ಸೋಶಿಯಲ್ ಮೀಡಿಯಾ
ಅಮೆರಿಕದಲ್ಲಿ ಹಿಂದೂಗಳ ರಕ್ಷಣೆಗೆ ಸಮಿತಿ – ಕನ್ನಡಿಗನ ಸಾರಥ್ಯ
ಅಮೆರಿಕದಲ್ಲಿರುವ ಹಿಂದೂ, ಬೌದ್ಧ, ಜೈನ ಮತ್ತು ಸಿಖ್‌ ಧರ್ಮೀಯರ ಹಿತಾಸಕ್ತಿಗಳನ್ನು ರಕ್ಷಿಸುವ ದೃಷ್ಟಿಯಿಂದ ಸಮಿತಿಯನ್ನು ರಚಿಸಲಾಗಿದೆ. ಭಾರತೀಯ ಮೂಲದ ಅಮೆರಿಕ ರಾಜಕಾರಣಿ ಥಾನೆದಾರ್‌ ನೂತನ ಸರ್ಕಾರಿ ಸಮಿತಿಗೆ ಚಾಲನೆ ನೀಡಿದ್ದಾರೆ. ನೂತನ ಸಮಿತಿಗೆ ಅಮೆರಿಕ ಸಂಸತ್‌ ಡೆಮಾಕ್ರಟಿಕ್‌ ಮತ್ತು ರಿಪಬ್ಲಿಕನ್‌ ಉಭಯ ಪಕ್ಷಗಳಿಂದ ಬೆಂಬಲ ವ್ಯಕ್ತವಾಗಿದ್ದು, 27 ಕ್ಕೂ ಹೆಚ್ಚು ಸಂಸದರು ಸಮಿತಿಯ ರಚನೆಗೆ ಅನುಮೋದನೆ ನೀಡಿದ್ದಾರೆ.
ಈ ಕುರಿತು ಮಾತನಾಡಿದ ಥಾನೇದಾರ್‌, ಈ ಪ್ರಮುಖ ಘಟ್ಟವನ್ನು ಅತ್ಯಂತ ಹೆಮ್ಮೆ ಗೌರವದಿಂದ ನಾನು ಸ್ವಾಗತಿಸುತ್ತೇನೆ. ನಾವೀಗ ಅತ್ಯಂತ ಪ್ರಮುಖ, ಪ್ರಗತಿಪರ ಹಂತದಲ್ಲಿ ಇದ್ದೇವೆ. ಪರಸ್ಪರರನ್ನು ಅರ್ಥೈಸಿಕೊಳ್ಳುವಿಕೆ, ಒಳಗೊಳ್ಳುವಿಕೆ ಮತ್ತು ಧೃಡವಾದ ಕಾನೂನುಗಳ ರಚನೆ ಈ ಸಮಿತಿಯ ಉದ್ದೇಶವಾಗಿದೆ ಎಂದಿದ್ದಾರೆ. ಭಾರತದ ಕರ್ನಾಟಕದಲ್ಲಿ ನಾನು ಹುಟ್ಟಿದೆ. ನಾನೂ ಸಹ ಈ ದೇಶಕ್ಕೆ ವಲಸಿಗನಾಗಿ ಬಂದೆ. ಪ್ರತಿಯೊಂದು ನಂಬಿಕೆ, ಪ್ರತಿಯೊಂದು ಸಂಸ್ಕೃತಿ ಹಾಗೂ ಪ್ರತಿಯೊಂದು ಸಮುದಾಯಕ್ಕೂ ಸಹ ಅಮೆರಿಕದಲ್ಲಿ ಸ್ಥಳವಿದೆ. ಹಿಂದೂ, ಬೌದ್ಧ, ಸಿಖ್‌ ಮತ್ತು ಜೈನ ಸಮುದಾಯದ ಸರ್ಕಾರಿ ಸಮಿತಿಯ ರಚನೆ ಸಾಮಾನ್ಯ ಸಮಿತಿಗಿಂತ ಹೆಚ್ಚಾಗಿ ಕಾರ್ಯನಿರ್ವಹಿಸಲಿದೆ ಎಂದಿದ್ದಾರೆ.ಇದೇ ಸಮಯದಲ್ಲಿ ಮತೀಯ ತಾರತಮ್ಯಗಳನ್ನು ವಿರೋಧಿಸಲು ನಾವು ಬದ್ಧರಾಗಿದ್ದೇವೆ. ವೈವಿಧ್ಯತೆಗಳನ್ನು ನಾವು ಸಹಿಸುಕೊಳ್ಳುವುದಲ್ಲ. ಅದನ್ನು ನಾವು ಸಂಭ್ರಮಿಸುತ್ತಿದ್ದೇವೆ ಎಂದು ತಾನೇದಾರ್‌ ನುಡಿದರು.
