Bengaluru 12,774 ನೀರು ಕಳ್ಳರು ಪತ್ತೆ! ಜಲಮಂಡಳಿಯಿಂದ ಬಿಗ್ ಆಪರೇಷನ್

ಬೆಂಗಳೂರು: ರಾಜಧಾನಿ Bengaluru ನಲ್ಲಿ ಅಕ್ರಮವಾಗಿ ನೀರಿನ ಸಂಪರ್ಕ ಪಡೆದು ಕದ್ದುಮುಚ್ಚಿ ನೀರು ಬಳಸುತ್ತಿದ್ದ 12,774 ಅಕ್ರಮ ನೀರಿನ ಸಂಪರ್ಕಗಳು ಬೆಂಗಳೂರು ಜಲಮಂಡಳಿ (BWSSB) ನಡೆಸಿದ ತಪಾಸಣೆಯಲ್ಲಿ ಪತ್ತೆಯಾಗಿವೆ. ನಗರದಾದ್ಯಂತ ಒಟ್ಟು 79,275 ಕಟ್ಟಡಗಳಿಗೆ ದಿಢೀರ್ ಭೇಟಿ ನೀಡಿ ಪರಿಶೀಲನೆ ನಡೆಸಿದ ಸಂದರ್ಭದಲ್ಲಿ ಈ ಅಕ್ರಮ ಸಂಪರ್ಕಗಳು ಬೆಳಕಿಗೆ ಬಂದಿವೆ.

ಅಕ್ರಮ ನೀರಿನ ಸಂಪರ್ಕ ಪತ್ತೆಹಚ್ಚಲು ಜಲಮಂಡಳಿ ಈಗಾಗಲೇ ‘ಬ್ಲೂ ಫೋರ್ಸ್’ ತಂಡಗಳನ್ನು ರಚಿಸಿ ಕಾರ್ಯಾಚರಣೆ ನಡೆಸುತ್ತಿದೆ. ಸಾಮಾನ್ಯವಾಗಿ ಬೇಸಿಗೆ ಅವಧಿಯಲ್ಲಿ ಹೆಚ್ಚಿನ ಪ್ರಮಾಣದಲ್ಲಿ ನಡೆಯುತ್ತಿದ್ದ ಈ ತಪಾಸಣೆಯನ್ನು ಇನ್ನು ಮುಂದೆ ವರ್ಷವಿಡೀ ಮುಂದುವರಿಸಲು ಅಧಿಕಾರಿಗಳು ನಿರ್ಧರಿಸಿದ್ದಾರೆ.

11 ಲಕ್ಷ ಸಂಪರ್ಕಗಳಿಗೆ 2,225 MLD ನೀರು

ಜಲಮಂಡಳಿ ಪ್ರಸ್ತುತ ಬೆಂಗಳೂರಿನ 11 ಲಕ್ಷಕ್ಕೂ ಅಧಿಕ ಅಧಿಕೃತ ನೀರಿನ ಸಂಪರ್ಕಗಳಿಗೆ ಪ್ರತಿದಿನ ಸುಮಾರು 2,225 ಮಿಲಿಯನ್ ಲೀಟರ್ (MLD) ನೀರು ಪೂರೈಸುತ್ತಿದೆ. ನಗರದ ವಿಸ್ತರಣೆ ಹಾಗೂ ಹೊಸ ಪ್ರದೇಶಗಳಿಗೆ ಕಾವೇರಿ ನೀರು ಪೂರೈಸುವ ಯೋಜನೆಗಳ ನಡುವೆ ಅಕ್ರಮ ನೀರಿನ ಸಂಪರ್ಕಗಳು ಜಲ ಸಂಪನ್ಮೂಲದ ಮೇಲಿನ ಒತ್ತಡವನ್ನು ಮತ್ತಷ್ಟು ಹೆಚ್ಚಿಸುತ್ತಿವೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.

ಈ ವರ್ಷ ಮುಂಗಾರು ಮಳೆಯಲ್ಲಿನ ಏರಿಳಿತದ ಹಿನ್ನೆಲೆಯಲ್ಲಿ ಕಾವೇರಿ ನೀರನ್ನು ಮಿತವಾಗಿ ಬಳಸುವಂತೆ ಜಲಮಂಡಳಿ ಸಾರ್ವಜನಿಕರಿಗೆ ಸೂಚನೆ ನೀಡಿದೆ. ಅನಗತ್ಯ ನೀರು ಬಳಕೆಯನ್ನು ತಪ್ಪಿಸುವಂತೆಯೂ ಮನವಿ ಮಾಡಿದೆ.

ಮಳೆನೀರು ಚರಂಡಿಗೆ ಬಿಟ್ಟರೆ ಮ್ಯಾನ್‌ಹೋಲ್ ಉಕ್ಕು!

