ಸಿನಿಮಾ

Kamal Haasan ಗೆ 67ರ ಸಂಭ್ರಮ: ‘ಕಮಲಿಸಂ’ ಹವಾ; ವೈರಲ್ ಆಯ್ತು RKFI ವಿಶೇಷ ಪ್ರೋಮೋ!

Published

on

ಚೆನ್ನೈ: ಭಾರತೀಯ ಚಿತ್ರರಂಗದ ಬಹುಮುಖ ಪ್ರತಿಭೆ, ನಟ ಹಾಗೂ ನಿರ್ಮಾಪಕ Kamal Haasan ಅವರ ಸುದೀರ್ಘ ಸಿನಿಪಯಣಕ್ಕೆ 67ನೇ ವರ್ಷದ ಸಂಭ್ರಮದ ಗೌರವ ಸಲ್ಲಿಸಲಾಗುತ್ತಿದೆ. ಕಮಲ್ ಹಾಸನ್ ಅವರ ನಿರ್ಮಾಣ ಸಂಸ್ಥೆ ರಾಜ್ ಕಮಲ್ ಫಿಲ್ಮ್ಸ್ ಇಂಟರ್‌ನ್ಯಾಷನಲ್ (RKFI) ವಿಶೇಷ ಪ್ರೋಮೋ ಬಿಡುಗಡೆ ಮಾಡುವ ಮೂಲಕ ಈ ಆಚರಣೆಗೆ ಚಾಲನೆ ನೀಡಿದ್ದು, ಸಾಮಾಜಿಕ ಜಾಲತಾಣಗಳಲ್ಲಿ ಅಭಿಮಾನಿಗಳು ಭರ್ಜರಿ ಸಂಭ್ರಮ ವ್ಯಕ್ತಪಡಿಸುತ್ತಿದ್ದಾರೆ.

RKFI ತನ್ನ ಅಧಿಕೃತ ಸಾಮಾಜಿಕ ಮಾಧ್ಯಮ ಖಾತೆಗಳಲ್ಲಿ #67YearsOfKamalism ಅಭಿಯಾನವನ್ನು ಮುನ್ನಡೆಸಿದೆ. ‘ಒನ್ ಚೈಲ್ಡ್, ಒನ್ ಬಿಗಿನಿಂಗ್, ಒನ್ ಫಿನೋಮ್ – ಹಿಸ್ ಎರಾ’ ಎಂಬ ಟ್ಯಾಗ್‌ಲೈನ್‌ನೊಂದಿಗೆ ಬಿಡುಗಡೆಯಾಗಿರುವ ಪ್ರೋಮೋದಲ್ಲಿ ಆಕರ್ಷಕ ಮೋಟಾರ್‌ಸೈಕಲ್ ದೃಶ್ಯಗಳ ಮೂಲಕ ಕಮಲ್ ಹಾಸನ್ ಅವರ ವಿಶಿಷ್ಟ ಸಿನಿ ಪಯಣವನ್ನು ಬಿಂಬಿಸಲಾಗಿದೆ.

https://hosasuddi.in/wp-content/uploads/2026/08/Honble-CM-speaks-on-GBIT-new-2.mov

ಬಾಲನಟನಿಂದ ಭಾರತೀಯ ಚಿತ್ರರಂಗದ ದಿಗ್ಗಜನವರೆಗೆ

ಕಮಲ್ ಹಾಸನ್ ಅವರ ಸಿನಿಪಯಣ ಬಾಲನಟನಾಗಿ ಆರಂಭವಾಗಿ ಹಲವು ದಶಕಗಳನ್ನು ದಾಟಿದೆ. ಕೇವಲ ನಟನೆಯಲ್ಲದೆ ನಿರ್ದೇಶನ, ಚಿತ್ರಕಥೆ, ನೃತ್ಯ, ಗೀತರಚನೆ, ಗಾಯನ ಮತ್ತು ನಿರ್ಮಾಣ ಸೇರಿದಂತೆ ಚಿತ್ರರಂಗದ ಹಲವು ವಿಭಾಗಗಳಲ್ಲಿ ತಮ್ಮದೇ ಆದ ಛಾಪು ಮೂಡಿಸಿದ್ದಾರೆ.

ವಿಭಿನ್ನ ಭಾಷೆಗಳ ಸಿನಿಮಾಗಳಲ್ಲಿ ವಿಭಿನ್ನ ಪಾತ್ರಗಳನ್ನು ನಿರ್ವಹಿಸಿರುವ ಕಮಲ್ ಹಾಸನ್, ಭಾರತೀಯ ಚಿತ್ರರಂಗದ ಅತ್ಯಂತ ಪ್ರಯೋಗಶೀಲ ಹಾಗೂ ಬಹುಮುಖ ಕಲಾವಿದರಲ್ಲಿ ಒಬ್ಬರಾಗಿ ಗುರುತಿಸಿಕೊಂಡಿದ್ದಾರೆ. ಅವರ ಸುದೀರ್ಘ ವೃತ್ತಿಜೀವನದಲ್ಲಿ ಹಲವು ಪ್ರತಿಷ್ಠಿತ ಪ್ರಶಸ್ತಿಗಳು ಮತ್ತು ಗೌರವಗಳು ಸಂದಿವೆ.

