ಗಣರಾಜ್ಯೋತ್ಸವ ವಿಶೇಷ, ಬೆಂಗಳೂರು ವಿಜಯನಗರದಲ್ಲಿ 215 ಅಡಿ ಎತ್ತರದ ಧ್ವಜಸ್ತಂಭದಲ್ಲಿ ಹಾರಲಿದೆ ತಿರಂಗಾ

ಬೆಂಗಳೂರು: ಭಾರತದ ಉದ್ದಗಲಕ್ಕೂ ಗಣರಾಜ್ಯೋತ್ಸವಕ್ಕೆ ತಯಾರಿ ನಡೆದಿದೆ. ಬೆಂಗಳೂರಿನಲ್ಲಿ ಗಣರಾಜ್ಯೋತ್ಸವ ಸಂಭ್ರಮಕ್ಕೆ ತುಸು ಹೆಚ್ಚು ಮೆರಗು ನೀಡಲಿದೆ ವಿಜಯನಗರದಲ್ಲಿ ಸ್ಥಾಪನೆಯಾಗುತ್ತಿರುವ ಅತಿ ಎತ್ತರದ ಧ್ವಜಸ್ತಂಭ.

ವಿಜಯನಗರದಲ್ಲಿ 215 ಅಡಿ ಎತ್ತರದ ಧ್ವಜ ಸ್ತಂಭ ಸ್ಥಾಪನೆಯಾಗುತ್ತಿದೆ. ಬೆಂಗಳೂರಿನಲ್ಲಿ ಇದು ಈ ಸಲ ಗಣರಾಜ್ಯೋತ್ಸವದ ಆಕರ್ಷಣೆಯಾಗಿರಲಿದೆ. ಈ ಅತಿ ಎತ್ತರದ ಧ್ವಜ ಸ್ತಂಭ ಸ್ಥಾಪಿಸುವ ಯೋಜನೆಯ ಗುತ್ತಿಗೆದಾರ ಹೇಮಂತ್ ಎಚ್‌ಜಿ ಈ ಕುರಿತು ಮಾಹಿತಿ ನೀಡಿದರು ಎಂದು ಟೈಮ್ಸ್ ನೌ ವರದಿ ಮಾಡಿದೆ.ವಿಜಯನಗರ ಶಾಸಕ, ಮಾಜಿ ಸಚಿವ ಎಂ.ಕೃಷ್ಣಪ್ಪ ಅವರು ಈ ಧ್ವಜ ಸ್ತಂಭಕ್ಕೆ ಹಣಕಾಸು ನೆರವು ನೀಡಿದ್ದಾರೆ. ಇದನ್ನು ಚಂದ್ರಾಲೇಔಟ್‌ನಲ್ಲಿ ಸ್ಥಾಪಿಸಲಾಗುತ್ತಿದೆ. ಇದು 210 ಅಡಿ ಎತ್ತರ ಇರಲಿದ್ದು, ಅದರ ಮೇಲೆ 5 ಅಡಿ ಅಶೋಕ ಚಕ್ರದ ಲಾಂಛನ ಇರಲಿದೆ. ಕಳೆದ ಡಿಸೆಂಬರ್‌ನಲ್ಲಿ 19 ಟನ್ ತೂಕದ ಕಂಬ ನಿರ್ಮಾಣಕ್ಕೆ ಅಡಿಪಾಯ ಹಾಕಲಾಗಿದೆ. ಕ್ರೇನ್ ಬಳಸಿ ಎತ್ತರದ ರಚನೆಯನ್ನು ನಿರ್ಮಿಸಲಾಯಿತು. ಜನವರಿ 25 ರೊಳಗೆ ಪೂರ್ಣಗೊಳ್ಳುವ ನಿರೀಕ್ಷೆಯಿದೆ.

ಅತಿ ಎತ್ತರದ ಧ್ವಜ ಸ್ತಂಭ ನಿರ್ಮಾಣದ ಯೋಜನಾ ವೆಚ್ಚ 1 ಕೋಟಿ ರೂಪಾಯಿ. ಕಳೆದ ವರ್ಷ ನವೆಂಬರ್ 30 ರಂದು ಈ ಯೋಜನೆಗೆ ಚಾಲನೆ ನೀಡಲಾಯಿತು. ಕಂಬದ ಮೇಲೆ ಅಳವಡಿಸುವ ರಾಷ್ಟ್ರ ಲಾಂಛನವಾಗಿರುವ 4 ತಲೆಯ ಸಿಂಹವನ್ನು ವಿಜಯನಗರ ನಿವಾಸಿಗಳಷ್ಟೇ ಅಲ್ಲ, ಅಕ್ಕಪಕ್ಕದ ವಿಧಾನಸಭಾ ಕ್ಷೇತ್ರಗಳವರಿಗೂ ಕಾಣಿಸಲಿದೆ, ರಾಷ್ಟ್ರಧ್ವಜ ಸಂಹಿತೆಗೆ ಅನುಗುಣವಾಗಿ ತಿರಂಗಾವನ್ನು ಇಲ್ಲಿ ಹಾರಾಡಿಸಲಾಗುತ್ತದೆ. ಪ್ರತಿ ಎರಡು ತಿಂಗಳಿಗೆ ಒಮ್ಮೆ ಧ್ವಜವನ್ನು ಬದಲಾಯಿಸಲಾಗುತ್ತದೆ. ಧ್ವಜಾರೋಹಣ ಮತ್ತು ಅವರೋಹಣ ಕಾರ್ಯವಿಧಾನ ಕೈಗಳಿಂದ ಮಾಡಬಹುದು. ಅದೇ ರೀತಿ ಯಾಂತ್ರಿಕವಾಗಿ ಮಾಡುವುದಕ್ಕೆ ಮೋಟಾರನ್ನು ಕೂಡ ಅಳವಡಿಸಲಾಗಿದೆ. ಇದಕ್ಕಾಗಿ 8-ಎಂಎಂ ಸ್ಟೀಲ್ ವೈರ್, 3 ಎಚ್‌ಪಿ ಮೋಟಾರ್‌ ಅನ್ನು ಜೋಡಿಸಲಾಗಿದೆ. ಯೋಜನೆ ಪೂರ್ಣಗೊಂಡ ನಂತರ ವಾರ್ಷಿಕ ನಿರ್ವಹಣೆಗಾಗಿ ಬಿಬಿಎಂಪಿಗೆ ಹಸ್ತಾಂತರಿಸಲಾಗುವುದು.

ಈ ಹಿಂದೆ ರಾಜಭವನದ ಬಳಿಯಿರುವ ರಾಷ್ಟ್ರೀಯ ಸೇನಾ ವಸ್ತುಸಂಗ್ರಹಾಲಯದ ಆವರಣದಲ್ಲಿ 213 ಅಡಿ ಎತ್ತರದ ಧ್ವಜಸ್ತಂಭವನ್ನು ಸ್ಥಾಪಿಸಲಾಗಿತ್ತು. ಅದುವೇ ಇದುವರೆಗೆ ಬೆಂಗಳೂರಿನ ಅತಿ ಎತ್ತರದ ಧ್ವಜ ಸ್ತಂಭ ಎಂಬ ಕೀರ್ತಿಗೆ ಭಾಜನವಾಗಿತ್ತು.