ಇ.ಡಿ ಕಸ್ಟಡಿಯಲ್ಲಿ ಕಿರುಕುಳ: ‘ನಾನು ಸತ್ತರೆ ಇ.ಡಿ ಅಧಿಕಾರಿಗಳೇ ಹೊಣೆ’ – ಶಾಸಕ ಕೆ.ಸಿ. ವೀರೇಂದ್ರ ಗಂಭೀರ ಆರೋಪ

ಬೆಂಗಳೂರು: ಆನ್‌ಲೈನ್ ಹಾಗೂ ಆಫ್‌ಲೈನ್ ಬೆಟ್ಟಿಂಗ್ ಪ್ರಕರಣದಲ್ಲಿ ಬಂಧಿತರಾಗಿರುವ ಚಿತ್ರದುರ್ಗ ಶಾಸಕ ಕೆ.ಸಿ. ವೀರೇಂದ್ರ, ಇನ್ಫೋರ್ಸ್‌ಮೆಂಟ್ ಡೈರೆಕ್ಟೊರೇಟ್ (ಇ.ಡಿ) ಅಧಿಕಾರಿಗಳ ವಿರುದ್ಧ ತೀವ್ರ ಆರೋಪ ಹೊರಹಾಕಿದ್ದಾರೆ. “ನಾನು ಸತ್ತರೆ ಇ.ಡಿ ಅಧಿಕಾರಿಗಳೇ ಹೊಣೆ” ಎಂದು ನ್ಯಾಯಾಲಯದ ಮುಂದೆ ಧೈರ್ಯದಿಂದ ಹೇಳಿಕೆ ನೀಡಿದ್ದಾರೆ.

ಕಸ್ಟಡಿಯಲ್ಲಿ ಮಾನವೀಯತೆ ಕಳೆದುಹೋದವರೆ?
ವೀರೇಂದ್ರ ಅವರ ಪ್ರಕಾರ, ಇ.ಡಿ ಅಧಿಕಾರಿಗಳು ತನಿಖೆಯ ಹೆಸರಿನಲ್ಲಿ ಅವರಿಗೆ ಕಿರುಕುಳ, ನಿಂದನೆ ಹಾಗೂ ಮಾನವ ಹಕ್ಕು ಉಲ್ಲಂಘನೆ ಮಾಡಿದ್ದಾರೆ. “ಅಶುದ್ಧ ನೀರು ಕುಡಿಸಿದ್ದಾರೆ, ಪ್ಲಾಸ್ಟಿಕ್ ಕಂಟೇನರ್‌ನಲ್ಲಿ ಊಟ ನೀಡಿದ್ದಾರೆ, ಕುರ್ಚಿ ಕೂಡ ಒದಗಿಸಿಲ್ಲ, ಸರಿಯಾದ ಕೋಣೆಯಲ್ಲಿಯೂ ಇರಿಸಲಾಗಿಲ್ಲ” ಎಂದು ಅವರು ಹೇಳಿದ್ದಾರೆ.

ನ್ಯಾಯಾಲಯದ ತೀವ್ರ ಪ್ರಶ್ನೆ ಮತ್ತು ಸೂಚನೆಗಳು
ಬೆಂಗಳೂರು ನಗರ 35ನೇ ಸಿಸಿಎಚ್ ನ್ಯಾಯಾಲಯದ ನ್ಯಾಯಾಧೀಶ ಸಂತೋಷ ಗಜಾನನ ಭಟ್, ಈ ಕುರಿತು ಇ.ಡಿ ಅಧಿಕಾರಿಗಳ ವಿರುದ್ಧ ಗಂಭೀರ ಪ್ರಶ್ನೆಗಳನ್ನು ಎಸೆದಿದ್ದಾರೆ. “ಯಾವ ಪ್ರಕರಣದಲ್ಲಿ ಇಸಿಐಆರ್ ದಾಖಲಿಸಿದ್ದೀರಿ? ಸೂಕ್ತ ಮಾಹಿತಿಯಿಲ್ಲದೆ ಬಂಧನೆ ಮಾಡಬಾರದು” ಎಂದು ಅವರು ಹೇಳಿದರು.

ವೀರೇಂದ್ರ ಪರ ವಕೀಲರಿಂದ ಆಕ್ಷೇಪ
ಹಿರಿಯ ವಕೀಲರಾದ ಕಿರಣ್ ಜವಳಿ ಮತ್ತು ಎಚ್‌.ಎಸ್. ಚಂದ್ರಮೌಳಿ, ವೀರೇಂದ್ರ ಬಂಧನವು ನಿಯಮಬದ್ಧವಲ್ಲ ಎಂಬ ತೀವ್ರ ಆಕ್ಷೇಪವನ್ನಿಟ್ಟಿದ್ದಾರೆ. “ಇ.ಡಿ ಅಧಿಕಾರಿಗಳು ನ್ಯಾಯಾಲಯಕ್ಕೆ ಸುಳ್ಳು ಮಾಹಿತಿ ನೀಡಿದ್ದಾರೆ, ಮತ್ತು ಬಂಧನ ಸಮಯದಲ್ಲಿ ಯಾವುದೇ ವಿವರ ನೀಡಿಲ್ಲ” ಎಂದು ಆರೋಪಿಸಿದ್ದಾರೆ.

ನ್ಯಾಯಾಲಯದ ಆದೇಶ:

• ದಿನಕ್ಕೆ 30 ನಿಮಿಷ ವಕೀಲರ ಭೇಟಿಗೆ ಅವಕಾಶ
• ಶುದ್ಧ ನೀರು, ಸರಿಯಾದ ಊಟ, ಕುರ್ಚಿ ಒದಗಿಸಬೇಕು
• ಕಸ್ಟಡಿಗೆ 14 ದಿನ ಬೇಡ – ಕೇವಲ 6 ದಿನ ಮಾತ್ರ ಅನುಮತಿ