ಬೆಂಗಳೂರಿನಲ್ಲಿ ಮಳೆ ಬಂದಾಗ ಹಲವು ಪ್ರದೇಶಗಳಲ್ಲಿ ಮ್ಯಾನ್‌ಹೋಲ್‌ಗಳು ಉಕ್ಕಿ ಹರಿಯಲು ಕಟ್ಟಡಗಳ ಅಕ್ರಮ ಮಳೆನೀರು ಸಂಪರ್ಕವೂ ಪ್ರಮುಖ ಕಾರಣವಾಗಿದೆ. ಅನೇಕ ಕಟ್ಟಡ ಮಾಲೀಕರು ಮಳೆನೀರನ್ನು ಒಳಚರಂಡಿ ವ್ಯವಸ್ಥೆಗೆ ಸಂಪರ್ಕಿಸಿರುವುದು ಸಮಸ್ಯೆಗೆ ಕಾರಣವಾಗುತ್ತಿದೆ.

ಮಳೆನೀರನ್ನು ಒಳಚರಂಡಿಗೆ ಬಿಡದೆ ಸೂಕ್ತ ಮೋರಿಗಳಿಗೆ ಹರಿಸುವಂತೆ ಸೂಚನೆ ನೀಡಿದ್ದರೂ ನಿಯಮ ಉಲ್ಲಂಘನೆ ಮುಂದುವರಿದಿದೆ.

ಈ ಹಿನ್ನೆಲೆಯಲ್ಲಿ ಜಲಮಂಡಳಿ ಮೇ 2026ರವರೆಗೆ 8,638 ಕಟ್ಟಡಗಳನ್ನು ಸಮೀಕ್ಷೆ ನಡೆಸಿದ್ದು, ಈ ಪೈಕಿ 1,325 ಅನಧಿಕೃತ ಒಳಚರಂಡಿ ಸಂಪರ್ಕಗಳು ಪತ್ತೆಯಾಗಿವೆ. ಸಂಬಂಧಪಟ್ಟ ಕಟ್ಟಡ ಮಾಲೀಕರಿಗೆ ಎಚ್ಚರಿಕೆ ನೀಡಿ ಅನಧಿಕೃತ ಸಂಪರ್ಕಗಳನ್ನು ತೆರವುಗೊಳಿಸಲಾಗಿದೆ. ಅರ್ಹ ಆಸ್ತಿ ಮಾಲೀಕರಿಗೆ ಅಗತ್ಯ ಪ್ರಕ್ರಿಯೆ ಪೂರ್ಣಗೊಳಿಸಿದ ಬಳಿಕ ಅಧಿಕೃತ ಒಳಚರಂಡಿ ಸಂಪರ್ಕ ಕಲ್ಪಿಸಲಾಗಿದೆ.

ಅಕ್ರಮ ಸಂಪರ್ಕಕ್ಕೆ ಸಕ್ರಮದ ಅವಕಾಶವೇ?

ಅಕ್ರಮವಾಗಿ ನೀರಿನ ಸಂಪರ್ಕ ಪಡೆದಿರುವವರ ಸಂಪರ್ಕವನ್ನು ಶಾಶ್ವತವಾಗಿ ಕಡಿತಗೊಳಿಸುವ ಬದಲು, ಕೆಲ ಪ್ರಕರಣಗಳಲ್ಲಿ ಜಲಮಂಡಳಿ ನೋಟಿಸ್ ನೀಡಿ ನಿಗದಿತ ಸಂಪರ್ಕ ಶುಲ್ಕ ಮತ್ತು ದಂಡ ಪಾವತಿಸಿ ಸಂಪರ್ಕವನ್ನು ಸಕ್ರಮಗೊಳಿಸಿಕೊಳ್ಳಲು ಅವಕಾಶ ನೀಡುತ್ತಿದೆ.

ಆದರೆ ಈ ಕ್ರಮದಿಂದ ಅಕ್ರಮ ಸಂಪರ್ಕ ಪಡೆಯುವವರಿಗೆ ಪರೋಕ್ಷವಾಗಿ ಪ್ರೋತ್ಸಾಹ ಸಿಗಬಹುದು ಎಂಬ ಆತಂಕವನ್ನು ತಜ್ಞರು ವ್ಯಕ್ತಪಡಿಸಿದ್ದಾರೆ. ಅಕ್ರಮ ಸಂಪರ್ಕ ಪಡೆಯದಂತೆ ಕಠಿಣ ಕ್ರಮ ಕೈಗೊಳ್ಳುವುದರ ಜೊತೆಗೆ, ಅಧಿಕೃತ ನೀರಿನ ಸಂಪರ್ಕಕ್ಕೆ ಅರ್ಜಿ ಸಲ್ಲಿಸುವವರಿಗೆ ತ್ವರಿತವಾಗಿ ಸಂಪರ್ಕ ಕಲ್ಪಿಸುವ ವ್ಯವಸ್ಥೆ ರೂಪಿಸಬೇಕು ಎಂದು ಅವರು ಸಲಹೆ ನೀಡಿದ್ದಾರೆ.