ವಿರಾಟ್ ಪಾಕಿಸ್ತಾನಕ್ಕೆ ಬರಲಿ.. ಅಲ್ಲಿ ತಾಕತ್ತು ತೋರಿಸಲಿ’ -ಕೊಹ್ಲಿಗೆ ಚಾಲೆಂಜ್

ಚಾಂಪಿಯನ್ಸ್​ ಟ್ರೋಫಿ ಆಡಲು ಟೀಮ್​ ಇಂಡಿಯಾ ಪಾಕಿಸ್ತಾನಕ್ಕೆ ಹೋಗುತ್ತೋ? ಇಲ್ವೋ? ಅನ್ನೋದೆ ಇನ್ನೂ ಕನ್ಫರ್ಮ್​ ಆಗಿಲ್ಲ. ಅದಾಗಲೇ ಕಿಂಗ್​ ಕೊಹ್ಲಿಗೆ ಹೊಸ ಸವಾಲು ಎದುರಾಗಿದೆ. ವಿಶ್ವದೆಲ್ಲೆಡೆ ಆರ್ಭಟಿಸಿರೋ ವಿರಾಟನಿಗೆ ಪಾಕ್​ ಮಾಜಿ ಕ್ರಿಕೆಟಿಗ ಹೊಸ ಚಾಲೆಂಜ್​​ ಹಾಕಿದ್ದಾರೆ.

ಮುಂಬರುವ ಚಾಂಪಿಯನ್ಸ್​ ಟ್ರೋಫಿ ಟೂರ್ನಿಗೆ ವಿಶ್ವದ ತಂಡಗಳ ಸಿದ್ಧತೆ ಆರಂಭವಾಗಿದೆ. ಈಗಾಗಲೇ ಪ್ರತಿಷ್ಟಿತ ಐಸಿಸಿ ಟ್ರೋಫಿ ಗೆಲ್ಲ್ಲಲು ತಂಡಗಳು ರೂಟ್​ಮ್ಯಾಪ್​ ಸಿದ್ಧಪಡಿಸ್ತಿವೆ. ಟೀಮ್​ ಇಂಡಿಯಾ ಕೂಡ ತಯಾರಿಯನ್ನು ಆರಂಭಿಸಿದೆ. ಗೌತಮ್​ ಗಂಭೀರ್ ಟೀಮ್​ ಇಂಡಿಯಾದ ಹೆಡ್​ಕೋಚ್​ ಹುದ್ದೆಗೇರಿದಾಗಿನಿಂದ ಪ್ರತಿ ಹೆಜ್ಜೆಯಲ್ಲೂ ಚಾಂಪಿಯನ್ಸ್​ ಟ್ರೋಫಿಯನ್ನೇ ಟಾರ್ಗೆಟ್​ ಮಾಡ್ತಿದ್ದಾರೆ.

ಕೊಹ್ಲಿಗೆ ಪಾಕ್​ ಮಾಜಿ ಕ್ರಿಕೆಟಿಗನ ಚಾಲೆಂಜ್​
ಚಾಂಪಿಯನ್ಸ್​ ಟ್ರೋಫಿಗೆ ಸಿದ್ಧತೆ ಆರಂಭವಾಗಿದೆ ನಿಜ. ಪಂದ್ಯಗಳು ಎಲ್ಲಿ ನಡೆಯುತ್ತೆ ಅನ್ನೋದೇ ದೊಡ್ಡ ಪ್ರಶ್ನೆಯಾಗಿದೆ. ಆಯೋಜನೆಯ ರೈಟ್ಸ್​​ ಹೊಂದಿರೋ ಪಾಕ್​ ಕ್ರಿಕೆಟ್​ ಬೋರ್ಡ್​​, ಟೀಮ್​ ಇಂಡಿಯಾ ಪಾಕಿಸ್ತಾನಕ್ಕೆ ಬರಲೇಬೇಕು ಎಂದು ಬಿಗಿಪಟ್ಟು ಹಿಡಿದಿದೆ. ಬಿಸಿಸಿಐ ಭದ್ರತಾ ದೃಷ್ಟಿಯಿಂದ ತಟಸ್ಥ ಸ್ಥಳದಲ್ಲಿ ನಮ್ಮ ಪಂದ್ಯಗಳನ್ನ ಆಯೋಜಿಸುವಂತೆ ಐಸಿಸಿಯನ್ನ ಕೋರಿದೆ. ಪಂದ್ಯಗಳು ಎಲ್ಲಿ ನಡೆಯುತ್ತೆ ಅನ್ನೋ ಗೊಂದಲವೇ ಇನ್ನೂ ಬಗೆಹರಿದಿಲ್ಲ. ಇದ್ರ ನಡುವೆ ಪಾಕಿಸ್ತಾನ ಮಾಜಿ ಕ್ರಿಕೆಟಿಗ ಕಿಂಗ್​ ಕೊಹ್ಲಿಗೆ ಚಾಲೆಂಜ್​​ ಹಾಕಿದ್ದಾರೆ.

ಪಾಕಿಸ್ತಾನಕ್ಕೆ ಬರಲಿ..
ವಿರಾಟ್​​ ಕೊಹ್ಲಿ.. ವಿಶ್ವ ಕ್ರಿಕೆಟ್​ ಕಂಡ ಸರ್ವಶ್ರೇಷ್ಟ ಬ್ಯಾಟ್ಸ್​ಮನ್​​. ಭಾರತದ ನೆಲದಲ್ಲಿ ಮಾತ್ರವಲ್ಲ, ವಿಶ್ವದಾದ್ಯಂತ ಬೌಲರ್​​ಗಳನ್ನು ಬೆಂಡೆತ್ತಿ ರನ್​ ಶಿಖರ ಕಟ್ಟಿರುವ ರನ್​ಮಷೀನ್​. ಆಸ್ಟ್ರೇಲಿಯಾ, ನ್ಯೂಜಿಲೆಂಡ್​, ಸೌತ್​ ಆಫ್ರಿಕಾ, ಇಂಗ್ಲೆಂಡ್​. ಈ ಸೇನಾ ಕಂಟ್ರಿಗಳಲ್ಲಿ ರನ್​ಗಳಿಸೋದು ಏಷ್ಯನ್​ ಬ್ಯಾಟ್ಸ್​ಮನ್​ಗಳಿಗೆ ಅಸಾಧ್ಯ ಅನ್ನೋ ಮಾತನ್ನ ಸುಳ್ಳು ಎಂದು ನಿರೂಪಿಸಿದ ಆಟಗಾರ. ಇಂತಹ ಆಟಗಾರನಿಗೆ ಪಾಕ್​ ಮಾಜಿ ಕ್ರಿಕೆಟಿಗ ಯೂನಿಸ್​​ ಖಾನ್​ ಪಾಕಿಸ್ತಾನಕ್ಕೆ ಬಂದು ರನ್​ಗಳಿಸಲಿ ಅನ್ನೋ ಸವಾಲು ಹಾಕಿದ್ದಾರೆ.