ಚೆನ್ನೈ: ತಮಿಳುನಾಡು ರಾಜಕೀಯದಲ್ಲಿ ಭಾರೀ ಬದಲಾವಣೆಗೆ ಕಾರಣವಾದ ಚುನಾವಣಾ ಫಲಿತಾಂಶಗಳ ಬಳಿಕ, ವಿಜಯ್ ನೇತೃತ್ವದ ತಮಿಳಗ ವೆಟ್ರಿ ಕಳಗಂ (ಟಿವಿಕೆ) ಸರ್ಕಾರ ರಚನೆಗೆ ಅಧಿಕೃತವಾಗಿ ಹೆಜ್ಜೆ ಇಟ್ಟಿದೆ.

ಐತಿಹಾಸಿಕವಾಗಿ 108 ಸ್ಥಾನಗಳನ್ನು ಗೆದ್ದು ಅತಿದೊಡ್ಡ ಪಕ್ಷವಾಗಿ ಹೊರಹೊಮ್ಮಿರುವ ಟಿವಿಕೆ, ಇಂದು (ಮೇ 05) ರಾಜ್ಯಪಾಲ ರಾಜೇಂದ್ರ ವಿಶ್ವನಾಥ್ ಅರ್ಲೇಕರ್ ಅವರಿಗೆ ಪತ್ರ ಬರೆದು ಸರ್ಕಾರ ರಚಿಸಲು ಅವಕಾಶ ನೀಡುವಂತೆ ಮನವಿ ಮಾಡಿದೆ.

ಬಹುಮತಕ್ಕೆ 15 ದಿನಗಳ ಅವಧಿ ಕೇಳಿದ ವಿಜಯ್

ರಾಜಭವನಕ್ಕೆ ಸಲ್ಲಿಸಿದ ಪತ್ರದಲ್ಲಿ, “ನಮ್ಮ ಪಕ್ಷಕ್ಕೆ ಸದ್ಯ 108 ಶಾಸಕರ ಬೆಂಬಲವಿದೆ. ಇನ್ನೂ 15 ದಿನಗಳ ಕಾಲಾವಕಾಶ ನೀಡಿದರೆ ವಿಧಾನಸಭೆಯಲ್ಲಿ ಬಹುಮತವನ್ನು ಸಾಬೀತುಪಡಿಸುತ್ತೇವೆ” ಎಂದು ವಿಜಯ್ ತಿಳಿಸಿದ್ದಾರೆ.

ಮೂಲಗಳ ಪ್ರಕಾರ, ವಿಜಯ್ ಈಗಾಗಲೇ ಪಕ್ಷದ ಶಾಸಕರೊಂದಿಗೆ ಸಭೆ ನಡೆಸಿ ಮುಂದಿನ ರಾಜಕೀಯ ತಂತ್ರ ರೂಪಿಸುತ್ತಿದ್ದಾರೆ. ಇನ್ನೊಂದೆಡೆ, ರಾಜ್ಯಪಾಲರು ಶೀಘ್ರದಲ್ಲೇ ವಿಜಯ್ ಅವರನ್ನು ಭೇಟಿಯಾಗುವ ಸಾಧ್ಯತೆ ಇದ್ದು, ಬಹುಮತ ಸಾಬೀತುಪಡಿಸಲು ಕಾಲಾವಕಾಶ ನೀಡುವ ಕುರಿತು ಚರ್ಚೆ ನಡೆಯುತ್ತಿದೆ.

ಮೈತ್ರಿ ರಾಜಕೀಯದತ್ತ ಕಣ್ಣು

ಬಹುಮತದ ಕೊರತೆಯ ಹಿನ್ನೆಲೆ, ಈಗ ಟಿವಿಕೆ ಯಾವ ಪಕ್ಷಗಳೊಂದಿಗೆ ಕೈಜೋಡಿಸಲಿದೆ ಎಂಬುದು ಕುತೂಹಲ ಮೂಡಿಸಿದೆ.

• ಡಿಎಂಕೆ ಜೊತೆಗಿನ ಅಪ್ರತೀಕ್ಷಿತ ಒಪ್ಪಂದವೇ?
• ಅಥವಾ ಎಐಎಡಿಎಂಕೆ ಬೆಂಬಲವೇ?
• ಇಲ್ಲವೇ ಸಣ್ಣ ಪಕ್ಷಗಳ ಬೆಂಬಲದೊಂದಿಗೆ ಸರ್ಕಾರ ರಚನೆ?

