ಕ್ರೀಡೆ
ಬಯೋಪಿಕ್ ಬಗ್ಗೆ ದ್ರಾವಿಡ್ ಅಚ್ಚರಿ ಹೇಳಿಕೆ.. ರಹಸ್ಯವಾಗಿ ಉಳಿದಿರುವ ಆ ಪ್ರಶ್ನೆಗಳಿಗೆ ಸಿಗುತ್ತಾ ಉತ್ತರ..?
ಸಿಕ್ಸರ್ ಕಿಂಗ್ ಯುವರಾಜ್ ಸಿಂಗ್ ಬಯೋಪಿಕ್ ಅನೌನ್ಸ್ಮೆಂಟ್ ಆಗಿ ವಾರ ಕಳೆದಿಲ್ಲ. ಅದಾಗಲೇ ಮತ್ತೊಬ್ಬ ಸೂಪರ್ ಸ್ಟಾರ್ ಜೀವನದ ಕಥೆ ತೆರೆಗೆ ಅಪ್ಪಳಿಸೋ ಸುದ್ದಿ ಹೊರ ಬಿದ್ದಿದೆ. ಅಂದ್ಹಾಗೆ ಆ ಸೂಪರ್ ಸ್ಟಾರ್ ಬೇರಾರೂ ಅಲ್ಲ. ಕನ್ನಡದ ಕಣ್ಮಣಿ, ವಿಶ್ವ ಕ್ರಿಕೆಟ್ ಲೋಕದ ದಿ ವಾಲ್, ರಾಹುಲ್ ದ್ರಾವಿಡ್.
MS ಧೋನಿ, ಸಚಿನ್ ತೆಂಡುಲ್ಕರ್, ಮೊಹಮ್ಮದ್ ಅಜರುದ್ದೀನ್, ಕಪಿಲ್ ದೇವ್.. ಟೀಮ್ ಇಂಡಿಯಾ ಕಂಡ ಈ ಲೆಜೆಂಡ್ಗಳ ಜೀವನಾಧಾರಿತ ಚಿತ್ರಗಳು ಬಾಲಿವುಡ್ನಲ್ಲಿ ಮೋಡಿ ಮಾಡಿದೆ. ನೆಚ್ಚಿನ ಕ್ರಿಕೆಟರ್ಗಳ ಆನ್ ಅಂಡ್ ಆಫ್ ದ ಫೀಲ್ಡ್ ಜೀವನವನ್ನ ತೆರೆ ಮೇಲೆ ಕಣ್ತುಂಬಿಕೊಂಡು ಫ್ಯಾನ್ಸ್ ಆನಂದಿಸಿದ್ದಾರೆ. ಇದೀಗ ಈ ಬಯೋಪಿಕ್ಗಳ ಲಿಸ್ಟ್ಗೆ ಯುವರಾಜ್ ಸಿಂಗ್ ಚಿತ್ರ ಹೊಸ ಸೇರ್ಪಡೆಯಾಗಿದೆ. ಕೆಲ ದಿನಗಳ ಹಿಂದಷ್ಟೇ ಯುವಿಯ ಬಯೋಪಿಕ್ ನಿರ್ಮಾಣದ ಬಗ್ಗೆ ಅಧಿಕೃತವಾಗಿ ಅನೌನ್ಸ್ ಆಗಿದೆ. ಇದ್ರ ಬೆನಲ್ಲೇ, ಮತ್ತೊಬ್ಬ ಲೆಜೆಂಡ್ ಜೀವನಾಧಾರಿತ ಚಿತ್ರದ ಸದ್ದು ಬಾಲಿವುಡ್ ಅಂಗಳದಲ್ಲಿ ಜೋರಾಗಿದೆ.