ಸಾಮಾಜಿಕ ಜಾಲತಾಣದಲ್ಲಿ ‘ಕಮಲಿಸಂ’ ಹವಾ

#67YearsOfKamalism ಅಭಿಯಾನ ಆರಂಭವಾಗುತ್ತಿದ್ದಂತೆ ಅಭಿಮಾನಿಗಳು ಕಮಲ್ ಹಾಸನ್ ಅವರ ಹಳೆಯ ಹಾಗೂ ಹೊಸ ಸಿನಿಮಾಗಳ ದೃಶ್ಯಗಳು, ಪೋಸ್ಟರ್‌ಗಳು, ಫ್ಯಾನ್ ಆರ್ಟ್ ಮತ್ತು ವಿಶೇಷ ವಿಡಿಯೋಗಳನ್ನು ಸಾಮಾಜಿಕ ಜಾಲತಾಣಗಳಲ್ಲಿ ಹಂಚಿಕೊಳ್ಳುತ್ತಿದ್ದಾರೆ.

ಕಮಲ್ ಹಾಸನ್ ನಿರ್ವಹಿಸಿರುವ ವಿಭಿನ್ನ ಪಾತ್ರಗಳ ಫೋಟೋಗಳು ಹಾಗೂ ಅವರ ವೃತ್ತಿಜೀವನದ ಪ್ರಮುಖ ಘಟ್ಟಗಳನ್ನು ಒಳಗೊಂಡ ಪೋಸ್ಟರ್‌ಗಳು ಅಭಿಮಾನಿಗಳ ಗಮನ ಸೆಳೆಯುತ್ತಿವೆ. ಹಲವು ತಲೆಮಾರುಗಳ ಪ್ರೇಕ್ಷಕರನ್ನು ತಮ್ಮ ಅಭಿನಯದ ಮೂಲಕ ರಂಜಿಸಿರುವ ನಟನಿಗೆ ಈ ಅಭಿಯಾನದ ಮೂಲಕ ಅಭಿಮಾನಿಗಳು ಗೌರವ ಸಲ್ಲಿಸುತ್ತಿದ್ದಾರೆ.

ಕನ್ನಡ ಚಿತ್ರರಂಗದಲ್ಲೂ ಕಮಲ್ ಕಮಾಲ್!

ಕಮಲ್ ಹಾಸನ್ ಅವರಿಗೆ ಕನ್ನಡ ಚಿತ್ರರಂಗದೊಂದಿಗೂ ವಿಶೇಷ ನಂಟಿದೆ. ಅವರು ‘ಕೋಕಿಲ’, ‘ಬೆಂಕಿಯಲ್ಲಿ ಅರಳಿದ ಹೂವು’, ‘ತಪ್ಪಿದ ತಾಳ’, ‘ಮರಿಯಾ ಮೈ ಡಾರ್ಲಿಂಗ್’ ಸೇರಿದಂತೆ ಹಲವು ಕನ್ನಡ ಸಿನಿಮಾಗಳಲ್ಲಿ ನಟಿಸಿದ್ದಾರೆ.

ಅವರ ಮೂಕಿ ಚಿತ್ರ ‘ಪುಷ್ಪಕ ವಿಮಾನ’ ಕೂಡ ಕನ್ನಡಿಗರ ಮನಸ್ಸಿನಲ್ಲಿ ವಿಶೇಷ ಸ್ಥಾನ ಪಡೆದಿದೆ. ಹಲವು ವರ್ಷಗಳ ಬಳಿಕ ‘ರಾಮ ಶಾಮ ಭಾಮ’ ಸಿನಿಮಾದಲ್ಲಿ ಹುಬ್ಬಳ್ಳಿ-ಧಾರವಾಡ ಶೈಲಿಯ ಕನ್ನಡವನ್ನು ಮಾತನಾಡಿ ಕಮಲ್ ಹಾಸನ್ ಮತ್ತೊಮ್ಮೆ ಕನ್ನಡ ಪ್ರೇಕ್ಷಕರ ಗಮನ ಸೆಳೆದಿದ್ದರು.

ಅಭಿನಯದ ಜೊತೆಗೆ ಪ್ರಯೋಗಶೀಲತೆ ಮತ್ತು ವಿಭಿನ್ನ ಕಥೆಗಳ ಆಯ್ಕೆಯ ಮೂಲಕ ಭಾರತೀಯ ಚಿತ್ರರಂಗದಲ್ಲಿ ತಮ್ಮದೇ ಆದ ಸ್ಥಾನವನ್ನು ನಿರ್ಮಿಸಿಕೊಂಡಿರುವ ಕಮಲ್ ಹಾಸನ್ ಅವರ ಸಿನಿಪಯಣದ 67ನೇ ವರ್ಷದ ಸಂಭ್ರಮ ಇದೀಗ ಅಭಿಮಾನಿಗಳಲ್ಲಿ ವಿಶೇಷ ಉತ್ಸಾಹ ಮೂಡಿಸಿದೆ.

Trending

Exit mobile version