ಈ ಪ್ರಶ್ನೆಗಳು ಇದೀಗ ತಮಿಳುನಾಡು ರಾಜಕೀಯದಲ್ಲಿ ಹಾಟ್ ಟಾಪಿಕ್ ಆಗಿವೆ.

ಜನರಲ್ಲಿ ತೀವ್ರ ಕುತೂಹಲ

ಯಾವ ಪಕ್ಷಗಳು ವಿಜಯ್ ಜೊತೆ ಸೇರುತ್ತವೆ? ಯಾರು ದಳಪತಿಯ ಬೆಂಬಲಕ್ಕೆ ಬರುತ್ತಾರೆ? ಯಾವ ದಿಗ್ಗಜ ನಾಯಕರು ಪಾಳಯ ಬದಲಿಸುತ್ತಾರೆ? ಎಂಬ ಪ್ರಶ್ನೆಗಳು ಜನರಲ್ಲಿ ಭಾರೀ ಚರ್ಚೆಗೆ ಕಾರಣವಾಗಿವೆ.

ತಿರುಪ್ಪತ್ತೂರು: ತಮಿಳುನಾಡು ವಿಧಾನಸಭಾ ಚುನಾವಣೆಯಲ್ಲಿ ರೋಚಕ ತಿರುವು ಕಂಡುಬಂದಿದ್ದು, ಕೇವಲ ಒಂದೇ ಒಂದು ಮತದ ಅಂತರದಿಂದ ಸಚಿವರೊಬ್ಬರು ಸೋಲು ಅನುಭವಿಸಿರುವ ಘಟನೆ ರಾಜಕೀಯ ವಲಯದಲ್ಲಿ ಭಾರೀ ಚರ್ಚೆಗೆ ಕಾರಣವಾಗಿದೆ. ಡಿಎಂಕೆ ಹಿರಿಯ ನಾಯಕ ಹಾಗೂ ಸಚಿವ ಕೆ.ಆರ್. ಪೆರಿಯಕರುಪ್ಪನ್ ಅವರು ತಿರುಪ್ಪತ್ತೂರು ಕ್ಷೇತ್ರದಲ್ಲಿ ಕೇವಲ ಒಂದು ಮತದಿಂದ ಪರಾಭವಗೊಂಡಿದ್ದಾರೆ.

ಶಿವಗಂಗಾ ಜಿಲ್ಲೆಯ ಈ ಕ್ಷೇತ್ರದಲ್ಲಿ ಬಹುತೇಕ ಸುತ್ತುಗಳಲ್ಲಿ ಮುನ್ನಡೆ ಸಾಧಿಸಿದ್ದ ಪೆರಿಯಕರುಪ್ಪನ್ ಅವರಿಗೆ ಅಂತಿಮ ಸುತ್ತಿನಲ್ಲಿ ಭಾರೀ ಆಘಾತ ಎದುರಾಯಿತು. ಅಂತಿಮ ಫಲಿತಾಂಶದಲ್ಲಿ ಅವರ ಎದುರಾಳಿ ಶ್ರೀನಿವಾಸ್ ಸೇತುಪತಿ 83,365 ಮತಗಳನ್ನು ಪಡೆದು ಗೆಲುವು ಸಾಧಿಸಿದರೆ, ಪೆರಿಯಕರುಪ್ಪನ್ 83,364 ಮತಗಳಿಗೆ ಸೀಮಿತರಾದರು.

ಒಂದೇ ಮತದಿಂದ ಸೋಲು!

ಮೊದಲ ಸುತ್ತುಗಳಿಂದಲೇ ಮುನ್ನಡೆ ಕಾಯ್ದುಕೊಂಡಿದ್ದ ಸಚಿವರು, ಅಂತಿಮ ಸುತ್ತಿನ ಮೊದಲು 30 ಮತಗಳ ಲೀಡ್ ಹೊಂದಿದ್ದರು. ಆದರೆ ಕೊನೆಯ ಹಂತದಲ್ಲಿ ಫಲಿತಾಂಶ ತಲೆಕೆಳಗಾದ್ದರಿಂದ ಕೇವಲ ಒಂದೇ ಮತದಿಂದ ಸೋಲು ಅನುಭವಿಸಬೇಕಾಯಿತು.

