ಸಾಮಾನ್ಯ ಆಟಗಾರನಿಂದ ಕಟ್ಟಿದ್ದು ಆರ್‌ಸಿಬಿ ಸಾಮ್ರಾಜ್ಯ

2008ರಲ್ಲಿ 19 ವರ್ಷದ ಸಾಮಾನ್ಯ ಹುಡುಗನಾಗಿ ಐಪಿಎಲ್‌ಗೆ ಕಾಲಿಟ್ಟ ವಿರಾಟ್ ಕೊಹ್ಲಿ, ಇಂದು ರಾಯಲ್ ಚಾಲೆಂಜರ್ಸ್ ಬೆಂಗಳೂರು (ಆರ್‌ಸಿಬಿ) ತಂಡದ ಕಿಂಗ್ ಆಗಿ ಮೆರೆಯುತ್ತಿದ್ದಾರೆ. ಒಂದೇ ತಂಡದೊಂದಿಗೆ 18 ವರ್ಷಗಳ ಕಾಲ ಒಡನಾಟ, ದಾಖಲೆಗಳ ಸರದಾರ, ರನ್ ಮೆಷಿನ್ ಎಂದೆಲ್ಲ ಕರೆಸಿಕೊಂಡರೂ, ಆರ್‌ಸಿಬಿ ಜೊತೆಗಿನ ಕಪ್‌ನ ಕನಸು ಇನ್ನೂ ಈಡೇರಿಲ್ಲ. ಆದರೆ ಈ ಬಾರಿಯ ಐಪಿಎಲ್ 2025ರಲ್ಲಿ ಆ ಕೊರಗು ನೀಗಿಸುವ ಅವಕಾಶ ಕಾದಿದೆ.

2008ರಲ್ಲಿ ಐಪಿಎಲ್‌ನ ಮೊದಲ ಆವೃತ್ತಿಯಲ್ಲಿ ವಿರಾಟ್ ಕೊಹ್ಲಿ ಆರ್‌ಸಿಬಿಗೆ ಸೇರಿದ್ದು ಆಕಸ್ಮಿಕ. ಭಾರತದ ಅಂಡರ್-19 ತಂಡದ ನಾಯಕನಾಗಿದ್ದ ಕೊಹ್ಲಿಯನ್ನು ಆರ್‌ಸಿಬಿ ತಂಡ ಅಂಡರ್-19 ಕೋಟಾದಲ್ಲಿ ಆಯ್ಕೆ ಮಾಡಿತು. ಆರಂಭದಲ್ಲಿ ದೆಹಲಿ ತಂಡದ ಗಮನಕ್ಕೆ ಬರಬೇಕಿದ್ದ ಕೊಹ್ಲಿ, ದೆಹಲಿ ತಂಡವು ಪ್ರದೀಪ್ ಸಾಂಗ್ವಾನ್‌ಗೆ ಆದ್ಯತೆ ನೀಡಿದ ಕಾರಣ ಬೆಂಗಳೂರಿನ ಪಾಲಾದರು. ಈ ಒಂದು ಆಕಸ್ಮಿಕ ಆಯ್ಕೆ ಆರ್‌ಸಿಬಿಯ ಇತಿಹಾಸವನ್ನೇ ಬದಲಾಯಿಸಿತು,

ಮೊದಲ ಮೂರು ಐಪಿಎಲ್ ಋತುಗಳಲ್ಲಿ ಕೊಹ್ಲಿ ದೊಡ್ಡ ಮಟ್ಟದಲ್ಲಿ ಮಿಂಚದಿದ್ದರೂ, ಆರ್‌ಸಿಬಿ ಆಡಳಿತ ಮಂಡಳಿಯು ಅವರ ಮೇಲೆ ಭರವಸೆ ಇಟ್ಟು ರಿಟೈನ್ ಮಾಡಿತು. ಈ ನಿರ್ಧಾರವೇ ಕೊಹ್ಲಿಯನ್ನು ತಂಡದ ಸ್ಟಾರ್ ಆಟಗಾರನನ್ನಾಗಿ ರೂಪಿಸಿತು. 2013ರಲ್ಲಿ ಡೆನಿಯಲ್ ವೆಟ್ಟೋರಿ ಬಳಿಕ ತಂಡದ ನಾಯಕತ್ವವನ್ನು ವಹಿಸಿಕೊಂಡ ಕೊಹ್ಲಿ, 143 ಪಂದ್ಯಗಳಲ್ಲಿ ತಂಡವನ್ನು ಮುನ್ನಡೆಸಿದರು. 2016ರಲ್ಲಿ ತಂಡವನ್ನು ಫೈನಲ್‌ಗೆ ಕೊಂಡೊಯ್ದರು ಮತ್ತು ಒಂದೇ ಋತುವಿನಲ್ಲಿ 970 ರನ್‌ಗಳ ದಾಖಲೆಯನ್ನು ನಿರ್ಮಿಸಿದರು, ಇದು ಇಂದಿಗೂ ಭೇದಿಸಲಾಗದ ದಾಖಲೆಯಾಗಿದೆ.

ಕೊಹ್ಲಿಯ ಯಶಸ್ಸಿನ ಹಿಂದೆ ಆರ್‌ಸಿಬಿ ಅಭಿಮಾನಿಗಳ ಬೆಂಬಲವೂ ಒಂದು ಪ್ರಮುಖ ಕಾರಣ. ಕಪ್ ಗೆಲುವಿನ ಕನಸು ಈಡೇರದಿದ್ದರೂ, ಅಭಿಮಾನಿಗಳು ತಂಡ ಮತ್ತು ಕೊಹ್ಲಿಯನ್ನು ಬಿಟ್ಟುಕೊಡದೆ ನಿಂತಿದ್ದಾರೆ. ಈ ಬೆಂಬಲವೇ ಆರ್‌ಸಿಬಿಯನ್ನು ಅಂತರರಾಷ್ಟ್ರೀಯ ಮಟ್ಟದಲ್ಲಿ ಜನಪ್ರಿಯ ತಂಡವನ್ನಾಗಿಸಿದೆ.

ವಿರಾಟ್ ಕೊಹ್ಲಿಯ ಆರ್‌ಸಿಬಿಯೊಂದಿಗಿನ ಪಯಣವು ಒಂದು ಸಾಮಾನ್ಯ ಆಟಗಾರನಿಂದ ದಂತಕತೆಯಾಗಿ ಮಾರ್ಪಟ್ಟ ಕತೆಯಾಗಿದೆ. 8,618 ರನ್‌ಗಳು, 8 ಶತಕಗಳು, 63 ಅರ್ಧಶತಕಗಳೊಂದಿಗೆ ಐಪಿಎಲ್ ಇತಿಹಾಸದಲ್ಲಿ ಅತಿ ಹೆಚ್ಚು ರನ್ ಗಳಿಸಿದ ಆಟಗಾರನಾಗಿ ಮಿಂಚಿದ್ದಾರೆ. ಈಗ, ಐಪಿಎಲ್ 2025ರಲ್ಲಿ ಕಿಂಗ್ ಕೊಹ್ಲಿ ಮತ್ತು ಆರ್‌ಸಿಬಿ ತಂಡವು ಕಪ್ ಗೆಲುವಿನ ಕನಸನ್ನು ಈಡೇರಿಸುವ ಸಮಯ ಬಂದಿದೆ