟ್ರಸ್ಟ್ ವಿನಾಯಿತಿ ನೀಡುವುದು ಸಹಾಯಕವಾಗಬಹುದು ಎಂದು ಅಮೋಡೆi ತಮ್ಮ ಪ್ರಸ್ತಾವನೆಯಲ್ಲಿ ಉಲ್ಲೇಖಿಸಿದ್ದರು.

OpenAI CEO ಸ್ಯಾಮ್ ಆಲ್ಟ್‌ಮನ್ ಅವರು ಏಕರೂಪದ ಸುರಕ್ಷತಾ ಮಾನದಂಡಗಳನ್ನು ರೂಪಿಸುವ ಫೆಡರಲ್ ಚೌಕಟ್ಟಿಗೆ ಬೆಂಬಲ ವ್ಯಕ್ತಪಡಿಸಿದ್ದರೂ, ಇಂತಹ ಸುರಕ್ಷತಾ ಕೆಲಸ ಆರಂಭಿಸಲು ಆಂಟಿಟ್ರಸ್ಟ್ ವಿನಾಯಿತಿ ಅಥವಾ ಹೊಸ ಕಾನೂನಿಗಾಗಿ ಕಾಯಬೇಕಾಗಿಲ್ಲ ಎಂದು ಹೇಳಿದ್ದಾರೆ.

ಕಂಪನಿಗಳಿಂದ ತಕ್ಷಣದ ಪ್ರತಿಕ್ರಿಯೆ ಇಲ್ಲ

Anthropic, OpenAI, Google ಮತ್ತು SpaceXAI ಪ್ರತಿನಿಧಿಗಳು ಮೊಕದ್ದಮೆ ಕುರಿತು ತಕ್ಷಣ ಪ್ರತಿಕ್ರಿಯಿಸಿಲ್ಲ ಎಂದು ವರದಿಯಾಗಿದೆ. ಪ್ರಕರಣದ ಆರೋಪಗಳು ಇನ್ನೂ ನ್ಯಾಯಾಲಯದಲ್ಲಿ ಸಾಬೀತಾಗಿಲ್ಲ ಮತ್ತು ಮುಂದಿನ ಕಾನೂನು ಪ್ರಕ್ರಿಯೆಯಲ್ಲಿ ಕಂಪನಿಗಳಿಗೆ ತಮ್ಮ ವಾದ ಮಂಡಿಸುವ ಅವಕಾಶವಿದೆ.