ಮರು ಎಣಿಕೆ ಬೇಡಿಕೆ

ಈ ಅಚ್ಚರಿ ಫಲಿತಾಂಶದ ಬಳಿಕ ಪೆರಿಯಕರುಪ್ಪನ್ ಮರು ಮತ ಎಣಿಕೆಗೆ ಒತ್ತಾಯಿಸಿದ್ದು, ಕೆಲಕಾಲ ಮತ ಎಣಿಕೆ ಕೇಂದ್ರದಲ್ಲಿ ಉದ್ವಿಗ್ನ ಪರಿಸ್ಥಿತಿ ನಿರ್ಮಾಣವಾಯಿತು.

ಇದಲ್ಲದೆ, ಭಾರತೀಯ ಜನತಾ ಪಾರ್ಟಿ ಅಭ್ಯರ್ಥಿ ಕೆ.ಸಿ. ತಿರುಮಾರನ್ 29,054 ಮತಗಳನ್ನು ಪಡೆದು ಮೂರನೇ ಸ್ಥಾನಕ್ಕೆ ತೃಪ್ತಿಪಟ್ಟಿದ್ದಾರೆ.

ತಮಿಳುನಾಡಿನಲ್ಲಿ ವಿಜಯ್ ಅಲೆ

ಈ ನಡುವೆ ವಿಜಯ್ ನೇತೃತ್ವದ ತಮಿಳಗ ವೆಟ್ರಿ ಕಳಗಂ (TVK) ಮೊದಲ ಬಾರಿಗೆ ಸ್ಪರ್ಧಿಸಿ 108 ಸ್ಥಾನಗಳನ್ನು ಗೆದ್ದು ಅತಿದೊಡ್ಡ ಪಕ್ಷವಾಗಿ ಹೊರಹೊಮ್ಮಿದೆ. ಇತ್ತ ಡಿಎಂಕೆ 59 ಹಾಗೂ ಎಐಎಡಿಎಂಕೆ 47 ಸ್ಥಾನಗಳನ್ನು ಪಡೆದಿವೆ. ಕಾಂಗ್ರೆಸ್ ಪಕ್ಷ 5 ಹಾಗೂ ಪಿಎಂಕೆ 4 ಸ್ಥಾನಗಳಿಗೆ ಸೀಮಿತವಾಗಿದೆ.

ಚೆನ್ನೈ: ತಮಿಳುನಾಡು ರಾಜಕೀಯದಲ್ಲಿ ಹೊಸ ಅಧ್ಯಾಯಕ್ಕೆ ಚಾಲನೆ ನೀಡಿರುವ ವಿಜಯ್ ನೇತೃತ್ವದ ತಮಿಳಗ ವೆಟ್ರಿ ಕಳಗಂ (TVK) ಬಹುಮತದ ಕೊರತೆಯಿದ್ದರೂ ಸರ್ಕಾರ ರಚನೆಗೆ ಹಕ್ಕು ಮಂಡಿಸಿರುವುದು ರಾಜಕೀಯ ಚರ್ಚೆಗೆ ಕಾರಣವಾಗಿದೆ.

ಚೊಚ್ಚಲ ಚುನಾವಣೆಯಲ್ಲೇ 108 ಸ್ಥಾನಗಳಲ್ಲಿ ಗೆಲುವು ಸಾಧಿಸಿರುವ ಟಿವಿಕೆ ಅತಿದೊಡ್ಡ ಪಕ್ಷವಾಗಿ ಹೊರಹೊಮ್ಮಿದೆ. ಆದರೆ ಸರ್ಕಾರ ರಚನೆಗೆ ಅಗತ್ಯವಾದ 118 ಸ್ಥಾನಗಳಿಗೆ 10 ಸ್ಥಾನಗಳ ಕೊರತೆ ಇದೆ. ಹೀಗಿದ್ದರೂ ವಿಜಯ್ ರಾಜ್ಯಪಾಲ ರಾಜೇಂದ್ರ ಅರ್ಲೇಕರ್ ಅವರಿಗೆ ಪತ್ರ ಬರೆದು ಸರ್ಕಾರ ರಚಿಸಲು ಅವಕಾಶ ನೀಡುವಂತೆ ಮನವಿ ಮಾಡಿದ್ದಾರೆ. ಎರಡು ವಾರಗಳಲ್ಲಿ ಬಹುಮತ ಸಾಬೀತುಪಡಿಸುವುದಾಗಿ ಭರವಸೆ ನೀಡಿದ್ದಾರೆ.