ಬಾಲಿವುಡ್ನಲ್ಲಿ ರಾಹುಲ್ ದ್ರಾವಿಡ್ ಬಯೋಪಿಕ್ ಸದ್ದು
ಯುವರಾಜ್ ಸಿಂಗ್ ಬಯೋಪಿಕ್ ತೆರೆಗೆ ಬರುವ ಅಧಿಕೃತ ಸುದ್ದಿ ಹೊರಬಿದ್ದ ಬೆನ್ನಲ್ಲೇ, ಲೆಜೆಂಡ್ ರಾಹುಲ್ ದ್ರಾವಿಡ್ ಜೀವನಾಧಾರಿತ ಚಿತ್ರದ ಸದ್ದು ಬಿ ಟೌನ್ನಲ್ಲಿ ಜೋರಾಗಿದೆ. ವಿಶ್ವ ಕ್ರಿಕೆಟ್ ಲೋಕ ಕಂಡ ಸರ್ವಶ್ರೇಷ್ಠ ಕ್ರಿಕೆಟಿಗನ ಬಯೋಪಿಕ್ ನಿರ್ಮಾಣಕ್ಕೆ ಬಾಲಿವುಡ್ನಲ್ಲಿ ತೆರೆಮರೆಯಲ್ಲೇ ಕಸರತ್ತು ಆರಂಭವಾಗಿದೆ. ಬಹುಕೋಟಿ ಬಜೆಟ್ನಲ್ಲಿ ದ್ರಾವಿಡ್ ಕ್ರಿಕೆಟ್ ಕರಿಯರ್ನ ಕಥೆಯನ್ನ ತೆರೆಗೆ ತರಲು ಬಾಲಿವುಡ್ನ ದೊಡ್ಡ ನಿರ್ಮಾಣ ಸಂಸ್ಥೆ ಮುಂದಾಗಿದೆ ಎಂಬ ಸುದ್ದಿ ಹೊರಬಿದ್ದಿದೆ.
ನನ್ನ ಬಯೋಪಿಕ್ಗೆ ನಾನೇ ಹೀರೋ ಎಂದ ದ್ರಾವಿಡ್
ಅಸಲಿಗೆ ದ್ರಾವಿಡ್ ಬಯೋಪಿಕ್ ತೆರೆಗೆ ಬರುತ್ತೆ ಅನ್ನೋ ಸುದ್ದಿ ಹರಿದಾಡಲು ಆರಂಭಿಸಿ ವಾರಗಳೇ ಕಳೆದಿತ್ತು. ಸುದ್ದಿ ಹೆಚ್ಚು ಸದ್ದು ಮಾಡಿರಲಿಲ್ಲ. ಇದೀಗ ಈ ಬಗ್ಗೆ ಸ್ವತಃ ರಾಹುಲ್ ದ್ರಾವಿಡ್ ತುಟಿ ಬಿಚ್ಚಿದ್ದಾರೆ. ದ್ರಾವಿಡ್ ಮಾತುಗಳೇ, ಬಯೋಪಿಕ್ ತೆರೆಗೆ ಬರೋ ಸುದ್ದಿ ಸತ್ಯ ಎಂಬ ಹಿಂಟ್ ನೀಡಿವೆ. ಇಂವೆಂಟ್ ಒಂದರಲ್ಲಿ ಬಯೋಪಿಕ್ ಹೀರೋ ಯಾರಾಗಿರಬೇಕು ಎಂಬ ಪ್ರಶ್ನೆಗೆ ಉತ್ತರಿಸಿರೋ ದ್ರಾವಿಡ್, ತುಂಬಾ ಹಣ ಸಿಕ್ಕರೆ ನಾನೇ ಎಂದು ಉತ್ತರಿಸಿದ್ದಾರೆ. ಅಪ್ಪಿತಪ್ಪಿಯೂ ಬಯೋಪಿಕ್ನ ಬಗ್ಗೆ ಹಬ್ಬಿರುವ ಸುದ್ದಿಯನ್ನ ತಳ್ಳಿ ಹಾಕಿಲ್ಲ. ದ್ರಾವಿಡ್ರ ಈ ನಡೆ ಫ್ಯಾನ್ಸ್ ಕುತೂಹಲ ಹೆಚ್ಚಿಸಿದ್ದು, ಬಯೋಪಿಕ್ನಲ್ಲಿ ಏನೆಲ್ಲಾ ಇರಲಿದೆ ಎಂಬ ಪ್ರಶ್ನೆ ಕಾಡ್ತಿದೆ.