Russia ಮೇಲೆ ಉಕ್ರೇನ್ ಡ್ರೋನ್ ದಾಳಿ! ಮಾಸ್ಕೋ ಸಮೀಪ 5 ಸಾವು, 10ಕ್ಕೂ ಹೆಚ್ಚು ಮಂದಿಗೆ ಗಾಯ

ಮಾಸ್ಕೋ: Russia-Ukraine ಯುದ್ಧ ಮತ್ತಷ್ಟು ತೀವ್ರಗೊಂಡಿದ್ದು, ಉಕ್ರೇನ್ ನಡೆಸಿದ ಡ್ರೋನ್ ದಾಳಿಯಲ್ಲಿ ಮಾಸ್ಕೋ ಸಮೀಪ ಕನಿಷ್ಠ ಐದು ಮಂದಿ ಮೃತಪಟ್ಟಿದ್ದು, 10ಕ್ಕೂ ಹೆಚ್ಚು ಮಂದಿ ಗಾಯಗೊಂಡಿದ್ದಾರೆ ಎಂದು ರಷ್ಯಾದ ಅಧಿಕಾರಿಗಳು ತಿಳಿಸಿದ್ದಾರೆ. ದಾಳಿಯಿಂದ ಗೋದಾಮು ಸೇರಿದಂತೆ ಹಲವು ಕಟ್ಟಡಗಳಿಗೆ ಬೆಂಕಿ ಹೊತ್ತಿಕೊಂಡಿದ್ದು, ಪ್ರದೇಶದಲ್ಲಿ ಭಾರೀ ಹಾನಿಯಾಗಿದೆ.

ಮಾಸ್ಕೋ ಪ್ರದೇಶದ ಗವರ್ನರ್ ಆಂಡ್ರೇ ವೊರೋಬಿಯೋವ್ ಅವರ ಪ್ರಕಾರ, ಕ್ರೆಮ್ಲಿನ್‌ನಿಂದ ಸುಮಾರು 69 ಕಿಲೋಮೀಟರ್ ದೂರದಲ್ಲಿರುವ ಚೆಖೋವ್ ಜಿಲ್ಲೆಯ ನೋವೊಸೆಲ್ಕಿ ಕೈಗಾರಿಕಾ ಪ್ರದೇಶದ ಮೇಲೆ ಡ್ರೋನ್ ದಾಳಿ ನಡೆದಿದೆ. ದಾಳಿಯಿಂದ ಗೋದಾಮು ಬೆಂಕಿಗಾಹುತಿಯಾಗಿದ್ದು, ವಿದ್ಯುತ್ ಉಪಕೇಂದ್ರ ಮತ್ತು ಆಡಳಿತ ಕಟ್ಟಡಕ್ಕೂ ಹಾನಿಯಾಗಿದೆ.

ಗಾಯಗೊಂಡ 10 ಮಂದಿಯಲ್ಲಿ ಏಳು ಮಂದಿಯ ಸ್ಥಿತಿ ಸ್ಥಿರವಾಗಿದ್ದು, ಒಬ್ಬರ ಸ್ಥಿತಿ ಗಂಭೀರವಾಗಿದೆ ಎಂದು ಅಧಿಕಾರಿಗಳು ಮಾಹಿತಿ ನೀಡಿದ್ದಾರೆ.

‘ರಷ್ಯಾದ ಅಮೆಜಾನ್’ ಗೋದಾಮು ಗುರಿ?

ಉಕ್ರೇನ್ ಇತ್ತೀಚಿನ ವಾರಗಳಲ್ಲಿ ವೈಲ್ಡ್‌ಬೆರೀಸ್ (Wildberries) ಸಂಸ್ಥೆಯ ಗೋದಾಮುಗಳ ಮೇಲೆ ದಾಳಿ ನಡೆಸುತ್ತಿದೆ ಎಂದು ವರದಿಯಾಗಿದೆ. ಈ ಸಂಸ್ಥೆಯನ್ನು “ರಷ್ಯಾದ ಅಮೆಜಾನ್” ಎಂದು ಕರೆಯಲಾಗುತ್ತದೆ. ಉಕ್ರೇನ್ ಪ್ರಕಾರ, ಈ ಗೋದಾಮುಗಳನ್ನು ರಷ್ಯಾ ಸೇನೆಗೆ ಅಗತ್ಯ ವಸ್ತುಗಳನ್ನು ಪೂರೈಸಲು ಬಳಸಲಾಗುತ್ತಿದೆ. ಆದರೆ ಈ ಆರೋಪವನ್ನು ರಷ್ಯಾ ತಳ್ಳಿಹಾಕಿದೆ.

ಇದೇ ವೇಳೆ ಸೇಂಟ್ ಪೀಟರ್ಸ್‌ಬರ್ಗ್ ಮತ್ತು ಟ್ವೆರ್ ಪ್ರದೇಶಗಳಲ್ಲಿಯೂ ವೈಲ್ಡ್‌ಬೆರೀಸ್ ಗೋದಾಮುಗಳು ಡ್ರೋನ್ ದಾಳಿಗೆ ಗುರಿಯಾಗಿವೆ ಎಂದು ಸ್ಥಳೀಯ ಅಧಿಕಾರಿಗಳು ತಿಳಿಸಿದ್ದಾರೆ.