ಮೂಲಗಳ ಪ್ರಕಾರ, ರಾಜಭವನಕ್ಕೆ ಇಮೇಲ್ ಮೂಲಕ ಪತ್ರ ಕಳುಹಿಸಲಾಗಿದ್ದು, ಈ ಅವಧಿಯಲ್ಲಿ ಬೆಂಬಲ ಸಂಗ್ರಹಿಸಲು ಟಿವಿಕೆ ಮುಂದಾಗಿದೆ. ಎಲ್ಲಾ ವಿಜೇತ ಅಭ್ಯರ್ಥಿಗಳನ್ನು ಪಕ್ಷದ ಕಚೇರಿಗೆ ಕರೆಯಿಸಿ ಮುಂದಿನ ತಂತ್ರ ರೂಪಿಸಲಾಗುತ್ತಿದೆ.

ಸರ್ಕಾರ ರಚನೆಗೆ 3 ಪ್ರಮುಖ ಸಾಧ್ಯತೆಗಳು

ಮೈತ್ರಿ ವಿಸ್ತರಣೆ (ಡಿಎಂಕೆ ಮೈತ್ರಿ ಪಕ್ಷಗಳ ಜೊತೆ)

• ಟಿವಿಕೆ – 108
• ಕಾಂಗ್ರೆಸ್ ಪಕ್ಷ – 5
• ಎಡಪಕ್ಷಗಳು – 4
• ಐಯುಎಂಎಲ್ – 2
• ವಿಸಿಕೆ – 2

ಈ ಮೈತ್ರಿ ಯಶಸ್ವಿಯಾದರೆ ಬಹುಮತ ಸುಲಭ.

ಹೊಸ ಒಕ್ಕೂಟ ರಚನೆ (ಡಿಎಂಕೆ–ಎಐಎಡಿಎಂಕೆ ಮೈತ್ರಿ ಒಡೆದು)

• ಟಿವಿಕೆ – 108
• ಕಾಂಗ್ರೆಸ್ – 5
• ಪಿಎಂಕೆ – 4
• ಐಯುಎಂಎಲ್ – 2
• ವಿಸಿಕೆ – 2

ರಾಜಕೀಯ ಮರುಸಂಯೋಜನೆಯ ಮೂಲಕ ಸರ್ಕಾರ ರಚನೆ ಸಾಧ್ಯ.

ಬಾಹ್ಯ ಬೆಂಬಲ (AIADMK)

• ಟಿವಿಕೆ – 108
• ಎಐಎಡಿಎಂಕೆ – 47

ಸ್ಥಿರ ಸರ್ಕಾರಕ್ಕಾಗಿ ಹೊರಗಿನ ಬೆಂಬಲ, ಆದರೆ ಭವಿಷ್ಯದಲ್ಲಿ ಸವಾಲುಗಳ ಸಾಧ್ಯತೆ.

ಕಾಂಗ್ರೆಸ್ ಬೆಂಬಲದ ಸುಳಿವು?

ರಾಹುಲ್ ಗಾಂಧಿ ಅವರು ವಿಜಯ್ ಅವರನ್ನು ಸಂಪರ್ಕಿಸಿ ಅಭಿನಂದನೆ ಸಲ್ಲಿಸಿರುವುದು ಕಾಂಗ್ರೆಸ್ ಬೆಂಬಲದ ಸುಳಿವಾಗಿ ಕಾಣುತ್ತಿದೆ. ಇದು ಟಿವಿಕೆ ಸರ್ಕಾರ ರಚನೆಗೆ ನೆರವಾಗಬಹುದು ಎಂಬ ಚರ್ಚೆಗಳು ನಡೆಯುತ್ತಿವೆ.

ರಾಜಕೀಯ ಹೈಡ್ರಾಮಾ ಶುರು

ಬಹುಮತದ ಕೊರತೆಯಿದ್ದರೂ ಟಿವಿಕೆ ಸರ್ಕಾರ ರಚನೆಗೆ ಮುಂದಾಗಿರುವುದು ತಮಿಳುನಾಡು ರಾಜಕೀಯದಲ್ಲಿ ಹೊಸ ಹೈಡ್ರಾಮಾಕ್ಕೆ ಕಾರಣವಾಗಿದೆ. ಮುಂದಿನ ಕೆಲವು ದಿನಗಳಲ್ಲಿ ಮೈತ್ರಿ ಮಾತುಕತೆಗಳು ರಾಜ್ಯದ ಭವಿಷ್ಯ ನಿರ್ಧರಿಸಲಿವೆ.