ರಾಜ್ಯ
‘ಸು ಫ್ರಮ್ ಸೋ’ ಸಿನಿಮಾ 100 ಕೋಟಿ ಕ್ಲಬ್ನಲ್ಲಿ; ಓಟಿಟಿ ಹಕ್ಕಿಗೆ ಭಾರಿ ಬೇಡಿಕೆ, ಹಾಸ್ಯ-ಹಾರರ್ ಸಂಯೋಜನೆಯಿಂದ ಗಮನಸೆಳೆದ ಚಿತ್ರ
ಬೆಂಗಳೂರು: ವಿಭಿನ್ನ ಶೀರ್ಷಿಕೆಯಿಂದಲೇ ಪ್ರೇಕ್ಷಕರ ಗಮನ ಸೆಳೆದ ‘ಸು ಫ್ರಮ್ ಸೋ’ ಕನ್ನಡ ಚಿತ್ರವು ಈಗ 100 ಕೋಟಿ ಕ್ಲಬ್ ಸೇರಿ ಮತ್ತೊಂದು ಮೈಲುಗಲ್ಲು ಸಾಧಿಸಿದೆ. ಈ ಹಾಸ್ಯ ಹಾಗೂ ಹಾರರ್ ಮಿಶ್ರಿತ ಚಿತ್ರ ಇದೀಗ ಓಟಿಟಿ ಮತ್ತು ಸ್ಯಾಟಲೈಟ್ ಹಕ್ಕುಗಳಿಗೆ ಭಾರೀ ಬೇಡಿಕೆ ತಂದಿದೆ.
ಸಮಾಜಿಕ ಜಾಲತಾಣಗಳಲ್ಲಿ ಟ್ರೆಂಡ್ ಆಗಿ, ಮೌಖಿಕ ಪ್ರಚಾರದ ಮೂಲಕಲೇ ಜನರನ್ನು ಥಿಯೇಟರ್ವರೆಗೆ ಎಳೆದ ಈ ಚಿತ್ರ, ಟಿಕೆಟ್ ಪಡೆಯಲೂ ಸಾಧ್ಯವಿಲ್ಲ ಎನ್ನುವಷ್ಟು ಜನಪ್ರಿಯತೆ ಗಳಿಸಿತ್ತು. ಚಿತ್ರವನ್ನು ವೀಕ್ಷಿಸಿದ ಪ್ರೇಕ್ಷಕರು ಭಾರೀ ಮೆಚ್ಚುಗೆ ವ್ಯಕ್ತಪಡಿಸಿದ್ದು, ಬುಕ್ಮೈಶೋನಲ್ಲಿ 9.6 ರೇಟಿಂಗ್ ಪಡೆಯುವುದರ ಮೂಲಕ ವಿಭಿನ್ನ ಮಟ್ಟ ತಲುಪಿದೆ.
ಚಿತ್ರದ ಒಟಿಟಿ ಹಕ್ಕುಗಳನ್ನು ಜಿಯೋಸಿನಿಮಾ ಪಡೆದುಕೊಂಡಿದೆ. ಆದರೆ ಚಿತ್ರ ಯಾವಾಗ ಸ್ಟ್ರೀಮಿಂಗ್ ಆಗಲಿದೆ ಎಂಬ ಮಾಹಿತಿ ಇನ್ನೂ ಪ್ರಕಟವಾಗಿಲ್ಲ. ಇದೇ ವೇಳೆ, ಕಲರ್ಸ್ ಕನ್ನಡ ವಾಹಿನಿ ಎಲ್ಲಾ ಭಾಷೆಗಳ ಸ್ಯಾಟಲೈಟ್ ಹಕ್ಕುಗಳನ್ನು ₹5.5 ಕೋಟಿ + ಜಿಎಸ್ಟಿಗೆ ಖರೀದಿಸಿದೆ ಎಂಬ ಮಾಹಿತಿ ಲಭ್ಯವಾಗಿದೆ.
ಚಿತ್ರ ಇನ್ನೂ ಚಿತ್ರಮಂದಿರಗಳಲ್ಲಿ ಪ್ರದರ್ಶನವಾಗುತ್ತಿದ್ದು, ಅದಕ್ಕೂ ಮುನ್ನ ಯಾವುದೇ ಸ್ಟ್ರೀಮಿಂಗ್ ದಿನಾಂಕವನ್ನು ಪ್ರಕಟಿಸಲಾಗುತ್ತಿಲ್ಲ. ಈ ಚಿತ್ರವನ್ನು ಮಲಯಾಳಂ ಹಾಗೂ ತೆಲುಗು ಭಾಷೆಗಳಲ್ಲಿ ಕೂಡ ಬಿಡುಗಡೆ ಮಾಡಲಾಗಿದೆ ಮತ್ತು ಅಲ್ಲಿ ಸಹ ಉತ್ತಮ ಪ್ರತಿಕ್ರಿಯೆ ಕಂಡುಬಂದಿದೆ.
ಚಿತ್ರದಲ್ಲಿ ಜಿ.ಪಿ. ತೂಮಿನಾಡು, ಶನೀಲ್ ಗೌತಮ್, ಪ್ರಕಾಶ್ ಕೆ. ತೂಮಿನಾಡು, ದೀಪಕ್ ರೈ ಪಾಣಾಜೆ, ರಾಜ್ ಬಿ. ಶೆಟ್ಟಿ ಸೇರಿದಂತೆ ಅನೇಕರು ಅಭಿನಯಿಸಿದ್ದಾರೆ. ರಂಗಭೂಮಿಯಲ್ಲಿ ಪಳಗಿರುವ ಜಿ.ಪಿ. ತೂಮಿನಾಡು ಅವರು ತುಳು ನಾಟಕ ಶೈಲಿಯ ತಳಹದಿಯನ್ನು ಬೆಳ್ಳಿ ಪರದೆಗೆ ತಂದಿದ್ದಾರೆ.
ಒಂದು ವಠಾರದಲ್ಲಿ ನಡೆಯುವ ಕಥಾಹಂದರ ಇರುವ ಈ ಚಿತ್ರ, ಪ್ರೇಕ್ಷಕರನ್ನು ನಗುಗಟ್ಟಿಸುವ ಹಾಗೂ ಕುತೂಹಲ ಮೂಡಿಸುವ ವಿಭಿನ್ನ ಪ್ರಯೋಗವಾಗಿದೆ. ಬಹು ವರ್ಷಗಳ ಬಳಿಕ ಕನ್ನಡದ ಹಾಸ್ಯಚಿತ್ರ ಎಂತಹ ಯಶಸ್ಸು ಸಾಧಿಸಬಹುದೆಂಬುದನ್ನು ಈ ಚಿತ್ರ ಪ್ರದರ್ಶಿಸಿದೆ.
ಸಾಮಾಜಿಕ ಜಾಲತಾಣಗಳಲ್ಲಿ ಟ್ರೆಂಡ್ ಆಗಿರುವ ಈ ಚಿತ್ರವನ್ನು ವಿಮರ್ಶಕರು ಮತ್ತು ಚಿತ್ರರಂಗದ ಗಣ್ಯರು ಭಾರೀ ಪ್ರಶಂಸೆ ಮಾಡುತ್ತಿದ್ದಾರೆ. ತಂಡದ ಗೆಲುವು ಹಾಗೂ ಯಶಸ್ಸಿಗೆ ಎಲ್ಲೆಡೆಯಿಂದ ಅಭಿನಂದನೆಗಳು ಹರಿದುಬರುತ್ತಿವೆ.