ರಷ್ಯಾದ ಪ್ರತಿದಾಳಿ

ಇನ್ನೊಂದೆಡೆ, ರಷ್ಯಾ ಕೂಡ ಉಕ್ರೇನ್ ಮೇಲೆ ಕ್ಷಿಪಣಿ ಮತ್ತು ಡ್ರೋನ್ ದಾಳಿ ಮುಂದುವರಿಸಿದ್ದು, ಕನಿಷ್ಠ ನಾಲ್ವರು ಮೃತಪಟ್ಟಿದ್ದಾರೆ ಎಂದು ಉಕ್ರೇನ್ ತುರ್ತು ಸೇವಾ ಇಲಾಖೆ ತಿಳಿಸಿದೆ.

ದಕ್ಷಿಣ ಬಂದರು ನಗರ ಮೈಕೋಲೈವ್ ಮೇಲೆ ನಡೆದ ದಾಳಿಯಲ್ಲಿ 89 ವರ್ಷದ ವೃದ್ಧೆ ಸಾವನ್ನಪ್ಪಿದ್ದು, ಇಬ್ಬರು ಬಾಲಕಿಯರು ಸೇರಿದಂತೆ ಏಳು ಮಂದಿ ಗಾಯಗೊಂಡಿದ್ದಾರೆ.

ಇದಲ್ಲದೆ, ಸುಮಿ ಪ್ರದೇಶದ ವಸತಿ ಪ್ರದೇಶದ ಮೇಲೆ ನಡೆದ ದಾಳಿಯಲ್ಲಿ ಮಹಿಳೆ ಹಾಗೂ ಐದು ಮತ್ತು ಹತ್ತು ವರ್ಷದ ಇಬ್ಬರು ಬಾಲಕಿಯರು ಮೃತಪಟ್ಟಿದ್ದು, ನಾಲ್ವರು ಗಾಯಗೊಂಡಿದ್ದಾರೆ. ಡ್ನಿಪ್ರೊ ನಗರದಲ್ಲಿ ಆಹಾರ ಗೋದಾಮಿಗೂ ಬೆಂಕಿ ತಗುಲಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.

ಒಂದೇ ರಾತ್ರಿ 320 ಡ್ರೋನ್‌ಗಳನ್ನು ಹೊಡೆದುರುಳಿಸಿದ ರಷ್ಯಾ

ರಷ್ಯಾ ರಕ್ಷಣಾ ಸಚಿವಾಲಯದ ಪ್ರಕಾರ, ಒಂದೇ ರಾತ್ರಿ ಉಕ್ರೇನ್ ಕಳುಹಿಸಿದ್ದ 320 ಡ್ರೋನ್‌ಗಳನ್ನು ಹೊಡೆದುರುಳಿಸಲಾಗಿದೆ. ಆದರೆ ಹಲವು ಡ್ರೋನ್‌ಗಳು ಗುರಿ ತಲುಪಿದ್ದು, ಕೈಗಾರಿಕಾ ಪ್ರದೇಶಗಳಲ್ಲಿ ಹಾನಿ ಉಂಟಾಗಿದೆ.

ಬೀಚ್ ಮೇಲೂ ಡ್ರೋನ್ ದಾಳಿ

ಈ ಘಟನೆಗೆ ಒಂದು ದಿನ ಮೊದಲು ದಕ್ಷಿಣ ರಷ್ಯಾದ ಕ್ರಾಸ್ನೋಡರ್ ಪ್ರದೇಶದ ಜನನಿಬಿಡ ಕಡಲತೀರದ ಮೇಲೆ ಡ್ರೋನ್ ದಾಳಿ ನಡೆದಿದ್ದು, ಏಳು ಮಂದಿ ಸಾವನ್ನಪ್ಪಿ 58 ಮಂದಿ ಗಾಯಗೊಂಡಿದ್ದರು. ಈ ದಾಳಿಗೆ ಉಕ್ರೇನ್ ಹೊಣೆ ಎಂದು ರಷ್ಯಾ ಆರೋಪಿಸಿದೆ. ಆದರೆ ಉಕ್ರೇನ್ ಇದುವರೆಗೆ ಯಾವುದೇ ಅಧಿಕೃತ ಪ್ರತಿಕ್ರಿಯೆ ನೀಡಿಲ್ಲ.

ರಷ್ಯಾ ಮತ್ತು ಉಕ್ರೇನ್ ಎರಡೂ ದೇಶಗಳು ನಾಗರಿಕರನ್ನು ಉದ್ದೇಶಪೂರ್ವಕವಾಗಿ ಗುರಿಯಾಗಿಸುವುದನ್ನು ನಿರಾಕರಿಸುತ್ತಿದ್ದರೂ, ಯುದ್ಧದ ತೀವ್ರತೆ ಹೆಚ್ಚಾಗುತ್ತಿರುವ ಹಿನ್ನೆಲೆಯಲ್ಲಿ ಎರಡೂ ದೇಶಗಳಲ್ಲಿ ನಾಗರಿಕರ ಸಾವಿನ ಸಂಖ್ಯೆ ಏರಿಕೆಯಾಗುತ್ತಿದೆ.